هرات_قندهار قتناویولی مملکت نینگ اونملی قتناویوللریدن بیری دیر کیم کونده مینگلرچه یوک تاشووچی و یولاوچی تاشووچی موتر بو قتناویولدن اوتیب قیتهدی. بیراق نیچه هفتهدن بویان طالبان مذکور قتناویول نینگ ایریم بولیمی نی قندهارنینگ ژیری و میوند تومنلریده، هلمند نینگ کشک نخود، گرشک و شورابک منطقهلریده و شونینگدیک فراه نینگ فراهرود تومنیده باغلهگن.
هرات_کابل قتناویول هیداوچیلریدن بیر قطاری نینگ ایتیشلریچه، بو قتناویولده هر کون امنیتی کوچلر و طالبان گروهی آرهسیده آتیشمه یوز بیرهدی و شونینگدیک قتناویول باغلیق دیر. اوشبو هیداوچیلرگه کوره، هرات_کابل قتناویولیدهگی پوستهلردن کوپینچهسی طالبان نطارتی گه اوتگن.
هرات_کابل قتناویول هیداوچیلریدن بیری صبغتالله نینگ ایتیشیچه، ایکی کون آلدین طالبان نینگ چک پاینتی دن قاچهدیگن بیر پیتده، مذکور گروه جنگریلری تامانیدن هجوم آستیده آلینگن.
یوللرنینگ یاپیلگنی باعث ولایتلریگه کیته آلمهگن هیداوچیلر و یولاوچیلردن قطاری نینگ ایتیشلریچه، یول یاپیلگنی باعث کسللری جان بیرگن. اولر دولت و طالبان گروهیدن قتناویوللرنی اهالی نینگ یوزیگه آچیب و اولرگه بوندن آرتیق ضرر بیرمسلیکلرینی سورهشگن.
عین حالده تخار یشاوچیلریدن قطاری نینگ ایتیشلریچه، تخار_قندوز قتناویولی نینگ اَیریم بولیمی طالبان نظارتی گه اوتگن و اهالی آسانلیککه بو یولدن اوتیب_قیته آلمهیدی.
قندهار پولیسی سوزلاوچیسی جمالناصر بارکزی و تخار پولیسی سوزلاوچیسی خلیل اسیر قتناویوللر طالبان تامانیدن یاپیلگنی نی تصدیقلب ایتیشیچه، قتناویوللرنی آچیش اوچون امنیتی و مدافعه کوچلرنینگ عملیاتلرینی دوامی بار.
شونینگدیک جوزجان یشاوچیلری و محلی مسئوللری نینگ ایتیشلریچه، طالبان جوزجان_بلخ قتناویولی اینیقسه مذکور قتناویول نینگ علمخیل منطقهسیده چک پاینت قوریش بیلن اهالیدن باج آلیشهدی.