سونگی کونلر کاپیسا ولایتیده چاروهلر آرهسیده ترقهلگن کسللیکلر، چاروهچیلر و سیگیردارلرنینگ جدی خواطرلریدن بیریگه اَیلنگن. چاروهچیلرنینگ ایتیشلریچه، اوشبو کسللیکلر نهفقط ساغین سیگیرلر سلامتلیگینی تهدید قیلهدی، بلکیم سوت ایشلب چیقریشی، عایلهلر درآمدی همده یوزلب عایلهنینگ تیریکچیلیک وضعیتیگه توغری شکلده تاثیر قویگن دیر.
اولرگه کوره، سونگی آیلرده ساغین سیگیرلری آرهسیده تورلیخیل کسللیکلرگه چیلینیش حالتلری کوپهیگنی و چاروهلر ساغلیگی بوییچه خذمتلر آزلیگی، چاروهچیلر قیینچیلیکلرینی ایکی برابر قیلگن.
کاپیسا ولایتیدهگی سیگیردارلردن بیری عبدالمتیننینگ ایتیشیچه، قیشلاقلر یقینیده وترینرلیک یوقلیگی، دارو واکسین قیمتی یوقاریلیگی و کسل چاروهلر تاشیلیشی اوچون مناسب امکانیت یوقلیگی، حیوانلر قیینچیلیگینینگ وقتیده حل قیلنمسلیگیگه سبب بولگن.
اونینگ کوپهیتیریشیچه: «کسللیکلردن کوپینچهسی قیشلاقدهگی ساغین سیگیرلر آرهسیده تاپیلگن. سببی ایسه وقتیده واکسین بولمسلیک، درست آوقتلنمسلیک و درست قرهلمسلیک دیر. بو کسل سوت تولید بولیشیگه سلبی تاثیر قویهدی. انه شوو سوت محصوللری، آز درآمدلی عایلهلرنینگ اقتصادیگه یاردم بیرهدی.»
شونینگدیک کاپیسا ولایتیدهگی سیگیردارلردن باشقه بیری حکمتالله، واکسین کملیگی و چاروهلر ساغلیگی بوییچه مناسب خذمتلر یوقلیگیدن خواطر بیلدیریب و ایتیشیچه: «طبق یوقمه بیر کسللیک بولیب و ترقهلگنیده بوتون قیشلاقدهگی سیگیرلرنی کسل قیلهدی. بو ییرده واکسین آز بولیب و وترینرلیک هم یوق. کابل گه بار اما یول اوزاق دیر. مذکور کسللیک سیگیرلرده بیر قطار قیینچیلیکلرگه سبب بولهدی.»
شوندهی بیرحالده، کاپیسا ولایتی یشاوچیلریدن قطارینینگ ایتیشلریچه، قیشلاقلرده چاورهلر ساغلیگی بوییچه مرکزلر یوقلیگی سبب، چاروهچیلر کسل حیوانلرینی دوالش مقصد کوپینچه یول یوریشگه مجبورلر.
اوشبو ولایت نجراب تومنی یشاوچیلریدن عبدالرحمان، مسئوللردن حیوانی طبی خذمتلرگه قولی بیر شکلده فایدهلنیش امکانیتی یرهتیلیشینی سورهگن. «قیشلاغیمیز و قیشلاغیمیز یقینیده چاروهلر اوچون کلینیک یوق. اهالی قیینچیلیگی حلی اوچون مسئوللردن بو قیشلاق یقینیده بیر کلینیک قوریلیشی، دارولر قیمتی ارزانراق بولیشی و اهالیگه تعلیمی دستورلر یولگه قوییلیشینی سورهیمیز.»
وترینرلیک ایشلری بوییچه ایش بیلرمانلرنینگ ایتیشلریچه، ساغین سیگیرلر آرهسیده یوقمه کسللیکلر مملکت منطقهلریدن قطاری جملهدن کاپیساده کوپراق کوزگه کوریلهدی. اولرنینگ کوپهیتیریشلریچه، کلستریدی باکتریاسی طفیلی اورتهگه کیلهدیگن انتراکس و اناپلازما، تیلاریا و بابیزیا کبی انگلی کسللیکلری، چاروهلر آرهسیده کوپ ترقهلهدیگن کسللیکلردن دیر.
