غزنی شهری یشاوچیلری قریب بیش ییل دوامیده، دولت برقیدن فایدهلنیش همده برق پایهلری، لین، میتر و باشقه اوسکونهلرنی ساتیب آلیش اوچون دییرلی ۲۰۰ میلیون افغانی صرفلشگن. دولت برقیدن فایدهلنیش اوچون هر بیر عایله ۱۵ دن ۲۵ مینگ افغانی تولهگن.
مدنی فعال و غزنی شهری آلتینچی ناحیه یشاوچیسی ذکی رحیمی گه کوره، بو ناحیه اهالیسی سونگی تورت ییل دوامیده ۱۶ برق ترانسفارمرینی قوندیریش اوچون قریب ۱۳۷ میلیون افغانی صرفلهگن. او شوندهی دییدی: «بو ریجه یشاوچیلرنینگ اشتراکی و مالیهوی حمایتی بیلن باشلندی و نوآباد اهالیسی بو ایشنینگ ایلک تشبثکارلری بولدی. محل اهالیسی همکارلیگیده ۱۶ ته برق ترانسفارمری قوندیریلدی و فایدهلنیشگه تاپشیریلدی و اونینگ نتیجهسیده قریب ۵۵۰۰ عایله برق نوریدن فایدهلندی.»
غزنی شهری اوچینچی ناحیهده گذر وکیلی علی دریاب، بو ناحیه یشاوچیلری دولت برقیدن فایدهلنیش صرف-خرهجتلرینی شخصی پوللریدن تولهگنینی معلوم قیلهدی. اونینگ ایتیشیچه، پایه، لین و باشقه اوسکونهلرنی ساتیب آلیش اوچون هر بیر عایله تخمیناً ۱۵ مینگ ۵۰۰ افغانی تولهگن. اونینگ ایتیشیچه: «برق جهازلرینی ساتیب آلیش اوچون هر بیر عایله ۱۵ مینگ ۵۰۰ افغانی تولهگن. بعضی حدودلرده عایلهلر صرف-خرهجت یانیده، میتر و لین ساتیب آلیش اوچون علیحده پول صرفلهگن.»
غزنی شهری همده بو شهرنینگ ریجهسیز قوریلگن جایلریده دولت برقی ییتکزیلیشی، یشاوچیلر اوچون ایریم قولیلیکلرنی آلیب کیلگن.
غزنی یشاوچیلریدن ایریملرینینگ ایتیشیچه، دولت برقیدن فایدهلنیشدن ایلگری خصوصی شرکتلرنینگ برقیدن فایدهلنیشگن، اونینگ خرهجتی ایسه کوپلب عایلهلر اوچون آغیر بولگن.
غزنی شهری تورتینچی ناحیه یشاوچیسی مهدی شوندهی دییدی: «ایندی دولت برقی کیلگنی اوچون هر تامانلمه ینگیلشدی. اویده موزلتگیچ کبی برق جهازلریدن بیملال فایدهلنه آلهمیز.»
غزنی شهری اوچینچی ناحیه یشاوچیسی بولگن حکمتالله، دولت برقیدن فایدهلنیش عایلهلرنینگ کوپینچه قیینچیلیکلرینی حل قیلگنینی ایتهدی. «اوتگن ییللرده، برق ییتکزیش خصوصی شرکتلر فعالیت یوریتردی؛ بیراق برق نرخی قیمت بولگنی سببلی کوپلب عایلهلر تلویزیون، موزلتگیچ، سوو ایسیتگیچ و باشقه برق جهازلریدن فایدهلنه آلمس ایدی. خورسندلیک بیلن دولت برقی کیلگچ، منطقهمیزده بو معما حل قیلیندی.»
شو بیلن بیرگه، افغانستان برق ییتکزیش شرکت (برشنا) مسئوللرینینگ ایتیشیچه، برق لایحهلری خرهجتینی تأمینلشده غزنی یشاوچیلرینینگ همکارلیک قیلیشی، بو ولایتده برق ییتکزیشنی آسانلشتیرگن.
برشنا شرکتینینگ اجرائیه ریاستی سوزلاوچیسی محمدصادق حقپرست، اوتگن تورت-بیش ییلده، برق ییتکزیش لایحهلر عملگه آشیریلیشی اوچون غزنی یشاوچیلری قریب ۲۰۰ میلیون افغانی صرفلهگنینی بیلدیرهدی.
اونینگ کوپهیتیریشیچه، برشنا شرکتینینگ هماهنگلیگی بیلن، بو خرهجتلر برق ییتکزیش ۴۱ لایحهده صرفلنگن و غزنی ایریم بولیملریده قریب ۲۰۰ کیلومتر برق ییتکزیش ترماغی کوپهیتیریلگن. اونینگ سوزلریگه کوره، غزنی ولایتیده سونگی بیش ییلده برشنا برقیدن فایدهلنوچیلر سانی ۳۰ مینگ عایلهدن آشگن.
غزنی اهالیسی سونگی ییللرده برق ییتکزیش بولیمیده همکارلیک قیلیشگه قوشیمچه، مکتبلر، ساغلیق مرکزلری، سوو توغانلری و سرکلرنی قوریشده هم حصه قوشگن؛ بو همکارلیکلر بیر تاماندن لایحهلرنی عملگه آشیریشده حکومت اوچون قولیلیکلر آلیب کیلگن و ینه بیر تاماندن ایسه، محل یشاوچیلری اوچون کوپراق آسانلیکلر یرهتگن.
