بغلان مرکزی پلخمری شهری منطقهلریدن قطاریده، ایچیملیک سوو کملیگی یشاوچیلرنینگ جدی قیینچیلیکلریدن بیریگه اوزگرگن. محل یشاوچیلرنینگ ایتیشلریچه، بو قیینچیلیک کوندهلیک حیاتلریگه تاثیر قیلیب و اولرنی تازه بولمهگن سوو منبعلریدن فایدهلنیشگه مجبور ایتگن.
پلخمری شهری کرکر، سیلو، زمانخان و چشمهشیر منطقهلر یشاوچیلرینینگ ایتیشلریچه، سوو ییتکزیش ستندرد ترماقلر یوقلیگی سبب، نیازلری بولگن سوونی دریا یا-ده مصئون بولمهگن منبعلردن تامینلشگه مجبورلر که بو وضعیت، بالهلر و کیکسهلر آرهسیده کسللیکلر کوپهیشی توغریسیده جدی خواطرلرنی یرهتگن.
چشمهشیر منطقه یشاوچیلریدن بشیرنینگ ایتیشیچه، عایلهسی ایچیملیک سوو یوقلیگی سبب، دریا سوویدن فایدهلنیشگه مجبور بولگن. اونگه کوره: «بو منطقهده ایچیملیک سوو کملیگی بیلن روپهره بولیب و دریا سوویدن فایدهلنیشگه مجبورمیز. اوشبو موضوع سبب بالهلر و حتا کیکسهلردن قطاری تورلیخیل کسللیکلرگه چلینگنلر.»
پلخمری شهری سیلو منطقهسیدهگی یشاوچیلر هم بو کبی وضعیتنی تجربه قیلماقده. مذکور منطقه یشاوچیلریدن بیری رحمتاللهنینگ ایتیشیچه، سوو ییتکزیش قوریلمهلردن قطاری اوتگن ییللرده یوز بیرگن سوو تاشقینلر نتیجهسیده بوزیلیب و حاضرگچه قیته قوریلمهگن.
اونگه کوره، مذکور وضعیت سبب اهالی حاضرگچه تازه بولمهگن سوولردن فایدهلنهدی. «سوو تاشقینلر یوز بیرگنیده، اوشه بار آز ایچیملیک سوو هم اورتهدن کیتدی. حاضر دریا سوویدن فایدهلنهمیز که بالهلریمیزنینگ تورلیخیل کسللیکلرگه چلینیشیگه سبب بولگن.»
شونینگدیک بغلان یشاوچیلریدن باشقه بیری زینالدین، سوو ییتکزیش ترماقدن فایدهلنه آلمسلیکنی منطقهلریدهگی جدی قیینچیلیکلردن عنوان قیلهدی. اونینگ ایتیشیچه، نیچه مرته اوشبو قیینچیلیکنی مسئوللر بیلن جریان گه قویگنلر، لیکن حاضرگچه اقدام بولمهگن.
اونینگ اروغولشیچه، تازه بولمهگن سوولردن فایدهلنیش اوزی و عایلهسی آرهسیده ساغلیق قیینچیلیکلرگه سبب بولگن. «ایچیملیک سوو توغریسیده قیینچیلیکلریمیز حل بولیشی اوچون بیر قطار ایستهکلریمیز بار ایدی، لیکن حاضرگچه اقدام بولمهگن. شونینگدیک اوزیم اوشبو سوولردن فایدهلنیش سبب نیچه مرته کسل بولدیم.»
باشقه بیرتاماندن، محلی مسئوللر سوو ییتکزیش بولیمیده لایحهلردن قطارینینگ عملگه آشیریلیشینی تیلگه کیلتیرهدیلر. بغلان قیشلاقلرنی رواجلنتیریش و قیته قوریش ریاستی مهندسلیک خذمتلر بولیمی مسئولی وسیم رشیدینینگ ایتیشیچه، اوتگن ییل اوشبو ولایتنینگ تورلی بولیملریده ۳۰ دن آرتیق سوو ییتکزیش ترماق قوریلیب و اهالینینگ ایچیملیک سوودن فایدهلنیش امکانیتی آشیشی اوچون سعیوحرکتلر دوام قیلماقده.
اونگه کوره، جاری ییلده هم بیر قطار ینگی لایحه عملگه آشیریلماقده. «بغلان ولایتینینگ ۱۵ تومنیده سولر سیستمی بیلن ۳۵ ته سوو ییتکزیش ترماق عملگه آشیریلماقده. اولردن قطارینینگ ایشی یکونلهنیب و بیر قطارینینگ ایشی دوام قیلماقده که ۲۴ مینگدن آرتیق کیشی توغری شکلده اوندن فایدهلنهدیلر.»
مذکور لایحهلر بولگنی بیلن، ینه هم بغلاننینگ منطقهلریدن قطاری یشاوچیلری ایچیملیک سوو یوقلیگیدن شکایت قیلیب و ایتیشلریچه، برقرار و فایدهلنیش امکانیتیگه ایگه ترماقلر قوریلگنیگه قدر، ساغلام بولمهگن منبعلردن فایدهلنیشنینگ دوام قیلیشی ممکن.
