۲۷ یاشیده بولگن میراجان، قندهار ولایتی نینگ پنجوایی تومنی یشاوچی‌سی دیر. او ۷ ییلدن بویان قندهار شهریده تیریک‌چیلیک قیله‌دی و عایله‌سی نینگ سرپرستی دیر.
میراجان بیر ییل آلدین دوست‌لریدن بیری تامانیدن ناقانونی مهاجرلیک آرقه‌لی اروپا باریش‌گه ترغیب بوله‌دی. او، آته‌سیدن قالگن انار باغچه‌سینی ۲۴۵ مینگ پاکستان‌لیک کلدارگه ساتیب پولی‌نی قاچاقچی‌لرگه تاپشیره‌دی.
میراجان قاچاقچی‌لرگه پولی‌نی تاپشیرگنیدن سونگ، هیچ‌کیم نی جریان‌گه قویمسدن هرات تامان یولگه چیقه‌دی. او، یاز کونلریدن بیریگه دوست‌لری بیلن زاهدان تامان حرکت قیله‌دی.
اونینگ ایتیشیچه: «ایرته‌لب ساعت ۳ اطرافیده یول نینگ کوپینچه قیین‌چیلیکلرینی تحمل قیلیش بیلن زاهدان شهریگه بارگن. قاچاقچی‌لر مین و دوست‌لریم نی بلوچ‌لرگه تاپشیردی. اولر بیزگه سوو و آذیق بیرمه‌ریدی. شکایت قیلگن کیشی‌لر تحقیر و کلتکلنه‌ریدی.»
میراجان نینگ کوپه‌یتیریشیچه، کیچه‌نی بیر بیابانده اوتکزیب و سونگی کیچه باشقه کیشی‌لرگه تاپشیریلگن. میراجان نینگ ایتیشیچه، او و همراه‌لری ۳ آی قیین‌چیلیک‌نی تحمل قیلگنیدن سونگ، یونان چیگره‌سیگه ییتیشگن.
میراجان نینگ ایتیشیچه، ترکیه و ایران چیگره‌سیده بیر آی کوتیب تورگنیدن سونگ، ۱ یریم آی‌نی ترکیه اردوگاه‌لریدن بیریده قماققه اوتکزگن. اونینگ کوپه‌یتیریشیچه، حیاتده قالیش اوچون نیچه مرته توپراق ییگن.
«مین مملکت یاش‌لریدن اوز اولکه‌لریده سعی و حرکت و ایش قیلیش‌لرینی ایسته‌یمن؛ باشقه مملکت‌لرنینگ آت‌لرینی هیچ‌بیر زمان توتمه‌سینلر. مین کوپینچه قیین‌چیلیکلرنی تجربه قیلگنمن. بو ییرده هرقنده‌ی بولسه اوز مملکتم؛ بیراق ناقانونی مهاجرلیک آرقه‌لی باشقه مملکت‌لرگه باریش حقیقتده حیات بیلن اوینه‌ش دیر.»
میراجان ترکیه دن بوش قیتیب کیلگن و ۶ آیدن بویان کسل دیر. اونینگ ایتیشیچه، ناقانونی مهاجرلیک حیاتی‌نی برهم اورگن.
بیلیم یورت اوقیتووچی‌لریدن بولمیش خیرمحمد اکمل نینگ ایتیشیچه، افغانستانلیک یاشلردن کوپ قطاری ایش‌سیزلیک و کم‌بغللیک سبب، مملکت‌نی ترک قیلیب و نهایتده قاچاقچی‌لر دامی گه توشه‌دیلر.
اونینگ ایتیشیچه، ناقانونی مهاجرلیککه توسیق بولیش اوچون مملکتده حکومت تامانیدن شغل ایجاد قیلینیشی کیره‌ک.
قندهار ولایتی بوییچه مهاجرلیک ریاستی باشلیغی دوست محمد نایاب نینگ ایتیشیچه، اولر ناقانونی مهاجرلیککه توسیق بولیش اوچون معلومات بیریش برنامه‌لرنی باشله‌گنلر.
قندهار ولایتی بوییچه مهاجرلیک ریاستی باشلیغی گه کوره، جاری خورشیدی ییل جریانیده ۸۸۳ مهاجر عایله سپین‌بولدک یولی آرقه‌لی قندهار گه قیتیب کیلگن.
مهاجرلیک وزیرلیگی معلوماتی‌گه کوره، حاضرده ملیونلرچه افغانستانلیک مهاجر ایران، پاکستان و باشقه مملکت‌لرده حیات کیچیره‌دیلر و اولرنینگ سرنوشت‌لری بیللی ایمس.
