ناتو باش کاتبی ینس استولتنبرگ نینگ ایتیشیچه، افغانستان ده آمریکا حربی‌لری نینگ رقمی کمه‌یگن بیرحالده، بو تشکیلات مذکور مملکتده‌گی مأموریتی گه دوام بیره‌دی.
اوتگن کون (سه‌شنبه ۱۱- قوس) استولتنبرگ بروکسل ده ناتو تشقی ایشلر وزیرلری نینگ ییغینی باشلنگن بیرحالده، خبری بیر ییغین اوتکزیب ایتیشیچه، مذکور تشکیلات تشقی ایشلر وزیرلری نینگ ییغینیده، افغانستان وضعیتی بحث گه آلینگن و ناتو افغانستان تینچلیک پروسه‌سیدن حمایت قیله‌دی و اونینگ اساسیده افغانستان ده حضوری نی تنظیم قیله‌دی.
ینس استولتنبرگ نینگ ایتیشیچه: «آمریکا افغانستانده‌گی حربی‌لری نینگ رقمی نی ۲۵۰۰ کیشی گه کمه‌یتیریش گه قرار آلگن بیرحالده، ناتو نینگ مأموریتی دوام تاپیشی ممکن.» اونگه کوره، ناتو نینگ یریم دن آرتیق حربی‌لری آمریکالیک ایمس.
شونینگدیک اونینگ کوپه‌یتیریشیچه، ناتو میلادی ۲۰۲۴- ییل گه قدر افغانستان امنیتی کوچلریدن مالی حمایت قیله‌دی.
اوتگن کون آلمان تشقی ایشلر وزیری هایکو ماس، ناتو تشقی ایشلر وزیرلری نینگ ییغینی باشلنمه‌سدن آلدین ایتیشیچه، ناتو وقت آلدین حربی‌لری نینگ چیقاریش بیلن، تینچلیک سوزلشوولری نی خوف بیلن روپه‌رو قیلمه‌یشی کیره‌ک.
اونینگ ایتیشیچه: «بیزلر ناتو نینگ بیرلشک‌لری صفیده، افغانستان ده حربی‌لرنینگ چیقیشی آچیق شرط‌لرگه باغلیق بولیشی کیره‌ک.» آلمان تشقی ایشلر وزیری نینگ کوپه‌یتیریشیچه، اوتگن ییل‌لرنینگ یوتوق‌لرینی سقلش اوچون، تیز اقدام‌لرگه قول اورمه‌سلیک کیره‌ک.
جناب استولنتنبرگ بیاناتی نینگ بیر بولیمیده ایتیشیچه، مذکور تشکیلات تشقی ایشلر وزیرلری، افغانستان ده مأموریت گه دوام بیریش و ترورچیلیککه قرشی کوره‌ش اوچون مذکور مملکت امنیتی کوچلریدن حمایت قیلیش گه دوام بیره‌دی.
اونینگ کوپه‌یتیریشیچه، بو تشکیلات افغانستان نینگ وضعیتی نی تیکشیریش گه دوام بیره‌دی و فبروری آیی‌ده ناتو مدافعه وزیرلری بیلن بولیب اوته‌دیگن ییغینده، قیین قرارلر آلیش‌لری ممکن. ناتو باش کاتبی نینگ اورغولشیچه، هر قنده‌ی قرار اویغونلیک بیلن آلینه‌دی.
شونینگدیک ناتو باش کاتبی، آمریکا جمهوررئیسی جوبایدن دن، کیله‌جک فبروری آیی‌ده بروکسل ییغینیده اشتراک قیلیشی نی سوره‌ب و آمریکا حربی‌لری نینگ بوتونلی چیقیش یا-ده قالیش موضوعی نی تیکشیرگندن کیین، حربی‌لری افغانستان ده قالیشی خصوصیده قرار آلسین.
بیراق استولتنبرگ بو ییغینیده مسئولیت‌لی چیقیش اوستیگه اورغولب ایتیشیچه، ناتو افغانستان ده ابدی قالمه‌یدی.
ایکی کون آلدین (دوشنبه ۱۰- قوس) ینس استولتنبرگ، ناتو تشقی ایشلر وزیرلری ییغینی نینگ عرفه‌سیده ایتیشیچه، افغانستان ده حربی حضور و هم افغانستاندن چیقیش اوچون بها بیریشی کیره‌ک.
کمیده ایکی هفته آلدین آمریکا جمهوررئیسی دونالد ترامپ، مذکور مملکت حربی‌لریدن ۲۰۰۰ ته‌سی کیله‌جک جنوری آیی گچه افغانستان نی ترک قیلیش اوچون بویروغ بیردی. آمریکا نینگ حاضر افغانستان ده ۴۵۰۰ عسکری بار.
آمریکا ده ایرکین خبرچی‌لردن بیری لیلما سدید نینگ ایتیشیچه، مذکور ییغینده ناتو باش کاتبی تینچلیک سوزلشوولری نتیجه گه ایریشیشی اوچون هیچ بیر تضمین یوقلیگی نی ایتگن ایدی.
خانم سدید گه کوره، استولتنبرگ طالبان گروهیدن مذکور گروه و آمریکا آره‌سیده امضالنگن کیلیشوونامه گه عمل قیلیب و شونینگدیک افغانستان حکومتیدن تینچلیک پروسه‌سی خصوصیده کوپینچه سعی و حرکت قیلیشی نی سوره‌گن.
اوتگن کون ناتو باش کاتبی، افغانستان ده تینچلیک تأمین ایتیلیشی اوچون تاریخی بیر فرصت اورته گه چیققنی نی ایتگن ایدی. اونینگ کوپه‌یتیریشیچه، بو فرصتدن فایده‌لنیش کیره‌ک.
