کابل یشاوچیلریدن قطاری شهر سطحیده چیقیندیلر کوپهیگنیدن شکایت قیلیب و ایتیشلریچه، هوا ایسیق بولیشی بیلن کوچهلر و سرکلر چیکهسیده ییغیلیب قالگن چیقیندیلر، یامان هید اورته گه کیلیشی و تورلیخیل کسللیکلر ترقهلیشیگه سبب بولهدی.
کابل شهری ۱۰-ناحیه یشاوچیسی جبراننینگ ایتیشیچه، کوچهلر و سرکلر چیکهسیگه چیقیندیلر ییغیلیب قالیشی بیلن اویلریگه هر تورلی هید کیلیب و اهالینینگ قیینچیلیک بیلن روپهر قیلگن. «قربان هییت بیرمیده بیر قطار کیشی چیقیندیلرنی هر ییرگه تشلهدیلر. بولر ییغیلیب قالگن و یامان هید چیققن. بو منطقهدهگی یشاوچیلر جوده اذیت بولهدی. اویگچه هیدی کیلهدی. بو حالت کسللیکلر ترقهلیشیگه هم سبب بوله آلهدی.»
کابل شهری ایکینچی ناحیه یشاوچیسی فریدوننینگ ایتیشیچه، ییغیلیب قالگن چیقیندیلر شمال و بوران یوز بیرگنیده، منطقهنینگ هر تامانیگه تیت بولیشیگه سبب بولهدی. «اهالی اذیت بولهدی، شمال یا-ده بوران بولگنیده برچه منطقه چیقیندیدن تولهدی. بو وضعیت کسللیکلر ترقهلیشی و اهالینینگ اذیت بولیشیگه سبب بولهدی. چیقیندیلرنینگ تازهلنیشینی سورهیمیز.»
کابل شهری تورتینچی ناحیه یشاوچیسی ضامن علی، بلدیهدن چیقیندیلرنینگ وقتیده ییغیلیشی و شهردن تشقریگه انتقال بیریلیشینی سورهگن. «مین تکسی هیداوچیسی. بو ساحهده چیقیندیلر هیدی بولگنی اوچون موتریمنی توختته آلمهیمن، شونینگدیک یشاوچیلر اوتیب قیتیشده اذیت بولهدی و کسللیککه سبب بوله آلهدی. چیقیندیلرنینگ وقتیده تازهلنیشینی سورهیمن. هر کیم کیلیب چیقیندیلرنی تشلهیدی و چیقیندیدن تولیب کیتگن.»
شوندهی بیرحالده، کابل بلدیهسی مسئوللرینینگ ایتیشلریچه، کابل شهرینینگ تازهلش اوچون بیر قطار برنامهلری بار. کابل بلدیهسینینگ فرهنگی مصلحتچیسی نعمتالله بارکزیگه کوره، جاری قویاش ییلده اوشبو اداره ۳۵ میلیون افغانیلیک مینگلرچه کثافتدانینی شهر بویلب نصب قیلگن. «تازهلاوچی شرکتلرگه بیر طرزالعمل بیریلگن که تصدیق بولگنیدن کیین ایشلریگه باشلهیدیلر. کابل بلدیهسی بیر لایحهنی عملگه آشیریب ۳۵ میلیون افغانی ارزشیگه ۲۰ لیتره قریب ۵ مینگته کثافتدانی و ۷ متر مکعب بولگن ۵۰ ته کثافتدانینی شهر بویلب نصب قیلگن. شونینگدیک باشقه ۴۰ میلیون افغانینی کثافتدانی توزهتیلیشی بوییچه باشقه نیچه لایحهگه اختصاص بیرگن.»
کابل بلدیهسی مسئوللری شهرده یشش فرهنگی یخشیلنیشی مقصد، یشاوچیلردن چیقیندیلرنی کابل شهرینینگ تورلی بولیملریگه نصب بولگن کثافتدانیلرگه تشلهشلرینی سورهگن.
بو بیلن بیرگه، شفاکارلردن قطارینینگ ایتیشلریچه، چیقیندیلرنینگ وقتیده مدیریت بولمسلیگی، یوقمه کسللیکلر جملهدن مالاریا، دنگی ایسیتمهسی، محرقه، تنفسی و تیری کسللیکلرینینگ ترقهلیشیگه سبب بولهدی.
کابل ده انتانی کسلخانهسی متخصصی فریدالله عمرینینگ ایتیشیچه، کابل شهریده کسللیکلر ترقهلیشی آلدی آلینیشی اوچون وقتیده شهر سطحیدن چیقیندیلرنینگ انتقال بیریلیشی کیرهک. «چیقیندیلر بلدیه و اهالی تامانیدن مدیریت بولمهگنی صورتده، یوقمه کسللیکلر جملهدن سریقلمه، مالاریا، دنگی ایسیتمهسی، محرفه، تنفسی و تیری کسللیکلری کوپهیشیگه سبب بولهدی و بلدیه همده اهالی چیقیندی تشلنهدیگن کثافتدانیلرنینگ وقتیده بوشهتیشلری کیرهک.»
کابل بلدیهسینینگ معلوماتی اساسیده، اوشبو اداره هر کونی ایکی مینگ تُندن آرتیق چیقیندینی شهر سطحیدن ییغیب و تشقریگه انتقال بیرهدی.
