امریکا جمهور باشلیغینینگ اعلام قیلیشیچه، واشینگتن و تهران هرمز بوغوزی آچیلیشی و آتیش کیسین اوزهیتیریلیشی اوچون دستلبکی بیر کیلیشوونی امضا قیلگنلر.
رویترز آژانسینینگ بوگون (۲۶-جوزا، ۱۶-جون، سهشنبه)، گزارش بیریشیچه، کیلیشوو توغریسیده حاضرگچه تفصیلات بیریلمهی و ایکی تامان دایمی بیر کیلیشووگه ایریشیش اوچون مذاکرهلرنینگ دوام قیلیشیگه تاکید قیلماقده.
امریکا جمهور باشلیغی دونالد ترامپنینگ اعلام قیلیشیچه، امریکا و ایران آرهسیده دستلبکی کیلیشوو امضالنگن. مذکور کیلیشوو اساسیده، اپریل ده اعلام بولگن وقتینچهلیک آتیش کیسین ۶۰ کون گه اوزهیتیریلیب و هرمز بوغوزیده کیمهلر قتناوی قیته یولگه قوییلهدی.
جی ۷ ییغینیگه شرکت قیلیش اوچون فرانسه ده حضوری بولگن ترامپنینگ ایتیشیچه، کیلیشوونی امضالش رسمی مراسمی کیلهسی جمعه سویسنینگ ژنو شهریده اوتکزیلیشی ممکن.
بو بیلن بیرگه، ایران جمهور باشلیغی مسعود پزشکیان، مذکور کیلیشوونی کیسکینلیکلر کمهیشی اوچون مهم آدیم دیب، بیراق اورغولشیچه، برقرار تینچلیک تامینلش بوییچه یکونی کیلیشووگه حاضرگچه ایریشیلمهگن.
شونینگدیک امریکا جمهور باشلیغی اورینباسری جیدی ونس، کیلیشوو متنی تفصیلاتینینگ کیلهسی کونلر ترقهتیلیشی ممکن دیب اعلام قیلگن.
کیلیشوو امضالنگنی خبری ترقهتیلگنیدن کیین، دنیا بازارلریده نفت قیمتی کمهیب و اوتگن اوچ آی جریانیدهگی اینگ قویی سطحیگه ییتیشگن.
ایران و امریکا آرهسیدهگی کیسکینلیک، فبروری آییده ایران گه قرشی امریکا و اسرائیلنینگ قوشمه حربی هجوملریدن کیین کوچهیگن. اوشبو اوزگریشلردن کیین دنیانینگ نفتی انتقال تاپهدیگن اینگ مهم یوللردن حسابلنهدیگن هرمز بوغوزی جدی چیکلاولر بیلن روپهره بولیب و خلقارا انرژی بازارلرینی تاثیر آستیگه قویدی.
ایکی تامان اپریل آییده وقتینچهلیک بیر آتیش کیسینگه قولگه تاپدیلر، لیکن ایراننینگ هستهای دستوری، اقتصادی تحریملر و منطقه اوزگریشلریده حزبالله لبنان اورنی شونینگدیک کیلیشماوچیلیک بوییچه اینگ مهم موردلردن حسابلهنیب و مذاکرهلرنینگ کیینگی باسقیچیده تیکشیریلیشی ممکن.
