کنر ولایتی سوکی تومنی اهالیسی، ایریم عایله‌لر اوی‌لریده‌گی آقاوه سوولرنی یول و عمومی کوچه‌لر گه چیقره‌یاتگنیدن شکایت قیله‌دیلر. اولرنینگ ایتیشیچه، بو حالت اطراف-محیط‌نینگ افلاسلنیشیگه و محلی اهالی سلامت‌لیگی بیلن باغلیق معمالر گه سبب بولگن.
اولر گه کوره، عمومی یوللر گه آقاوه سوو چیقریلیشی نتیجه‌سیده یاقیمسیز هید و افلاسلنیش کوچه‌یب، کونده‌لیک حیات قیینلشگن. باله‌لر ایسه افلاسلیک سببلی تورلی کسللیک‌لر گه کوپراق دچار بولگن.
سوکی تومنی دیوه‌گل دره‌سی یشاوچیسی بولگن حیران صافی، بو حالتدن شکایت قیلیب، شونده‌ی دییدی: «منطقه‌ده آقاوه سوولرنینگ کوچه‌لر گه چیقریلیشی نه‌فقط باله‌لر، بلکی یاشلر گه هم تأثیر قیلگن. کوپینچه یاقیمسیز هید و افلاس محیط سببلی معمالر گه دوچ کیله‌میز. یاش باله‌لر ایسه کوپراق ایچ‌کیتیشی و تیری کسللیک‌لریگه چلینماقده.»
اکرام، دیوه‌گل دره‌سی‌نینگ ینه بیر یشاوچیسی، بو معمانی اوزاق مدت‌ده حل قیلیش اوچون ترتیبلی فاضلاب تیزیمینی یره‌تیش ضرورلیگینی بیلدیره‌دی. او شونده‌ی دییدی: «بعضاً کوچه‌نی اوزیمیز تازه‌له‌یمیز و آدملردن چیقیندی تشله‌مسلیکنی سوره‌یمیز، اما ترتیبلی تیزیم بولمه‌گونچه بو معما حل بولمه‌یدی. بیزنینگ طلبی‌میز – مسئوللر فاضلاب تیزیمینی یره‌تیب، تازه‌لیککه جدی اعتبار قره‌تیشسین.»
اوشبو منطقه‌نینگ ینه بیر یشاوچیسی عمران هم، آقاوه سوولرنینگ عمومی یوللر گه تشلنیشی اهالی حیاتیگه سلبی تأثیر کورسته‌یاتگنینی ایته‌دی. او معمانی حل قیلیش اوچون مسئول اداره‌لرنینگ همکارلیک قیلیشینی سوره‌یدی. اونگه کوره: «بیز تینچ و آسایشته محیط‌ده یشه‌ی آلمه‌یپمیز، باله‌لر ایسه دایما تورلی کسللیک‌لر گه دوچ کیله‌دی. بو مسئله‌نی اجتماعی ییغیلیش‌لرده ایتگن‌میز و آدملر تازه‌لیک‌نینگ اهمیتینی توشونیشی اوچون حرکت قیله‌یپمیز. اما بو معمانی توبدن حل قیلیش اوچون حکومت‌نینگ همکارلیگی ضرور.»
محله‌نینگ آقسقاللریدن بیری دیدارگل سیدی، اهالی سانی‌نینگ کوپه‌یشی و شهر ترتیبی‌نینگ ضعیف‌لیگی وضعیت‌نینگ ینه‌ده یامانلشیشیگه سبب بولگنینی ایته‌دی. او شونده‌ی دییدی: «ترتیب‌سیز آقاوه سوولر جوده خوفلی، چونکی اولر ایچ‌کیتیش، تایفاید و تورلی تیری کسللیک‌لری کبی کسللیک‌لر گه سبب بولیشی ممکن. باله‌لر افلاس محیط طفیلی تیزراق ضرر کوره‌دی، چونکی اولرنینگ ایمنی تیزیمی ضعیف‌راق بوله‌دی و کوپینچه کوچه‌لرده اوینشه‌دی.»
شو بیلن بیرگه، شرق زونیده سوو ییتکزیش و فاضلاب منبعلری باش مدیری عبدالله عزام‌نینگ ایتیشیچه، کنر و افغانستان‌نینگ باشقه شهرلریده آقاوه سوولرنی باشقریش حلی هم تیزیملی روشده عملگه آشیریلمه‌گن، بیراق بو حالت‌نی یخشی‌لش بوییچه ایشلر آلیب باریلماقده. اونینگ فکریچه: «کنرده آقاوه سوولرنی باشقریش حاضرچه تیزیملی و قبول قیلینگن شکلده عملگه آشیریلمه‌گن. اما افغانستان اسلام امیرلیگی‌نینگ دولت سوو تأمیناتی و فاضلاب کمپنیه‌سی نه‌فقط کنرده، بلکی برچه کتته و کیچیک شهرلرده آقاوه سوولرنی یخشی‌راق باشقریش میکانیزیمینی یره‌تیش اوستیده ایش باشله‌گن. بو آرقه‌لی شهرلرده آقاوه سوولردن کیلیب چیقه‌دیگن معمالرنینگ آلدینی آلیش مقصد قیلینگن.»
افغانستان‌نینگ کوپلب حدودلریده ترتیبلی و کینگ قمراولی شهری فاضلاب تیزیمی‌نینگ یوقلیگی شهر باشقرووی و اطراف-محیط سلامت‌لیگی ساحه‌سیده جدی معمالردن بیری حسابلنه‌دی.
