کابل، سونگی ییللر دوامیده آسمان اوپر بنالرده یشش سیزیلرلی درجهده آشگن شهرلردن بیری حسابلنهدی. بو شهرده یوقاری قووتلی بنالر قوریلیشی و کوپهلیشی بیلن، اکثریت یشاوچیلرنینگ آسمان اوپر بنالرده یششگه قیزیقیشی آرتگن.
شو بیلن بیرگه، آسمان اوپر بنالرده یشش افضللیکلری یانیده، یشاوچیلریدن بیرقطاری قوشنیچیلیک و یوقاری قووتلی بنالرده یشش قاعدهلری رعایه قیلینمسلیگیدن شکایت قیلهدیلر.
اولرنینگ ایتیشیچه، یوقاری قووتلی بنالرده یشش مدنیتیدن خبردارسیزلیک و قوشنیچیلیک قاعدهلری رعایه قیلینمسلیگی سببلی ایریم قیینچیلیک بیلن دوچ بولگنلر.
کابل شهری اوچینچی ناحیه یشاوچیسی محمد شعیب، ۱۰ ییلدن بیری آسمان اوپر بناده یشهیدی، آپارتماندهگی حیات قیینچیلیکلری حقیده شوندهی دییدی: «قیینچیلیک کوپ، مثال اوچون کیچه تاماندن آپارتمانده ییغیلیشلر یا کی توی مراسملری اوتکزیلهدی، موسیقه و بالهلرنینگ شاوقینی کیچگچه دوام ایتهدی بو ایسه راحتسیزلیک و اویقوسیزلیککه سبب بولهدی.»
اوشبو گزارشده محمد شعیبدن باشقه یوقاری قووتلی انشاآتلرده یشاوچی سکیز کیشی بیلن صحبت قیلینگن. اولر جملهدن گوجوملیک، سوو ییتیشمسلیگی و موترلری اوچون پارکینگ یوقلیگینی انشاآتلردهگی قیینچیلیکلردن دیب تیلگه آلگنلر.
اولر، بلند آوازده گپیریش، بالهلرنینگ تپیر-توپیر قیلیشی و زینهلردن یخشی قوللنمسلیکنی آپارتمانده یشش اساسی قیینچیلیکلردن عنوان قیلهدیلر.
کابل شهری ۱۱ ناحیه یشاوچیسی خالد شوندهی دییدی: «اساسی معما شاوقین، کوپینچه بالهلر یا کی مهمانلیک بولسه شاوقین کوپلهدی. تاملر آرهسیدهگی دیوارلر آوازنی اوزیگه آلمهیدی، شونینگ اوچون آواز قووتلر و واحدلر آرهسیدن اوتهدی.»
شو بیلن بیرگه کابل شهری ۱۶ ناحیه یشاوچیسی مینه گه کوره: «سونگی کونلرده بیزدن تیپهراق قووتده بیر قوشنی کوچیب کیلدی، افسوس بیلن کوپ شاوقین قیلیشهدی و بیزنی بیزاوته قیلگن. آسمان اوپر بنالرده یششنینگ اینگ مهم قیینچیلیگی سوو تنقیصلیگی دیر، اینیقسه کابلده کوپینچه حالتلرده سوو ییتیشمسلیگی بیلن روپهره بولهمیز.»
کابل شهری ۱۱ ناحیه یشاوچیلریدن بولمیش مدثر، آپارتمانلرده یخشی شرایط یوقلیگیدن گپیرهدی: «باشقه معمالردن بیری پارکینگ یوقلیگی دیر. انده-سنده موترلر ترتیبسیز طرزده پارک قیلینهدی شونینگ اوچون باریب-کیلیشده قیینچیلیک بیلن دوچ بولهسیز و حتا بعضی حالتلرده ایشگه کیچ ییتهسیز.»
کابل شهری ۱۰ ناحیه یشاوچیسی عمرنینگ ایتیشیچه، هنوزگچه مملکت یشاوچیلری اورتهسیده آپارتمانده یشش مدنیتی بوتونلی رواجلنمهگن. اونینگ کوپهیتیریشیچه: «مینی فکریمچه هنوزگچه آپارتمانده یشش مدنیتی بوتونلی رعایه قیلینمهیدی و کوپراق خبردارلیک قیلینیش کیرهک. کوپینچه آدملر حاضرگچه قاعدهلر گه دقت قیلمهیدی.»
برچهسی بیلن، جمعیتشناسلر آپارتمانلرده آدملر خیلمه-خیللیکنی انابت گه آلیب بیر-بیریگه نسبتن حرمت، برداشلیک و صبر-طاقتلی بولیشی کیرهک دییدیلر.
جمعیتشناس شعیب احمدی شوندهی دییدی: «آدملر اورتهسیده حرمت بولینسه و برچه آدملر قاعدهلر گه رعایه قیلسه. شونینگدیک شاوقیننی کنترول قیلیش جودهیم مهم، چونکی کیچیک مراسم باشقهلرنینگ بیزاوته قیلیشیگه سبب بوله آلهدی.»
بیرلشگن ملتلر تشکیلاتینینگ اهالی یشش دستوری حساباتیگه کوره، افغانستان اینیقسه کابل شهریده شهرلیک، مثلی کوریلمهگن درجهده آشماقده.
کابل بلدیهسینینگ معلوماتلریگه کوره، سونگی تورت یریم ییل ایچیده کابل شهریده دییرلی ۳۰۰ آسمان اوپر بنا قوریلگن، بو مسئله یشاوچیلرنینگ شهرلیک و آپارتمانده قندهی یشش مدنیتیگه رعایه قیلیش بارهسیده بیلیم و خبردارلیگینی ینهده آشیریش ضرورتینی کوچهیتیرماقده.
