برشنا شرکتی جاری ییل ۲۰- حمل ده کابل ده برق خره‌جت بلی آیلیک بولگنی نی اعلام قیلدی. گرچند پایتخت یشاوچی‌لری برق بلی آیلیک بولیشی بیلن برق خره‌جتی کمه‌یشی نی کوتیب تورگن ایدیلر، بیراق حاضر برق بلی نی قولگه کیلتیریش بیلن، برشنا نینگ قراری دن شکایت قیلیشگن.
پایتخت یشاوچی‌لری نینگ ایتیش‌لریچه، برق بل‌لری اوتگن آی‌لرگه نسبتن نیچه برابر بولگن، بیراق برشنا شرکتی مذکور پروسه آیلیک بولیشی بیلن، برق خره‌جتی کم بولیشی توغریسیده وعده بیرگن ایدی.
کابل یشاوچی‌لری نینگ ایتیش‌لریچه، اوتمیش دوره‌لرده ایکی آیده برق خره‌جت‌لری ۲ مینگ افغانی گچه کیله‌دی ایکن، بیراق حاضر ینگی بل ده بو رقم ۸ الی ۱۰ مینگ افغانی گه ییتیشگن.
کابل یشاوچی‌لری برق خره‌جت‌لری یوقاری کیتگنی توغریسیده منطقی بیر دلیل سوره‌گن بیرحالده، برشنا شرکتی نینگ ایتیشیچه، برق خره‌جتی گه هیچ قنده‌ی اوزگریش کیلمه‌گن و یالغیز برق بلی نینگ کتگوری‌سیده اوزگریشلیک کیلگن.
برشنا شرکت سوزلاوچیسی سنگر نیازی نینگ ایتیشیچه، بوندن کیین صفر دن ۱۰۰ کیلووات گچه هر بیر کیلووات ۲.۵ افغانی حسابلنه‌دی، بیراق اوتمیش ده صفر دن ۲۰۰ کیلووات گچه هر بیر کیلووات ۲.۵ افغانی حسابلنه‌دی ایکن.
برشنا شرکت مسئوللری نینگ ایتیش‌لریچه، ایشلاوچیلر کوپه‌یگنی، اداری خره‌جتلر یوقاری بولگنی و بو شرکت گه تجهیزات ساتیب آلینگنی باعث، برق بلی نینگ کتگوری‌سیده اوزگریشلیک کیلگن.
شونینگدیک اولرنینگ ایتیش‌لریچه، افغانستان برق نی قوشنی مملکت‌لردن ساتیب آلیشی باعث، برشنا شرکتی تعیین‌لنگن زمان ده مذکور مملکت‌لرنینگ پول‌لرینی توله‌شی کیره‌ک. شو یوزه‌دن برق بلی آیلیک شکلده توله‌نیشی، برشنا شرکتی نینگ جریمه توله‌شدن معاف قیله‌دی.
