تخار ولایتی تالقان یشاوچیلریدن قطاری شهر سطحیده چیقیندیلر کوپهیگنیدن خواطر بیلدیریب و ایتیشلریچه، هوا ایسیق بولیشی بیلن جویچهلر و سرکلر چیکهسیده ییغیلیب قالگن چیقیندیلر، یامان هید اورته گه کیلیشی همده جویچهلر بند بولیب قالیشیگه سبب بولهدی.
تالقان شهری یشاوچیلرینینگ کوپهیتیریشلریچه، هر ییلی هوا ایسیق بولیشی بیلن چیقیندیلر هیدیدن اذیت بولهدیلر؛ بیراق بو ییل ایسه اوشبو قیینچیلیکلر قربان هییت بیرمیدن کیین کوپهیگن.
تخار ولایتی تالقان یشاوچیلریدن اسدالله و سمیعالله گه کوره، قربان هییت بیرمیدن کیین بیرقطار کیشی آرقهلی شهرنینگ تورلی بولیملری همده جویچهلرگه چیقیندیلر تشلنگن که بو وضعیت، یشش محیط افلاسلیگی و اهالینینگ اذیت بولیشیگه سبب بولگن.
اسدنینگ ایتیشیچه: «قیغو بیلن تالقان شهریده بیر قطار کیشی آرقهلی چیقیندیلر جویچهلرگه تشلنهدی که بو وضعیت سوو کیتهدیگن جویچهلر بند بولیشی و چیقیندیلرنینگ سرک یوزیگه چیقیشیگه سبب بولهدی. شونینگدیک یامان هید چیقیب و اهالی آرهسیده تورلیخیل کسللیکلرنی هم اورته گه کیلتیره آلهدی.»
شونینگدیک سمیعالله شهر تازهلنیشی توغریسیده حکومتنینگ همکارلیگینی ایستهب و ایتیشیچه: «بو توغریده حکومتنینگ اعتبار قرهتیشی همده اهالیگه چیقیندیلرنینگ سرکلر چیکهسیگه قویمسلیکلرینی ایتیشی کیرهک. اوشبو شهرده حیات کیچیرهدیگن بیر کیشی صفتیده قیغو بیلن بعضا مذکور چیقیندیلر هیدیدن کوپ اذیت بولهمیز.»
یشش محیط ایش بیلرمانلری عمومی آگاهیلیک کوپهیشی و چیقیندیلر تشلهنیشی مقصد بیللی جایلر یرهتیلیشیگه تاکیدلهگن. یشش محیط بیلرمانلریدن بشیراحمد حمیدینینگ ایتیشیچه، جویچهلر و عمومی جایلرگه چیقیندیلرنینگ تشلهنیشی آلدی آلینیشی مقصد، تالقان بلدیهسی یشش محیط ریاستی هماهنگلیگی بیلن چیقیندیلر توپلهنیشی اوچون مناسب جایلرنی نظرگه آلیشی همده یشاوچیلرگه آگاهیلیک بیریلیش برنامهلرینینگ اوتکزیشی کیرهک.
اونگه کوره: «یشش محیط ریاستی بلدیه، ناحیه باشلیغی و کوچهلر وکیللری هماهنگلیگی بیلن، چیقیندیلرنینگ درست شکلده مدیریت قیله آلهدی، عکسینچه حالده اولر جدی شکلده قرار آلمهگنلریده ایسه یشش محیط افلاسلیگی کوپهیشی ممکن.»
شوندهی بیرحالده، تالقان بلدیهسی مسئوللرینینگ ایتیشلریچه، چیقیندیلرنی تازهلش ایشی باشلهنیب و بو دستور منظم شکلده دوام قیلیشی ممکن.
تخار ولایتی تالقان بلدیه سوزلاوچیسی حیاتالله صفرینینگ ایتیشیچه، مذکور اداره جویچهلر و افلاسلنگن بولیملرنی تازهلش یانیده، یشش محیطنی سقلش بوییچه یشاوچیلرنینگ تشویق بولیشی اوچون سیار آگاهیلیک بیرووچی تیملرنی یرهتیشگه سعیوحرکت قیلماقده.
جناب صفرینینگ کوپهیتیریشیچه: «تالقان بلدیهسی تازهلش دستورلرینی عملگه آشیریش یانیده، کیلهجکده بو کبی قیینچیلیکلر تکرار بولمسلیگی اوچون دایمی نظارت، یشاوچیلرگه آگاهیلیک بیریش و شهر قاعده-قانونینی عملگه آشیریلیشنی نظرگه آلگن.»
ایتیش کیرهک که، جویچهلر و عمومی جایلرگه چیقیندیلر ییغیلیب قالیشی، افغانستان شهرلریدن قطاریدهگی یشش محیط قیینچیلیکلریدن حسابلهنیب و بو قیینچیلیک یامان هید یانیده، جویچهلر بند بولیشی و یشاوچیلرآرهسیده تورلیخیل کسللیکلرنینگ کوپهیشیگه سبب بولیشی ممکن.
