افغانستان ملی خوفسیزلیک کینگش دفتری نینگ ایتیشیچه، دوحه کیلیشوونامه‌سی تینچلیک تأمین‌لنیشی گه تأثیرلی بولمه‌ی و شونینگدیک اوروش و قان توکیش نی توختتمه‌گن. بو کیلیشوونامه کمیده بیر ییل آلدین آمریکا و طالبان گروهی آره‌سیده امضالندی.
بوگون (یکشنبه ۳- حوت) ملی خوفسیزلیک کینگش دفتری سوزلاوچیسی رحمت‌الله اندر، رسانه‌لرگه ویدیوی بیر پیام یوباریب ایتیشیچه، دوحه کیلیشوونامه‌سی امضاله‌نیشی گه افغانستان حکومتی بیلن ییترلیچه مصلحت قیلینمه‌گن.
ملی خوفسیزلیک کینگش دفتری سوزلاوچیسی گه کوره، افغانستان حکومتی بو مملکت نی سقله‌ش اوچون مسئولیت‌لی دیر و شونینگدیک اوروش و تینچلیککه هم شونده‌ی توجه قیله‌دی.
دوحه کیلیشوونامه‌سی اوتگن ییل ۱۰- حوت قطر پایتختی دوحه‌ده آمریکا و طالبان گروهی آره‌سیده امضالندی. بو کیلیشوونامه اساسیده، چیت‌ایللیک کوچلر جاری میلادی ییل می آیی گچه افغانستان نی ترک قیلیش‌لری کیره‌ک.
طالبان گروهی اوشبو کیلیشوونامه نی امضالش بیلن زوروانلیکلرنی کمه‌یتیریش، افغانستان حکومتی بیلن مذاکره گه کیریش و شونینگدیک القاعده و باشقه ترورچیلیک گروه‌لر بیلن بولگن علاقه‌لرینی کیسیش توغریسیده سوز بیرگن ایدی.
بیراق حاضر طالبان آمریکا، ناتو و افغانستان حکومتی تامانیدن کیلیشوونامه گه عمل قیلمه‌سلیک توغریسیده عیب‌لنگن. شونده‌ی بیرحالده، آمریکا و ناتو افغانستان دن چیقیش نی شرطلی قیلگن. آمریکا نینگ ایتیشیچه، طالبان بیرگن وعده‌لریگه قنچه‌لیک عمل قیلگن‌لرینی بیللی قیلیش اوچون دوحه کیلیشوونامه‌سی تیکشیریلماقده.
