هرات ده جاری ییل میزان آیی‌ده یوز بیرگن زلزلهلردن زیان کوریب و حاضرگچه چادر‌لر آستیده حیات کیچیره‌دیگنلردن قطاری نینگ ایتیشلریچه، ایسیتغیچ، ساغلیق و کییم-کیچک امکانیت‌لریدن آزراق فایده‌لنیب و حاضرگچه مسئول نهاد‌لر هم اولر گه اونچه‌لیک اعتبار قره‌تمه‌گن.
هرات ولایتی زنده‌جان تومنی میزمیزک قیشلاغی یشاوچیلری نینگ ایتیشلریچه، قیش موسومی‌ده ایسیتغیچ امکانیتی یوقلیگی بیلن چادر‌لر آستیده حیات کیچیریش، جوده‌یم قیین دیر.
بیزلرنینگ فیسبوک صحیفه‌میزگه باش اورینگ!
زنده‌جان تومنی میزمیزک قیشلاغی یشاوچیلریدن بیری ابراهیم، آلتی بالهسی بیلن ساووق هوا‌ده چادر آستیده حیات کیچیریشی نی بیان قیلیب ایتیشیچه: «برچه یشش اوی‌لر بوزیلیب و یشاوچیلر چادر آستیده حیات کیچیره‌دی. بیز سکیز کیشی‌میز، حاضرگچه تاش کومیر بیزلر گه ییتیشمه‌گن و تیکان و اوتین نی توپلب، یاقه‌میز. باله‌لریم کسل بولگن و بیزلر گه یشش اوی توزه‌تیشلری بیللی ایمس.»
شونینگدیک مذکور قیشلاغ یشاوچیلریدن باشقه بیری داوود نینگ ایتیشیچه: «۱۶ کیشی‌میز، اوچ چادر بیرگن‌لر و حاضرگچه باشقه هیچ قنده‌ی یاردم قولگه کیلتیرگنی‌میز یوق. باله‌لریمیز کسل بولگن و شفاکار و دارو هم بیزلردن بیر ساعت اوزاق دیر.»
شونده‌ی بیرحالده، بیرلشگن ملت‌لر تشکیلاتی نینگ رواجلنتیریش برنامه‌سی، اوز ایکس صحیفه‌سیده یازیشیچه، هرات‌ده یوز بیرگن اولیم‌لی زلزلهلردن اوچ آی‌دن آرتیق اوتگنی بیلن، ۳۱ مینگدن آرتیق عایله چادر آستیده حیات کیچیره‌دی.
مذکور نهاد نینگ اورغولشیچه، بو آره‌ده عیاللر سرپرستی بولگن عایله‌لر کوپراق زیان کوره‌دیگن دیر.
هرات ولایتی زنده‌جان تومنی قلعه‌‌جمال منطقه یشاوچیسی بولمیش تورپیکی نینگ سلام‌وطندار گه ایتیشیچه، ۴ بالهسی بیلن صندلی گه یاغاچ یاقیب کیچه‌لر نی اوتکزه‌دی. اونینگ کوپه‌یتیریشیچه: «یریم کیچه‌‌گچه اویقوم کیلمه‌یدی که بو باله‌لریم گه بیران نرسه بولمه‌سین دیب. یاقیلغی ماده و ایسیتغیچ بیزلر گه بیرگنلری یوق. صندلی قویگن‌میز که باله‌لریم کسل بولمه‌سین دیب. کلینیک اوزاق، قیین‌چیلیکلریمیز جوده‌یم کوپ دیر.»
عین حالده، هرات معلومات و مدنیت باشلیغی و زلزله طفیلی زیان کورگنلر گه ایریشیش کمیسیون سوزلاوچیسی احمدالله متقی نینگ ایتیشیچه، حاضرگچه زلزلهدن زیان کورگنلر گه ۳ مینگ ۶۳۳ یشش اوی قوریلگن که، اوشبو یشش اوی‌لردن ۵۰ فایزی ترقه‌تیلیب و قالگنی ایسه ترقه‌تیلماقده دیر.
بیزلرنینگ «ایکس» ترماغی ده هم تعقیب قیلینگ!
هرات معلومات و مدنیت باشلیغی و زلزله طفیلی زیان کورگنلر گه ایریشیش کمیسیون سوزلاوچیسی نینگ کوپه‌یتیریشیچه: «هرات ده اولیم‌لی زلزله‌لر یوز بیرگنی‌دن حاضرگچه، زیان کورگن عایله‌لر گه چادر و کانتینر کبی وقتینچه‌لیک اوی‌لر قوریلگن، کیین ایسه اساسی یشش اوی قوریلیش ایشلری باشلنگن که ۳ مینگ ۶۳۳ اوی قوریلدی و اوندن یریمی ترقه‌تیلیب و یریمی ایسه ترقه‌تیلماقده. زیان کورگنلر گه مینگ‌لرچه چادر و اساسی یاردم‌لر ترقه‌تیلگن، قیین‌چیلیک‌لر و اولر نینگ حلی اوچون کوپینچه وقت گه نیاز بار.»
ایتیش کیره‌ک که، بوندن آلدین هم هرات ده زلزلهلردن زیان کورگنلردن قطاری، قیین‌چیلیکلری حل بولمه‌گنی خصوصیده نیچه مرته شکایت قیلگنلر.
