اوزبیکستان جمهور باشلیغی شوکت میرضیایف، قیرغیزستان گه رسمی تشریفی دایرهسیده اوشبو مملکت جمهور باشلیغی صدر جباروف بیلن اتفاقچیلیک مناسبتلری توغریسیده تاریخی شرطنامه امضالهدی.
اوزبیکستان جمهورلیک ریاستی گه کوره، بو ایکی دولت رهبرلری حضوریده ایکی تامانلمه حجتلر جملهدن اوزبیکستان-قرغیزستان دولت چیگرهسی توغریسیده شرطنامه، «چشمه» بولاغیدن بیرگهلیکده فایدهلنیش همده اقتصادی، سیاسی و مدنی ساحهلرده تورلی شرطنامهلر امضالنگن.
اوزبیکستان جمهور باشلیغی شوکت میرضیایف، بوگون (۸ اسد/۳۰ جولای، پنجشنبه) قرغیزستان جمهور باشلیغی صدر جباروفنینگ تکلیفی گه بناً بو مملکت گه باردی و ایکی تامان تار دایرهده (خصوصی) و رسمی هیئت اعضالری اشتراکیده اوتکزگن مذاکرهلریده اوزبیکستان-قرغیزستان استراتیژیک شیریلیک مناسبتلرینی رواجلنتیریش و ینگی باسقیچگه آلیب چیقیش مسئلهلرینی محاکمه قیلگنلر.
شونینگدیک، اوزبیکستان جمهور باشلیغی اوشبو سفری دایرهسیده، مرکزی آسیا و آذربایجان دولت رهبرلرینینگ نارسمی مصلحت اوچرهشووی تدبیرلریده هم اشتراک ایتیشی کوتیلهدی.