وترینرلیک ایشلری بوییچه ایش بیلرمانلردن عبدالحبیب، چاروهلر ساتیلهدیگن قوشمه بازارلرنی کسللیکلر انتقال تاپیشی اصلی عامللریدن بیری بیلیب و اورغولشیچه، واکسیناسیون همده آلدینی آلووچی اقداملرنی رعایت قیلیش، کسللیکلر ترقهلیشینینگ آلدینی آلاله دی. «چاروهلر بولگن قوشمه بازارلر بیر حیواندن باشقه بیر حیوانگه کسللیکنینگ یوقیشی یا-ده کسللیک ترقهلیشیگه سبب بوله آلهدی. چاروهچیلر چاروهلریگه کوپراق توجه قیلیب، وقتیده واکسین قیلدیریب و وترینرلیک بیلن علاقهده بولیشلری کیرهک. شونینگدیک هر آی چاروهلر سقلنهدیگن جایلرنینگ تازهلنیشی، دارو سیپیلیشی و چاروهلر سقلنهدیگن جاینینگ ایشیگیٔگه جالی توتیلیشی کیرهک؛ چونکه حشرهلر اوزی کسللیکلرنینگ انتقال بیریشده اصلی عامللردن بیری دیر.»
باشقه بیرتاماندن، کاپیسا ایکینچیلیک، چاروهچیلیک و سووغاریش ریاستی مسئوللرینینگ ایتیشلریچه، حیوانی کسللیکلر ترقهلیشی آلدی آلینیشی اوچون تورلیخیل دستورلرنی قولگه آلگنلر.
کاپیسا ایکینچیلیک، چاروهچیلیک و سووغاریش ریاستینینگ حیوانی سلامتلیک و چاروهلر خذمتلری بوییچه آمری عبدالجلیل رحمانیگه کوره، اهالینینگ چاروهلر ساغلیگی بوییچه خذمتلردن فایدهلنه آلیشی کوپهیشی مقصد، بو ریاست اونلب حیوانی خذمتلر مرکزلرینی آچیش بیلن سعیوحرکت قیلگن.
جناب رحمانینینگ ایتیشیچه: «قیینچیلیکلرنینگ کنترول بولیشی ممکن، چونکه تومنلر و قیشلاقلرده ۶۰ ته حیوانی ساغلیق کلینیکلر اهالیگه خذمت کورستماقده. کسللیک ترقهلیشیدن آلدین هر کسللیک اوچون واکسین تطبیق بولیش پلانلریمیز بار. تومنلرده چاروهچیلیک ایشلری بوییچه مدیرلری آرقهلی ییلنینگ هر موسومیده یوقمه کسللیکلر توغریسیده چاروهچیلرگه آگاهیلیک بیریلهدی. شونینگدیک مرکزلرده مسلکی و فنی ایشلاوچیلر آرقهلی مناسب آوقتلنیش رهنمالیگی، تازهلیکنی رعایت قیلیش و ییلنینگ هر موسومیده ساغلام آوقتنی ذخیره قیلیش بوییچه رهنمالیگیمیز بار.»
مسئوللر حیوانی ساغلیق مرکزلر و کسللیکلرنینگ آلدینی آلووچی دستورلری بارلیگینی بیان قیلگنلری بیرحالده، چاروهچیلردن قطارینینگ ایشانچی گه کوره، اوزاق منطقهلرده حیوانی ساغلیق خذمتلردن فایدهلنیش امکانیتی ییترلی ایمس. اولر مسئوللردن حیوانی کلینیکلر آچیلیشی، دارو و اکسین تامینلنیشی همده آگاهیلیک بیریش بوییچه دستورلری کوچهیشی توغریسیده جدی شکلده اعتبار قرهتیشلرینی ایستهگنلر؛ چونکه کاپیسا دهگی عایلهلردن قطاری اوچون چاروهچیلیک یگانه درآمد منبعسی دیر.
ایتیش کیرهک که، ایسیتمه، «ماستیت» یا-ده ییلین میکروبی بولیشی، هضم بیلن باغلیق قیینچیلیکلر، یوقمه کسللیکلر، ایاق و اشتهاسیزلیک ساغین سیگیرلر آرهسیده کوپراق کوزگه کوریلهدی که اوشبو کسللیکلر، حیواننینگ ضعیف بولیشی و سوتی میزانی کمهیشیگه سبب بولیب و نتیجهده، عایلهلر اقتصادی وضعتیگه هم تاثیر قویگن.
