یازنینگ ایسیق کونیده، جزیرمه قویاش آستیده ۱۶ یاشلی نگاره فرغانه ولایتینینگ قیشلاقلریدن بیریده شفتالی تیرماقده. جزیرمه ایسیق اونی بیزاوته قیلهیاتگنی یوق. او اویلهیاتگن یگانه نرسه-اوکهلری و سینگلیسی اوچون آزگینه بولسه-ده پول ایشلش.
نگاره، اونینگ اوکهلری و سینگلیسی آته-آنهسی اجرهشگنیدن سۉنگ تاجیکستاندن اۉزبېکستان گه قیتریلگن. اولرنینگ آنهسی قماقده، آتهسی اېسه باشقه عایله قورگن. او تاجیکستانده ایشلهیدی، لېکن بالهلرگه هېچ قندهی مادّی یاردم کورستمهیدی. حاضر نگاره، اونینگ اوکهلری و سینگلیسی اوچ خانهلی کیچکینه اویده بوویسی همده تاغهلرینینگ عایلهلری بیلن استقامت قیلیشهدی.
نگارهنینگ کوزلری غمگین، او کم گپیرهدی. «اۉزبېکستان گه کېلگنیمیزدن بېری دهدم فقط ایکّی مرته بیزگه قونغیراق قیلدی. اونگه هم انچه وقت بولدی. آنمنی ساغیندیم، اونی ېنه کوریشنی اېستهیمن.»
او اېندیگنه اۉزبېکستان گه قیتگنیده محلی تیلده سۉزلشیشدن قورقیش و دوستلرینینگ یوقلیگی اوچون مکتب گه باریشنی اېستمهیدی. «مین لاتین الفباسینی بیلمهی من، فقط کِریلچهنی اوقی آلهمن دیېدی، او قیغو بیلن.»
بیزلرنینگ فیسبوک صحیفهمیزگه باش اورینگ!
قرینداشلر جندر اساسیده اورنهشیب قالگن توشینچهلریگه کوره قیزلر گه اویدن تشقریده تعلیم آلیش و ایشلش ضرور اېمس دیگن نقطهی نظردن نگارهنینگ تعلیم آلیشی توغریسیده قیغورهدیلر. اونینگ ۱۳ یاشلی سینگلیسی ینگی عایله اعضالری بیلن تیل تاپیشه آلمهدی، چونکه آنهلرینینگ تقدیری طفیلی قرینداشلر بالهلر گه باشقچه مناسبتده بولیشدی. کیچیکنه اویده کوپچیلیک بیلن یشش اونده حسی استرسنی کېلتیریب چیقرهدی، او کوپ جنجللشردی، ییغلردی و حتا که کوچیب کېتماقچی بولدی.
هنوزگچه احوال یخشی اېمس. بالهلرنینگ تاغهسی بعضن الکولی ایچیملیک ایچهدی و اوریشهدی. بالهلر اوندن قورقیشهدی: «اگر بیز اونی بیزاوته قیلسک یاکه اونگه گپ قیترسک، او بقیرهدی و بیزنی اورماقچی بولهدی، اما بوگونگی کونگچه بوندهی بولمهدی»، دیېدی نگاره پیچرلب. اوچ یاشلی اوکهسی اکمل کوپینچه آته-آنهسی حقیده سورهیدی. تینگداشلری آته-آنهلری تامان یوگیرهیاتگنینی کورگچ، ییغلهی باشلهیدی و آته-آنهسی قییرده اېکنلیگینی سورهیدی.
بختلی و مهربان عایلهده کتّه بولیش هر بیر بالهنینگ حقوقیدیر، لېکن نگاره اونینگ اوکهلری و سینگلیسی بوندهی امکانیت گه ایگه بولمهدی.
