پرو جنوبیده جایلشگن «نازکا چیزیغی» اسملی قدیمی بیر حدودده سیاحتچیلیک کیچیک بیر اوچاقنینگ قولشی نتیجهسیده، ۱۳ کیشی اولگن.
رویترز آژانسینینگ بوگون (۱۱-اسد/۲-اگست، یکشنبه)، پرو ترانسپورت و علاقهلر وزیرلیگیدن نقل قیلیب گزارش بیریشیچه، مذکور اوچاق ایچیده چیتایللیک ۱۱ سیاحتچی جملهدن جرمنی، ایتالیا و اسپانیا یشاوچیلری همده ایکی خادم بار ایکن.
گزارش اساسیده، اوچیش پیسکو هوا قونالغهسیدن محلی وقت بیلن توش پیتی ساعت ۱۲:۱۰ ده عملگه آشیریلیب و اوچاقنینگ قولشیدن کیین آلاو آلگنی سبب، یولاوچیلردن برچهسی اولگن.
بو واقعه سببی حاضرگچه بیللی بولمهی و پرو دولتی ایسه، بو توغریده تیکشیروولر باشلنگنینی معلوم قیلگن.
«نازکا چیزیقلری»، پرو جنوبیدهگی چوللریگه توشیریلگن کته نقشلر و هندسی شکللر مجموعهسی بولیب، اوشبو مملکتنینگ اینگ مهم سیاحتچیلیک جایلریدن بیری حسابلنهدی. هر ییلی قریب ۱۰۰ مینگ سیاح بو قدیمی حدودنی کوریب چیقهدی و مذکور تصویرلرنی ایسه یالغیز کیچیک اوچاقلرده اوچیش آرقهلی کوریش ممکن.