آنلاین شکلده تعلیم آلهدیگن کابل شهریدهگی یاشلردن قطاری، برق پرچاویسینینگ اوقیشلری جریانیگه تاثیر قویگنیدن خواطرلنگنلر. اولرنینگ ایتیشلریچه، برق کیسیلیشی اینترنت باغلهنیشیده قیینچیلیک چیقیشی، تلیفونلری و کمپیوترلرینینگ شارژی بیتیشی و حتا درسلرینینگ بیر بولیمینی قولدن بیریشلریگه سبب بولهدی که بو قیینچیلیکلر ایسه اولرگه اورگهنیش امکانیتلرینی چیکلنتیرگن. ایش بیلرمانلرنینگ اورغولشیچه، اوشبو حالت دوامی تعلیم صفتینی کمهیتیریشدن تشقری، یاشلرنینگ اوقیشگه بولگن قیزیقیشی همده متخصص کوچلر رواجلنیشیگه سلبی تاثیر قویهدی.
اوشبو گزارشده، یاشلردن قطاری برق کیلیب-کیتیشی نتیجهسیده تعلیم آلیشلری جریانینینگ بوزیلگنی یانیده، تکنالوژی واسطهلریدن فایدهلنیش و وقتیده قول تاپیش توغریسیدهگی قیینچیلیکلردن هم شکایت قیلهدیلر. کابل شهری تورتینچی ناحیه یشاوچیسی همده آنلاین بیلیم یورتلردن بیریده اقتصاد فاکولتهسی طلبهسی بولمیش ۲۲ یاشر نصرتالله حمیدینینگ ایتیشیچه، برق یوقلیگی سبب نیچه مرته صنفلرگه شرکت قیله آلمهی و مهم بولگن درسلردن بیر قسمینی قولدن بیرگن. «تورت یا-ده بیش کریدیت بولگن درسلرنی قولدن بیرگنمین. بو قیینچیلیکلر برق یوقلیگی سبب اورته گه کیلگن؛ چونکه یا تلیفونیم شارژی بیتگن یا-ده لپتاپیم اوچیب قالگن.»
برق چاویسی طفیلی قیینچیلیکلر یالغیز درسی صنفلرنینگ قولدن بیریش بیلن چیکلنمهیدی؛ اینترنت کیسیلیشی، برقی اوسکونهلرنینگ اوچیب قالیشی و تکنالوژیدن فایدهلنیشنینگ قیینلنیشی، یاشلرنینگ تعلیم آلیش جریانینی قیینچیلیکلر بیلن روپهره قیلگن باشقه قیینچیلیکلردن دیر. کابل شهری ۱۵-ناحیه یشاوچیسی و قریب بیر ییلدن بیری انگلیزچهنی آنلاین شکلده اوقهدیگن ۲۳ یاشر ظریف ابراهیمخیل همده آنلاین شکلده خبرچیلیکنی اوقهدیگن ۲۳ یاشر صبیحه عظیمینینگ ایتیشلریچه، برق پرچاویسی پ اینترنت کیسیلگنی، نیچه مرته آنلاین صنفلرگه کیره آلمسلیکلریگه سبب بولگن.
ظریف ابراهیمخیلنینگ ایتیشیچه: «برق کیسیلگنیده قرانغولیک کبی قیینچیلیکلر بیلن روپهره بولهمیز؛ چونکه تصویری شکلده درس اوقهمیز. بعضا هم برق یوقلیگیده وایفای یاقیلمهیدی. مذکور جودهیم سلبی تاثیرلر رواجلنمسلیگیمیزگه سبب بولهدی.»
شونینگدیک صبیحه عظیمیگه کوره: «اوزیم نیچه مرته برق کیسیلیشی یا-ده تلیفونیمنینگ شارژی بیتیشی سبب صنفدن چیقدیم یا-ده هیچ صنفگه کیره آلمهدیم. بو موضوع سبب درسلریمدن بیر قسمینی قولدن بیریب و اونینگ جبران قیلیش اوچون کوپراق مطالعه قیلدیم؛ چونکه اوقیتووچی بیر موضوعنی صنفده بیان قیلگنیده، ذهنده یخشیراق قالهدی.»
باشقه بیرتاماندن یاشلردن قطاری، برقرار برقدن فایدهلنه آلمهی آنلاین تعلیمگه دوام بیریشنینگ قیین بولگنینی بیان قیلیب و مسئوللردن، برق تامینلنیشی و کیرهکلی امکانیتلر یرهتیلیشی بیلن، اولرگه اوزلوکسیز تعلیم زمینهسینینگ یرهتیشلرینی ایستهگنلر.
