توش چاغی اطرافیده شمالی ولایت‌لردن آواره بولیب کابل شهری نینگ سرای شمالی منطقه‌سیده بولگن آزادی پارک‌ده جایلشگن عایله‌لر بیلن صحبت اوتکزیش اوچون اوشبو پارک‌ده باردم.
آزادی پارکی‌ده یمان وضعیتده تیریک‌چیلیک قیله‌دیگن یوزلرچه عایله‌لر اوروش و قیغولریدن حکایه قیله‌دیلر.
آواره بولیب آزادی پارکی‌ده کیلگن‌لردن بیری عبدالمالک دیر. اوشبو دواملی اوروش‌لر سبب اوی و دارایی‌لرینی قولدن بیریب و کوزی هم کور بولگن.
اونینگ کوزی کورمه‌یدی، لیکن اوزی و عایله‌سینی قندوز ولایتیدن کابل‌گه ییتیشتیرگن و حاضرده اوشبو شهر ده باش‌پناه ایزله‌یدی. عبدالمالک نینگ ایتیشیچه، ۵۸ یاشر دیر و اوروش‌لر سبب، اوی تخریب ایتیلگنیدن سونگ، یالغیز عایله‌سینی کابل گه کیلتیریش‌گه موفق بولگن.
او، قندوز ده قیغولی کونلرنی تجربه قیلگن. اونینگ ایتیشیچه، قندوز دن ذهنی قولگن سونگی تصویر اوی‌گه توشگن راکت اوقی دیر.
عبدالمالک روزگار نینگ قیغولی کونلری و قندوز-کابل قتناو یولی نینگ خطرلریدن حکایه قیله‌دی. اونینگ ایتیشیچه، یول ده طالبان تامانیدن قیناققه سالینگن.
اونینگ کوپه‌یتیریشیچه، آواره‌لیک کونی‌ده پولی هم یوق دیر و عایله‌سی آچیق فضا ده تیریک‌چیلیک قیله‌دی و تیریک‌چیلیک امکانیت‌لریدن محروم دیر.
آزادی پارکی‌ده کیلگن چاغده جان‌لرینی قوتقریش اوچون آواره و سرگردان بولگن عایله‌لرنی کوردم. اولرنینگ قوشمه دردلری آواره‌لیک دیر؛ تیل و قومی مسله اولر اوچون اهمیت‌سیز دیر.
آواره بولگنلر نماینده‌لری نینگ ایتیش‌لریچه، قندوز، تخار، بغلان و بدخشان ولایت‌لریدن یوزلرچه عایله آواره بولیب کابل گه کیلگنلر، لیکن حکومت حاضرگه‌قدر هیچ‌قنده‌ی یاردم بیرمه‌گن.
عین‌حالده، مهاجرلر و باش‌پناه ایزلاوچی‌لر وزیرلیگی اورین باسری رضا باهر نینگ ایتیشیچه، اضطراری کمیته ایجاد ایتیلگن و تیزلیکده آواره بولگن‌لرگه ییگولیک ماده و سوو توزیع ایتیله‌دی.
آواره‌لیک و جای‌سیزلیک آدم‌لرنینگ قلبی‌نی یره‌لنتیره‌دیگن قوشمه درد دیر و اوروش نیچه ییلدن بویان اهالی نینگ اوی‌لرینی ویران قیلیب و اوزلرینی آواره قیلگن مسله دیر. اهالی نیچه ییل دن بویان تینچلیک ایسته‌یدی و تینچ فضا ده تیریک‌چیلیک قیلیش امیدی بیلن عمرلرینی اوتکزماقده‌لر.
