امریکا اردوسی مرکزی قوماندانلیگی (سنتکام)، هرمز بوغوزیده تجاری بیر کیمهگه اویوشتیریلگن هجومگه جواب ایران ایچیده نیچه حربی نشانگه هجوم قیلگنینی معلوم قیلگن.
سنتکامنینگ بوگون ایرتهلب (۶-سرطان/۲۷-جون، شنبه)، بیر بیانیه آرقهلی اکس صحیفهسیده یازیشیچه، امریکا کوچلری ایراننینگ قیرغاقدهگی رادار سایتلری، پهپادلر و راکتهلر سقلنهدیگن جایلرنی نشانگه آلگن.
بیانیهده، هرمز بوغوزیدن اوتهیاتگن پیتده «اور لاولی» تجاری کیمهگه ایراننینگ هجومی، «آتیش کیسیننی بیللی شکلده بوزیش» دییلگن. شونینگدیک سنتکامنینگ کوپهیتیریشیچه، مذکور اقدام کیمهلرنینگ آزاد شکلده اوتیشینی تهدید قیلیب و خلقارا تجارتنینگ اینگ مهم یوللریدن بیرینینگ امنیتینی خوف آستیگه قویگن.
امریکا اردوسی مرکزی قوماندانلیگینینگ اورغولشیچه، هرمز بوغوزیدن تجاری کیمهلرنینگ تینچ اوتیشی اوچون هماهنگلیک و قوللب-قوتلشنینگ دوامی بولیب و شونینگدیک امریکا کوچلری آتیش کیسین کیلیشووی عملگه آشیریلیشی و اوشبو سوو امنیتی تامینلنیشی اوچون منطقهده قالیشلری ممکن.
بوندن آلدین تایواننینگ «اورگرین مارین» کیمهچیلیک کمپنیه، پنجشنبه کونی «اور لاولی» یوک کیمهسینینگ هرمز بوغوزیده عمان قیغاقلری یقینیدن اوتیش چاغیده نابیللی بیر نرسهنینگ تیگگنی نتیجهسیده زیان کورگنینی معلوم قیلگن ایدی.
مذکور واقعهدن کیین، امریکا جمهور باشلیغی دونالد ترامپ، اوشبو کیمهنینگ پهپاد بیلن نشانگه آلینگنینی بیان قیلیب و اونی «آتیش کیسین کیلیشووینی بوزیش» عنوان قیلگن.
شوندهی بیرحالده، ایران رسمیسی ابراهیم عزیزی، هرمز بوغوزیگه ایران حاکمیتیگه تاکید قیلیب و ایتیشیچه، کیمهلر آرقهلی قانون رعایت بولیب و تینچ یوللردن اوتیلیشی کیرهک.
