جوزجان ولایتیدن ایشانچلی امنیتی بیر منبع نینگ ایتیشیچه، طالبان بوگون ایرته‌لب گروهی هجوم اویوشتیریش بیلن جوزجان قماقخانه‌سی نینگ نظارت گه آلگن و تورلی جرم‌لر باعث حبس بولگن بیر مینگ محبوس نی قوییب یوبارگن.
اوشبو منبع گه کوره، اوروش حاضر ملی خوفسیزلیک ریاستی و مارشال عبدالرشید دوستم نینگ اویی نی یقیین‌لیگیده‌گی ۵ صد فامیلی منطقه‌سیده دوامی بار.
باشقه بیر تاماندن طالبان اوتگن کیچه نیچه تاماندن بدخشان مرکزی فیض‌آباد شهری اوستیگه هجوم قیلگن، بیراق امنیتی کوچلر اولرنینگ هجومی نی آرقه گه اورگن.
بیزلرنینگ فیسبوک صحیفه‌میزگه باش اورینگ!
امنیتی بیر منبع نینگ ایتیشیچه، بو آتیشمه‌ده ۳۵ طالب هلاک و بو گروه قومندان‌لریدن بیری مولوی عتیق شامل باشقه ۲۰ طالب ایسه یره‌لنگن.
بدخشان حاکمی احمدبشیر صمیم بیر پیام ترقه‌تیب ایتیشیچه، طالبان هجومی آرقه گه اوریلگن و امنیتی کوچلر طالبان نینگ شهر اطرافیدن اوزاق‌لشتیریش اوچون سعی و حرکت قیلماقده.
عین حالده، ملی مدافعه وزیرلیگی نینگ ایتیشیچه، اوتگن ۲۴ ساعت ده مملکتده ۳۸۵ طالب هلاک و ۲۱۰ طالب ایسه یره‌لنگن.
مدافعه وزیرلیگی گه کوره، طالبان آرقه‌لی یوللرده کومیلگن ۱۳ ماین امنیتی کوچلر آرقه‌لی کشف و خنثا ایتیلگن.
شونده‌ی بیرحالده، طالبان گروهی اوتگن کون نیمروز مرکزی زرنج شهری نی نظارتگه آلگن ایدی.
