افغانستان پایتختی کابل شهرنو منطقهسیده بیر هوتل ده اویوشتیریلگن پارتلش عاقبتیده بیش چینلیک یرهلنیشیدن کیین، اوشبو مملکت تشقی ایشلر وزیرلیگی اوز فقرالریدن امکان قدر افغانستان نی ترک ایتیشلرینی طلب قیلگن.
رویترز آژانسی چین تشقی ایشلر وزیرلیگی سوزلاوچیسی وانگ ونبین دن نقل قیلیب یازیشیچه، بیش چینلیک کابل شهرنو منطقهسیده هوتل ده اویوشتیریلگن پارتلش ده یرهلنگن.
بوگون (سهشنبه، ۲۲ قوس) مطبوعاتی ییغیلیشده اشتراک ایتگن چین تشقی ایشلر وزیرلیگی سوزلاوچیسی نینگ ایتیشیچه، مذکور مملکت دولتی اسلام امیرلیگیدن اوشبو هجوم بارهسیده برچه تامانلمه تدقیقات باشلب و عامللرینی جزالنتیریشینی ایستهگن.
بیزلرنینگ فیسبوک صحیفهمیزگه باش اورینگ!
وانگ ونبین، اسلام امیرلیگیدن چین فقرالری و تشکیلاتلری خوفسیزلیگی تأمین ایتیلیشی خصوصیده دقت قیلیشینی سورهگن.
مذکور هجوم دوشنبه کونی، ۲۱ قوس، توش دن کیین ساعت ۲:۳۰ اطرافیده کابل شهرنو منطقهسیده یوز بیرگن. اوییرده چین فقرالری بارلیگی معلوم قیلینگن.
عینحالده اسلام امیرلیگی رسمیلری، مذکور هجوم ده هیچ کیم هلاک بولمهگنینی ایتگن. اسلام امیرلیگی سوزلاوچیسی ذبیحالله مجاهد، اوتگن کون شام چاغی اوز توییتریده، کابل شهرنو منطقهسیده بیر هوتل ده اویوشتیریلگن هجوم، اوچ هجومچی نینگ اولدیریلیشی بیلن یکونلنگنینی یازگن.
اونگه کوره، هوتل دهگی برچه مهمانلر قوتقریلگن و اوشبو هجوم ده هیچ بیر خارجی هلاک بولمهگن. اسلام امیرلیگی سوزلاوچیسی نینگ کوپهیتیریشیچه، اوزلرینی بنا دن قویی تشلهگن ایکی خارجی یرهلنگن. او اوشبو چیتایللیکلر قیسی مملکت فقرالیگی بارهسیده هیچ نرسه دیمهگن.
بیراق کابل ده ایمرجنسی کسلخانهسی گه کوره، کابل شهرنو منطقهسیده بیر هوتل ده اویوشتیریلگن هجوم عاقبتیده ۲۱ کیشی هلاک بولگن و ۱۸ کیشی یرهدار اوشبو کسلخانه گه انتقال بیریلگن. قربانیلر نینگ کیملیگی حاضرگچه بیللی ایمس.
اوتگن کون چین شینهوای آژآنسی عینی گواهلردن نقل قیلیب یازیشیچه، پارتلش چین فقرالریدن قطاری بولگن مهمانخانه یقینیده یوز بیرگن. عینحالده، کابل ده چین ایلچیخانهسی، وضعیت نی یقیندن کوزهیاتگنینی بیلدیرگن.
داعش گروهی کابل ده چین فقرالری بولگن هوتل ده اویوشتیریلگن هجوم مسئولیتینی تن آلگن. داعش گروهی اوتگن کیچه عکس و ویدیو ترقهتیش بیلن، کابل شهری ده چین فقرالری بولگن هوتل ده اویوشتیریلگن هجوم مسئولیتینی تن آلگن. داعش گه کوره، ویدیودهگی ایکی ییگیت مذکور هجوم نی اویوشتیرگنلر.
بیزلرنینگ توییترده هم تعقیب قیلینگ!
داعش گروهی نینگ کوپهیتیریشیچه، افغانستان پایتختی کابل شهری ده چین فقرالری بولگن هوتل ده اویوشتیریلگن هجوم عاقبتیده، کمیده ۳۰ کیشی اولگن و یرهلنگن.
اوشبو هجوم، کابل ده چین ایلچیسی وانگ یو، اسلام امیرلیگی دن اوشبو مملکت ایلچیخانهسی خوفسیزلیگی خصوصیده دقتلی بولیش طلبی دن بیر کوندن کیین، یوز بیرگن.
ایتیلیشیچه، جمعه کونی ۱۱ قوس، کابل ده پاکستان ایلچیسی عبیدالرحمان نظامانی، کابل شهری ده مذکور مملکت ایلچیخانهسی ایچیده نشانگه آلیندی لیکن اونگه ضرر ییتمهدی. اوشبو هجوم ده پاکستان ایلچیسی نینگ قوریقچیسی یرهلندی.
کابل ده پاکستان ایلچیخانهسیده اویوشتیریلگن هجوم مسئولیتینی داعش گروهی تن آلگن. اوشبو گروه گه کوره، هجوم دن مقصد عبیدالرحمان نظامانی و قوریقچیلری بولگن.
داعش گروهی، کابل ده روسیه ایلچیخانهسی گه اویوشتیریلگن هجوم نی زمهسیگه آلگن ایدی. بو هجوم نیچه آی آلدین یوز بیرگندی. اوشبو هجوم ده تورت افغانستانلیک ایکی روسیهلیک دیپلومات هلاک بولگن ایدیلر.