یونیسف و اروپا اتفاقی عملگه آشیرهیاتگن «جنوبی-شرقی، جنوبی و مرکزی آسیاده مهاجرت تأثیریده بولگن بالهلرنی حمایه قیلیش» لایحهسی دایرهسیده عایله گه باغلنگن اجتماعی خادم بالهلر گه ینگی محیط گه ماسلهشیش گه یاردم بیرماقده. اونینگ سعی-حرکتلری طفیلی نگارهنینگ بوویسی بالهلر گه رسمی قوریقچیلیک اېتیب تعیینلندی و ایکّی کیچیک نبیرهسی اوچون نفقه آلیش حقوقی گه اېگه بولدی. عایله دولت تامانیدن قۉللب-قوتلندی و اجتماعی خادمنینگ کمگی بیلن آپه-سینگیللر مکتب گه اوقی باشلهدیلر. نگارهنینگ بوویسی و تاغهلرینینگ بالهلری اونگه لاتین الفباسینی اورگهنیشده یاردم بیریشدی. اولیگه نگاره اوقیش و ملاقات قیلیشده قینلدی، لېکن بیر آز وقت اوتگچ، او اۉزبېک تیلیده کتابلرنی اوقیشنی باشلهدی، دوستلر آرتیردی و منتظم روشده مکتب گه باردی. کیچیک اکهسی اکمل بالهلر باغچهسیگه باریش اوچون برچه کېرهکلی اېملشلر قیلیندی، او ییرده او جوده فعال و دوستانه باله گه اېلندی.
بیزلرنینگ «ایکس» ترماغی ده هم تعقیب قیلینگ!
کرونا سببلی مکتبلر یاپیلگنیدن سۉنگ بالهلرنینگ اوقیشی توختهتیلدی. نگاره آنلاین اوقی آلمهدی، شونینگ اوچون مکتب مشغولاتلری وقتیده خالهلریگه شفتالی تیریش گه یاردم بیریب، کونیگه تورت مینگ ۵۰۰ سومدن پول ایشلهدی. پول تولنهدیگن مذکور ایشدن تشقری و ېنه آوقت پیشیردی، اویلرنی تازهلهدی، اوکهلری و سینگلیسینی پرورش قیلهدی.
نگاره اوسمیر وقتیدهیاق آته-آنهلرنینگ وظیفهلری اونینگ زمهسیگه توشدی. او نهفقط بالهلیکدن، بلکه اوقیش امکانیتیدن هم محروم بولدی. اونینگ اۉز آته-آنهسی یوقلیگی و آنه وظیفهسینی بجریش اوچون جوده یاش اېکنلیگی اوچون اکهسینینگ تربیهسینی عدهلهی آلهدی دیب اویلش ناتوغری. نگاره، اوکهلری و سینگلیسی اکمل بیلن اوینش یاقسه-ده، اولرنینگ مهری آته-آنه مهرینینگ اورنینی باسه آلمهیدی.
اجتماعی خادم عایله گه قیینچیلیکلرنی یېنگیشده، نگاره اوقیشنی دوام اېتّیریشیده اولرنی قۉللب-قوتلب ایشلشنی دوام اېتّیرماقده. قیین بالهلیگیگه قرهمهی نگاره تیکووچی بولیش آرزوسیگه اېنتیلدی. سینگلیسی اوندن اورنک الماقده. آپه-سینگیل اولرنینگ کونگلینی کوتریش اوچون هفتهده بیر مرته قونغیراق قیلهیاتگن آنهسی بیلن دیدار کوریشیش گه امید قیلیشهدی. توشهیاتگن یولدوزنی کوتیب، آسمانگه تیکیلر اېکن، «مین آنمنینگ قیتیب کېلیشینی اېستهیمن… فقط شونی آرزو قیلهمن» دیب شیویرلهیدی نگاره.
نگاره حقیدهگی مذکور حکایه آته-آنهنینگ یوقلیگی عایلهده بالهلر اوچون کتّه خوف توغدیریشی و اوی ایشلرینینگ حجمی آشیشی، همده کیچیک اکه-سینگیللری اوچون مسئولیت طفیلی اېرته یاشده اولغهیشگه آلیب کېلیشی ممکنلیگیگه مثال بوله آلهدی. شونینگدیک، بو اولرنینگ جسمانی رواجلنیشی، آزیقلنیشی، اوقیشینینگ ثمرهدارلیگیگه تأثیر قیلیشی، سلبی تجربه و توشکونلیکنی کېلتیریب چیقریشی ممکن. باله حقوقلری توغریسیدهگی کنوانسیونده اېتیلگنیدیک: «اۉزینینگ شخصیتینینگ تولیق و اویغون رواجلنیشی اوچون باله عایلهوی محیطده، بخت، محبت و توشینیش محیطیده اوسیشی کېرهک.»
اوشبو حکایه اروپا اتفاقی و یونیسف تامانیدن مالیهلشتیریلگن «جنوبی-شرقی، جنوبی و مرکزی آسیاده مهاجرت تأثیریده بولگن بالهلرنی حمایه قیلیش» منطقهلر ارا لایحه دایرهسیده عملگه آشیریلگن ایشنی عکس اېتّیرهدی.
اۉگیرووچی: نصرتالله احدی
