خلقارا بیوه عیاللر کونی بیلن بیرگه، افغانستان ده تورموش اورتاقلرینی قولدن بیرگن عیاللردن قطارینینگ ایتیشلریچه، اقتصادی قیینچیلیکلر، اجتماعی چیکلاولر و ایش امکانیتلری کملیگی بیلن روپهرهلر.
کابل شهری ۱۱-ناحیه یشاوچیسی بولمیش زینبنینگ ایتیشیچه، تورت ییل آلدین تورموش اورتاغی اولیب و کوپینچه قیینچیلیک جملهدن ایش امکانیتلری یوقلیگی بیلن روپهره دیر. «تورموش اورتاغیم کسللیک سبب وفات قیلدی. ایکی بالهمنینگ سرپرستلیگی بوینیمگه قالدی و بو مدتده کوپینچه قیینچیلیک بیلن روپهره بولگنمیز. بالهلریم نفقهسینی تامینلش مقصد ایشلهیمن.»
شونینگدیک هرات یشاوچیسی بولمیش نازنیننینگ ایتیشیچه، تورموش اورتاغی اولگنیدن کیین کوپینچه اقتصادی و اجتماعی قیینچیلیکلر بیلن دوچ کیلگن. «بیش بالهم بار. حتا یقینداشلریمیزدن اوشبو ییتیم بالهلرنی حمایت قیلینگلر دیگنیمده، اوزیمیزده هم بالهمیز بار دیهدیلر.»
کاپیسا یشاوچیسی بولمیش زهره، عیاللر اوچون ایش فرصتلری کملیگی و اقتصادی قیینچیلیکلرگه اشاره قیلیب، مسئوللردن بیوه عیاللر وضعیتیگه کوپراق اعتبار قرهتیلیشینی سورهگن. «تیکووچیلیک قیلیب عایلهم نفقهسینی تامینلهیمن و بالهلریمنینگ مکتب باریش خرهجتینی تولهیمن؛ بیراق حیاتنینگ برچه نیازلری و خرهجتلرینی تامینلش کوپ قیین دیر. حکومتدن بیوه عیاللر و ییتیملر قیینچیلیکلرینی حل قیلیب و اولرنینگ حمایت قیلیشلرینی سورهیمن.»
شونینگدیک لوگر یشاوچیسی بولمیش عزیزهنینگ ایتیشیچه: «آلتیته بالهم بار و تورموش اورتاغیم اولگنیدن بیر ییل بولگن. معارف بولیمیده بیر اوقیتووچی صفتیده ایشلهیمن. باریب-کیلیش یولی اوزاق دیر و آیلیگیم هم جوده آز دیر؛ انه شوو سبب کوپینچه قیینچیلیک بیلن روپهرهمیز.»
شوندهی بیرحالده، اسلام امیرلیگی شهیدلر و ناگرانلر وزیرلیگی مسئوللرینینگ ایتیشلریچه، مملکت بویلب ۱۰۱ مینگ ۶۵۲ بیوه عیال ثبت بولگن.
مذکور وزیرلیک سوزلاوچیسی فیصل خاموشنینگ ایتیشیچه: «مملکت بویلب شهیدلر و ناگرانلر وزیرلیگی ۱۰۱ مینگ ۶۵۲ بیوه عیالنی ثبت قیلگن. اوشبو رقم اسلام امیرلیگی شهیدلری بیوهلری، ملکی شهیدلر بیوهلری و شونینگدیک آلدینگی ادارهلر خادملری و حربیلری بیوهلریدن عبارت دیر.»
شونینگدیک بیرلشگن ملتلر تشکیلاتی، خلقارا بیوه عیاللر کونی مناسبتی بیلن اعلام قیلیشیچه، بیوه عیاللر رواجلنه یاتگن مملکتلرده قشاقلیک، زورهوانلیک، ساغلیقنی سقلش بیلن باغلیق معمالر همده اوروش و توقنشوولرنینگ عاقبتلری کبی قیینچیلیکلر بیلن روپهرهلر.
بیرلشگن ملتلر تشکیلاتی میلادی ۲۰۱۱-ییلدن بویان، بیوه عیاللر سیسلری، تجربهلری و نیازلریگه دنیا توجهسینی جلب قیلیش مقصد، ۲۳-جوننی خلقارا بیوه عیاللر کونی صفتیده نشانلهیدی.
