سونگی پیتلرده، کاپیسا ولایتی «الیاسخیل» قیشلاغیده چاروهلرنینگ غیرطبیعی تلفاتی، چاروهچیلر آرهسیده کینگ کولملی خواطرلرگه سبب بولگن. باشده چاروهلر سقلنهدیگن نیچه بولیمده کوزهتیلگن کسللیک، استه-سیکین قیشلاقنینگ باشقه حدودلریگه ترقهلیب، منطقه یشاوچیلریگه سیزیلرلی مالی ضررلرنی ییتکزگن.
محلی چاروهچیلر، سیگیرلر و قویلر آرهسیده ایسیتمه، اشتهاسیزلیک، عمومی ضعف، چاروهلر ایاغی تیترهشی و توستدن اولیشی کبی علایملرنی ایتگنلر.
بو توغریده محلی چاروهچیلردن بیری نبیالله، شوخی و الیاسخیل حدودلریده قریب ۳ دن ۴ مینگ عایلهنینگ حیات کیچیریشینی بیان قیلیب و ایتیشیچه: «بو کسللیک بیر چوپان آرقهلی ۲۵۰ باش سگیرنینگ اوتلهنیشگه آلیب کیتگنی سبب اورته گه کیلدی. قریب تورت-بیش کونده ۱۰ دن ۱۵ باش سگیر اولدی و بو کسللیک تیزلیککه ترقهلهدی. زراعت اداره مسئوللریدن تیزلیککه بو کسللیکنینگ آلدی آلینیشی یا-ده آگاهیلیک بیریلیشینی سورهیمیز، چونکه بو حدودلر اهالیسی کمبغل کیشیلر دیر.»
شونینگدیک چاروهلری اولیمی تلف بولیشیگه شاهد بولگن گل مرجاننینگ ایتیشیچه: «چاروهلر آرهسیگه بو کسللیک کیلگن. بیر قطارینی قارنیدن توتهدی و بیر قطارینینگ ایاقلریده تیترهش تاپیلهدی. ۱۲ ساعت تیریک قالهدی و کیین تلف بولهدی.»
شونینگدیک سرمایهسیدن بیر قسمینینگ قولدن بیرگن چاروهچیلردن باشقه بیری شیردل، یاردم بیریلیشنینگ کیچیکتیریلگنیدن خواطر بیلدیریب و ایتیشیچه: «قیشلاغیمیزگه چاروهلر آرهسیده کسللیک کیلگن. بیر سیگیریم اولدی. هر کیمنینگ چاروهسیدن ایکی-اوچ تهسی تلف بولگن. حاضرگچه دولت تامانیدن یاردم بیریلمهگن.»
شوندهی بیرحالده، کاپیسا چاروهلر ساغلیگی و چاروهچیلیک ایشلری بوییچه آمریتی مسئوللری، تخنیکی تیکشیریش و نمونه آلیشدن کیین، بو منطقهده چاروهلر آرهسیده اوچته خوفلی کسللیک بارلیگینی تصدیق قیلگنلر.
کاپیسا ایکینچیلیک، سووغاریش و چاروهچیلیک ریاستینینگ چاروهلر ساغلیگی و چاروهچیلیک ایشلری بوییچه آمری عبدالخلیل رحمانینینگ ایتیشیچه: «تیکشیروولر اساسیده، چاروهلر تلف بولیشی انترکس، قرسان و انتروتوکسیمی کسللیکلری طفیلی دیر. توپلم شکلده قریب ۱۰ ته چاروه تلف بولیب و کوپ قطاری ایسه کسللیککه چلینیب و سکتوری شفاکارلریمیز دوالنیشی آستیده دیر. سیگیر، قوی و ایچکی کوپراق بو کسللیک برابریده جبرلنهدی.»
شونینگدیک جناب رحمانی، بو کسللیک اورتهدن کیتگزیلیشیده ایکینچیلیک ادارهسینینگ برنامهلری توغریسیده شوندهی دیدی: «حاضر دارو سیپیش برنامهسی ایش دستوریده بار. چاروهچیلرگه توصیه قیلهمیز که منطقه گه هیچ قندهی چاروهنی کیلتیرمهسینلر یا-ده منطقهدن شبهلی چاروهنی چیقرمهسینلر. قالگن چاروهلرنی واکسین قیلماقچینمیز و همکار موسسهلرنی هم جریان گه قویگنمیز.»
الیاسخیل قیشلاغیده اوچته کسللیک اورته گه کیلگنی، کاپیسا ده چاروهچیلیک صناعتی اوچون خوف قونغیراغی دیر. ایش بیلرمانلرنینگ ایشانچی گه کوره، قرنطین اصولی رعایت بولیشیده چاروهچیلرنینگ همکارلیگی و منطقه بویلب واکسیناسیون توغریسیده تیزلیککه اقدام بولمهگنی صورتده، بو کسللیکنینگ یقین منطقهلرگه اوتیشی همده اقتصادی زیانلر خوفی بار.