کابل شهری بیرینچی ناحیه یشاوچیسی و آنلاین مکتبلردن بیریده ۱۲-صنف اوقووچیسی بولمیش ۱۸ یاشر فاطمه بهادینینگ ایتیشیچه، برق یوقلیگی یاشلرنینگ تعلیم توغریسیدهگی قیزیقیشینی کمهیتیرگن. «برق یوقلیگی قیزیقیشیمیز کمهیشی و برنامهلریمیز بوزیلیشیگه سبب بولگن و تحصیلی کیلهجگیمیز خصوصیده خواطرلریمیز جودهیم کوپهیگن. انه شوو سبب، اینیقسه یاشلر نسل اوچون برقرار برق امکانیتی یرهتیلیشی، اینترنت سرعتی یخشیلنیشی و تعلیم بوییچه ییترلی امکانیتلر یرهتیلیشینی کوتهمن.»
تعلیم و تربیه بوییچه ایش بیلرمانلرنینگ ایشانچیگه کوره، برقرار برق یوقلیگی و اینترنتدن آزراق فایدهلنیش، افغانستان ده آنلاین تعلیمنی جدی قیینچیلیکلر بیلن روپهره قیلگن. بو توغریده تعلیم و تربیه ایش بیلرمانلریدن جمالالدین سلیمانینینگ ایتیشیچه: «افغانستان ده برقرار برق یوقلیگی و دایمی اینترنت یوقلیگی یا-ده قیمتی یوقاریلیگی، آنلاین تعلیمنینگ کوپینچه قیینچیلیکلر بیلن روپهره بولیشیگه سبب بولگن. مذکور قیینچیلیک بعضا آنلاین تعلیمگه دوام بیریش توغریسیده قیزیقمسلیک و صنفلرگه کیرمسلیککه سبب بولهدی.»
باشقه بیرتاماندن، جمعیتشناسلرنینگ ایتیشلریچه، بو وضعیت دوامی یالغیز تعلیم جریانیگه تاثیر قویمهیدی، بلکیم متخصص کوچ کیلهجگی و جمعیتنینگ رواجلنیش جریانینی هم قیینچیلیک بیلن روپهره قیلهدی. جمعیتشناسلردن شعیب احمدینینگ ایتیشیچه، ییترلی برق تامینلنمهگنی صورتده، رواجلنیش سری جمعیت حرکتینینگ سیکینلشیش بیلن روپهره بولیشی ممکن. «برق یوقلیگی انسانی سرمایه و متخصص کوچلر کمهیشی کبی قیینچیلیکلرنینگ کوپهیتیریشی ممکن. تدقیقات بولیمی، تعلیم و تخصصی فعالیتلرده ایشلهیدیگن کیشیلر، برق و دیجیتال امکانیتلریگه نیازلری بار. اوشبو امکانیتلر یرهتیلمهگنی صورتده، اولرنینگ قیزیقیشی کمهیب و شونینگدیک جمعیتهم ملکهلی کوچلر رواجلنیشیدن محروم بولهدی.»
شوندهی بیرحالده، افغانستان برق ییتکزیش شرکت (برشنا) سوزلاوچیسی محمدصادق حقپرستنینگ ایتیشیچه، بار برقنینگ کملیگی سببی، مملکت نیازی بیلن موجود برق میزانی آرهسیدهگی فاصله دیر و انه شوو باعث، گوجوملی شهرلر اینیقسه کابل کوپینچه پرچاویلر بیلن روپهره دیر. «کابل شهری قریب ۷۰۰ مگاوات برققه نیازی بار؛ شوندهی بیرحالده، کابل اوچون قریب ۳۵۰ مگاوات برق بار. شونی اوچون کابل و ننگرهار ده برق پرچاویسی کوپراق دیر؛ چونکه مذکور ایکی ولایتده جمعیت کوپ دیر. افغانستان ده قریب ۱۷ لایحه قولگه آلینگن و اونینگ توغریسیده ایشنینگ دوامی بار. بو ایش بیر هفته و بیر آینینگ ایشی ایمس.»
افغانستان ییللردن بویان برق کملیگی بیلن روپهره بولگن دیر. حاضر ایسه قریب تورت مینگ مگاوات برققه نیاز بار، بیراق یالغیز قریب ۷۵۰ مگاوات برق اختیاریگه دیر. اصلی نیازمندلیک و بار برق آرهسیدهگی فاصله، مملکتده برق پرچاویسی اصلی عامللریدن حسابلنهدی که بو قیینچیلیک یشاوچیلرنینگ کوندهلیک حیاتلریگه علاوه، آنلاین تعلیم، تحصیل و تکنالوژی گه یاشلرنینگ فایدهلنیش جریانینی جدی قیینچیلیکلر بیلن روپهره قیلگن.
