اسلامی امارت رهبری ملا هبت‌الله آخوندزاده، رمضان هییت بیرمی مناسبتی بیلن بولگن قوتلاو پیامیده ایتیشیچه، افغانستان نینگ دنیا بویلب صلح و امنیت اوستیده رولی بار شونی اوچون موجود قیینچلیکلر رسمی و دیپلماتیک قانون_قاعده‌لر اساسیده حل ایتیلیشی مقصدیده، اسلامی امارت حکومتی دنیا جماعه‌چیلیگی تامانیدن رسمیت گه تانیلیشی کیره‌ک.
بوگون (جمعه، ۹ثور) ده ترقه‌لگن اسلامی امارت رهبری نینگ اوشبو پیامیده کیلیشیچه، اولر قوشنی و منطقه مملکت‌لری و شونینگدیک دنیا جماعه‌چیلیگی بیلن یخشی و مثبت مناسبتده بولیشنی ایسته‌یدی.
بیزلرنینگ فیسبوک صحیفه‌میزگه باش اورینگ!
بو عین‌حالده، افغانستانده اسلامی امارت حاکم بولیشیدن ۸ آی‌دن کوپ اوتسه‌ده، بیراق اسلامی امارت سرپرست حکومتینی حاضرگچه هیچ بیر مملکت رسمیت گه تانیمه‌گن.
اسلامی امارت لیدری نینگ پیامی اساسیده، اولر افغانستان باشقه مملکتلر اوچون تهدید بولیشی گه رخصت بیرمه‌یدیلر. شونینگدیک هبت‌الله آخوندزاده دنیا جماعه‌چیلیگیدن اسلامی امارت بیلن تعامل قیلیشینی طلب قیلگن.
جناب آخوندزاده، اسلامی امارت و آمریکا قوشمه ایالت‌لری ارا دوحه بیتیمی عملگه آشیریلیشینی تأکیدلب کوپه‌یتیریشیچه، آمریکا اوشبو کیلیشوو اساسیده افغانستان نینگ ایچکی ایشلری گه اره‌لشمسلیگی کیره‌ک. اونگه کوره، آمریکا باسیم اورنیده اسلامی امارت بیلن همکارلیک قیلیشی درکار.
ملا هبت‌الله آخوندزاده نینگ پیامی بیر بولیمیده کیلیشیچه، اسلامی امارت برچه مخالف‌لری گه عمومی کیچیریم اعلام قیلگن، بیراق اوشبو عمومی کیچیریم‌دن «باش» تارتگن و مملکتده اوروش باشله‌نیشی اوچون تلاش قیلگن کیشی‌لر «جدی و قاطع عکس‌العمل بیلن» روپه‌ره بولیشی ممکن.
اسلامی امارت رهبری نینگ کوپه‌یتیریشیچه، افغانستانده سرمایه یاتقیزیش شرایطی یره‌تیلگن، ایچکی و تشقی سرمایه یاتقیزووچیلردن، افغانستان نینگ تورلی بورچک‌لریده ایریم ساحه‌لرده سرمایه یاتقیزیش‌لرینی طلب قیلگن. او قیته قوریش اوستیگه تأکیدلب و اهالی‌دن بوتوغریده حصه قوشیش‌لرینی سوره‌گن.
آخوندزاده افغانستان نینگ قوشنی‌لری و باشقه مملکت‌لردن افغانستان مهاجرلری بیلن خلق‌ارا قانون_قاعده اساسیده مناسبتده بولیب و اولر گه اوز رضایتی بیلن اولکه گه قیتیش اجازه‌سی بیریلیشینی ایسته‌گن. او بیرلشگن ملت‌لر تشکیلاتی و خلق‌ارا نهادلردن، افغانستان مهاجرلری گه قیتیش شرایطینی یره‌تیشلرینی سوره‌گن.
باشقه تاماندن اسلامی امارت رهبری اوشبو قوتلاو پیامیده ایتیشیچه، افغانستانده بنگوار ماده‌لری ایکیلیشی «مطلقاً» منع بولگن و اسلامی امارت دهقان‌لر گه کوکنار ایکینی اورنیده بدیل تاپیش مقصدیده سعی و حرکت قیلماقده. آخوندزاده گه کوره، اسلامی امارت ایرکک و عیاللر نینگ شرعی برچه حقوقی گه حرمت قایل و باشقه‌لر بشری و عاطفی اوشبو موضوع‌دن سیاسی غایه اوله‌راق فایده‌لنمسلیکلری کیره‌ک.
شونینگدیک اونینگ ایتیشیچه، اسلامی امارت ملی منفعت و اسلامی ارزش‌لر گه بناً ایرکین سوز گه متعهد دیر و «سالم و مثبت نشرات دن حمایت قیله‌دی.» اسلامی امارت رهبری تعلیم ساحه‌سیده ایتیشیچه، اولر «تعلیم و تربیه جریانی کوچلنیشی» اوچون تلاش قیلماقده‌لر و دینی و «عصری» تعلیم‌نی رواجلنتیریش مقصدیده مملکت نینگ تورلی بورچک‌لریده مدرسه و مکتب‌لرنی افتتاح قیلگنلر.
بو عین‌حالده اسلامی امارت نینگ افغانستان ده حاکم بولیشیدن قریب سکیز آی اوتسه‌ده، لیکن آلتینچی صنف‌دن یوقاری قیز اوقووچیلر نینگ مکتب‌لری حاضرگچه آچیلمه‌گن. اسلامی امارت ینگی‌لیکده، اولکه بویلب تومن‌لر سطحی‌ده ۳ دن ۱۰ دینی مدرسه قوریلیشینی اعلام قیلگن.
بیزلرنینگ توییترده هم تعقیب قیلینگ!
بشری حقوق خلق‌ارا نهادلردن قطاری، اسلامی امارت‌دن دینی مدرسه‌لرنی قوریش عوضیگه، قیزلر نینگ مکتب باریشی گه اجازه بیریشینی طلب قیلگنلر.
اسلامی امارت رهبری رمضان هییت بیرمی قوتلاو پیامیده، کابل، بلخ و قندوزده اویوشتیریلگن سونگی قانلی واقعه‌لردن یاد ایتمه‌گن. آخوندزاده اوشبو پیامیده، اسلامی امارت افغانستان ده حاکم بولیشی بیلن، اولکه بویلب امنیت تأمینلنیب و اوروش گه چیک قوییلگنینی اورغوله‌گن.
