هرمز بوغوزی و امریکانینگ ایران گه قرشی ینگی اقتصادی تحریملری، یقین شرقدهگی کیسکینلیکنینگ کوچهیشیگه ایلنگن ایکی اساسی مسئله؛
امریکا جمهور باشلیغی دونالد ترامپ ینگی بیاناتیده، ینه بیر بار ایران گه نسبتن اقتصادی باسیملر دوام ایتیشی گه تأکیدلب بو مملکت گه قرشی کینگ کولملی ینگی تحریملر تفصیلاتینی اعلان قیلیشینی بیلدیردی.
ترامپنینگ ایتیشیچه، تهران کیلیشوونی ایستهیدی، بیراق او «توغری کیلیشوو» دیب اتهیاتگن بیتیم گه حلی تیار ایمس. شونینگدیک او، ایرانده کیم بیلن مذاکره آلیب باریشی کیرهکلیگینی بیلمسلیگینی تأکیدلهگن. عینی پیتده، واشنگتننینگ اقتصادی باسیمگه اعتبار قرهتهیاتگنی حربی ورینتدن واز کیچگنی معناسیده ایمسلیگینی ایتگن.
او، سوزلری بیر بولیمیده، هرمز بوغوزینی امریکاحدودینینگ بیر قسمی دیب اتهگن: «ایرانده کیم بیلن مذاکره قیلیشنی بیلمهی من. بو در حقیقت مینینگ کتته قیینچیلیگیم. ایرانده هیچ کیم جمهور باشلیغ بولیشنی ایستمهیدی، مین حاضر هرمز بوغوزینی امریکا حدودینینگ بیر قسمی بیلهمن بو امریکا حدودی حسابلنهدی.»
تهران، امریکانینگ ینگی تحریملرینی ایران گه قرشی عادی اقتصادی چارهدن کوره کینگراق حرکت دیب بیلگن.
ایران تشقی ایشلر وزیرلیگی سوزلاوچیسی اسماعیل بقایی، امریکا تحریملرینی خلقارا حقوق نقطهی نظریدن هیچ قندهی حقوقی اساس گه ایگه ایمس دیب اتهگن. اونینگ ایتیشیچه، واشنگتن باشقه دولتلرنینگ بانکلری، کمپنیهلری و تشکیلاتلریگه ایران بیلن سودانی توختهتیش اوچون باسیم اوتکزیش آرقهلی اوزینینگ چیگرهدن تشقری مستقل دولتلر گه حاکمیتنی تحمیل قیلیش گه اورینماقده.
بقایی شونینگدیک، اقتصادی تحریملر و ایران بندرلری محاصره قیلینیشی، بوتون مملکتلرنی ضعیف قیلیب و سنتی استعمار (مستملکهچیلیک) که قیتیش اوچون زمینه یرهتیشی حقیده آگاهلنتیرگن.
او ایکس اجتماعی ترماغیده شوندهی دیب یازگن: «امریکانینگ تهران گه قرشی ینگی تحریملری بیر مملکت گه قرشی اقتصادی اوروشدن تشقری دیر و در حقیقت بوتون دولتلر گه قرشی اوروش اعلان قیلیش معناسینی افاده قیلهدی. واشنگتن چیگرهدن تشقری حاکمیتنی بیرلشگن ملتلر تشکیلاتی گه اعضا مستقل مملکتلر گه تحمیل قیلیش گه حرکت قیلماقده، بانکلر، کمپنیهلر یا کی بیر مملکت صلاحیتی آستیده بولگن قونالغهلر، باشقه مملکتلر تامانیدن اوچینچی مملکت بیلن قانونی تجارتدن قول تارتمسلیگی کیرهک.»
جهان نفت نرخی هم، ترامپنینگ ایران گه یاردم بیرهیاتگن مملکتلر گه قرشی اقتصادی تحریملری جاری ایتیش حقیدهگی تهدیدلری آرتیدن آشگن.
برچهسی بیلن، صلح مذاکرهلری یونهلیشی بوتونلی یاپیلمهگن.
عمان تشقی ایشلر وزیری بدر البوسعیدی و ایران تشقی ایشلر وزیری سیدعباس عراقچی تلفونی ملاقاتده، مذاکرهلر قیته باشلنیشی اوچون مناسب شرایط یرهتیلیشی و شونینگدیک هرمز بوغوزیده کیمهلرنینگ قتنهشیش وضعیتی حقیده بحث ایتگنلر.
رویترز گه کوره، ناتونینگ ییریک قوماندانلری بو ائتلاف گه اعضا ایریم مملکتلر وکیللری اشتراکی بیلن، هرمز بوغوزیده کیمهلرنینگ آزاد باریب-کیلیشینی قوللب-قوتلشده احتمالی اشتراک ایتیشلرینی تیکشیریش اوچون ییغیلیش اوتکزگن.
