بوگون ۳۰-جدی، یکشنبه، سرپرست حکومت عالی محکمهسی مسئوللرینینگ ایتیشلریچه، اوشبو محکمه اداری اورینباسری عبدالمالک حقانی ییتکچیلیگیده عالی محکمه قضایی هیئتی، ایران گه قیلگن سفریده، مذکور مملکت قوهی قضاییه انسان حقلری و خلقارا ایشلری بوییچه اورینباسری کاظم غریبآبادی بیلن اوچرهشگن.
عالی محکمهنینگ ییتکرمهلر، عامه و تشقی علاقهلر باشلیغی عبدالرحیم راشد گه کوره، بو اوچرهشووده اوشبو محکمهنینگ اداری اورینباسری ایران رسمیلریدن، ایران دهگی افغانستانلیک محبوسلر اینیقسه دارگه آسیلیشگه محکوم بولگن محبوسلر فهرستینی افغانستان بیلن شریک بولینیشینی ایستهگن. راشدنینگ ایتیشیچه، عالی محکمه اداری اورینباسری شونینگدیک ایران رسمیلریدن، افغانستانلیک محبوسلرنینگ دارگه آسیلیشی آلدی آلینیشی اوچون باشقه چاره کوریلیشینی ایستهگن.
بیزلرنینگ «ایکس» ترماغی ده هم تعقیب قیلینگ!
اونینگ کوپهیتیریشیچه: «عالی محکمه اداری اورینباسری شیخ عبدالمالک حقاتی ییتکچیلیگیده قضایی هیئتی، ایران گه قیلگن سفریده بو مملکتنینگ قوهی قضاییه خلقارا ایشلری بوییچه اورینباسری کاظم غریبآبادی بیلن اوچرهشگن و بو اوچرهشووده قضایی همکارلیکلر کوچهیشی و دارگه آسیلیشگه محکوم بولگن افغانستانلیکلر خصوصیده صحبت قیلیب و ایران دن اسلامی قاعده-قانون اساسیده، دارگه آسیلیشگه محکوم بولگن افغانستانلیکلر گه یوموشاقلیک کورستیب و دارگه آسیلیش اورنیده باشقه یوللرنینگ اختریلیشینی ایستهگن.»
شونینگدیک عبدالمالک حقانی، ایران ده افغانستانلیک قاچقینلر حقلریگه اشاره قیلیب اورغولشیچه، اولر گه تعلیم، ایش و باشقه حقلر زمینهسی یرهتیلیب، محاکمه بولمسدن اولرنینگ آزار و اذیت و قولگه آلینمسلیگی کیرهک.
بیزلرنینگ فیسبوک صحیفهمیزگه باش اورینگ!
ایراننینگ قوهی قضاییه انسان حقلری و خلقارا ایشلری بوییچه اورینباسری، عالی محکمهدن نقل قیلیب ایتیشیچه، اینگ یقینده افغانستانلیک ۱۵۰۰ محبوس افغانستان گه انتقال بیریلیشی ممکن. بوندن آلدین ایران ده انسان حقلری تشکیلاتی، ۲۰۲۴-ییل باش ۱۰ آییده، ایران افغانستانلیک ۴۹ کیشینینگ دارگه آسگنینی بیان قیلگن ایدی.