خوست ولایتیده بیر گروه دهقانلرنینگ ایتیشیچه، اولر اوتگن ییللرده ضرور اوروغ و کوچت‌لرنی باشقه ولایت‌لردن آلیب کیلیشگن، بیراق ایریم اوروغ و کوچت‌لر اقلیم همده اطراف-محیط شرایط‌لریده‌گی فرق سببلی کوتیلگن نتیجه‌نی بیرمه‌گن.
خوست ولایتی‌نینگ گربز تومنی دهقانلریدن بیری عبدالروف، ایکینچیلیک اداره‌سی اوشبو ولایت‌نینگ توپراق، اقلیم و اطراف-محیط شرایط‌لریگه ماس کیله‌دیگن اوروغ و کوچت‌لرنی اورگنیشی کیره‌ک، شونده دهقانلر کوپراق حاصل آلیشلری ممکن دییدی.
اونینگ کوپه‌یتیریشیچه، اوزی هم ینگی ایکینچیلیک اوروغ‌لری و نوع‌لریدن جمله‌دن شین‌چای، مالته، پمیدار همده باشقه بیر نیچه تورده‌گی اوسیملیک‌لرنی سینب کورگن، بیراق حاضرگچه کوتیلگن نتیجه گه ایریشه آلمه‌گن. او شونده‌ی دییدی: «ایسته‌گیمیز، اول خوست‌ده سینب کوریلگن حتا بوتون افغانستان‌ده هم سیناودن اوتمه‌گن محصولات و نوع‌لرنی آلیب کیلیشسین. افغانستان‌نینگ کوپلب ولایت‌لریده اقلیم شرایط‌لری بیر-بیریگه اوخشش و کوپلب اوسیملیک‌لر بو ییرده هم یخشی نتیجه بیریشی ممکن. آدملر گه اوشبو ایکینچیلیک مواد و محصولات‌لرینی اول سینب کوریش، کیین ایسه دهقانلر گه تقدیم ایتیش اوچون شرایط یره‌تیش کیره‌ک.»
خوست ولایتیده دهقان جنت‌گل‌نینگ ایتیشیچه، منطقه‌ده دهقانلرنینگ اکثریتی همان عنعنوی اوروغ و کوچت‌لردن فایده‌لنماقده. اونینگ تأکیدلشیچه، بونده‌ی محصولات‌لر ایشلب چیقریش خره‌جت‌لریگه نسبتن ییترلی حاصل بیرمه‌یدی.
اونینگ کوپه‌یتیریشیچه، دهقانلر اقتصادی معمالر سبب باشقه حدودلردن ینگی اوروغ و کوچت‌لرنی ساتیب آلیش همده آلیب کیلیش امکانیگه ایگه ایمس. اونینگ ایتیشیچه، اصلاح قیلینگن اوروغ‌لر عنعنوی اوروغ‌لر گه قره‌گنده کوپراق و صفتلی حاصل بیره‌دی.»
جنت‌گل گه کوره، بیر نیچه ییل اول او اوز پولی‌دن اصلاح قیلینگن بوغدای اوروغینی ساتیب آلیب اونی بیش جریب ییرگه ایککن. نتیجه‌ده آلدینگی ییللر گه نسبتن حاصل قریب ایکی برابر کوپ بولگن. او شونده‌ی دییدی: «اگر بیز گه اصلاح قیلینگن و صفتلی اوروغ همده کوچت‌لر بیریلسه، یعنی خوست‌نینگ اقلیمی و شرایطی گه ماسلشگن، شو ییرنینگ اوزی‌ده ییتیشتیریلگن اوروغ و کوچت‌لر بیریلسه، بو بیز اوچون جوده فایده‌لی بوله‌دی. اولرنینگ حاصلی باشقه محصولات‌لر، بوغدای و عادتی اوروغ‌لر گه قره‌گنده انچه یوقاری بولیشی ممکن.»
کمال، ینه بیر دهقان‌نینگ ایتیشیچه، بعضاً باشقه حدودلردن تیکشیروسیز اوروغ آلیب ایککن دهقانلرنینگ ایکینلری قوریب و نابود بولگن. چونکی اونینگ فکریچه، ایریم اوروغ‌لر خوست‌نینگ توپراغی، سووی و اقلیمی گه ماس کیلمه‌یدی. او شونده‌ی دییدی: «آدملر بوغدای یا کی باشقه درخت و اوسیملیک ایکیشه‌دی، اما او قوریب قاله‌دی. چونکی اونگه دارو-درمان و باشقه پرورش‌لر کیره‌ک بوله‌دی. خوست‌نینگ اقلیمی کوپلب باشقه ولایت‌لردن فرق قیله‌دی. ایریم حدودلرده هوا ساووق‌راق، بو ییرده ایسه ایسیق‌راق. بو فرق اوسیملیک‌لر گه سلبی تأثیر کورسه‌تیشی ممکن.»
شونینگدیک، زراعت ساحه‌سیده بیلرمانلر هم دهقانچیلیک‌نی معیاری‌لشتیریش، حاصل کوپه‌یشی و دهقانلرنی قوللب-قوتلش اوچون تدقیقات فارملرینی تشکیل ایتیشنی مهم دیب بیله‌دیلر.
خوست ولایتی شیخ‌زاید بیلیم یورتی زراعت فاکولته‌سی باغدارچیلیک دیپارتمنتی آمری سیف‌الله منگل‌نینگ ایتیشیچه، تدقیقات فارملریده تورلی خیل کوچت و اوروغ‌لر ییتیشتیریلیب اورگنیله‌دی. مقصد – اینگ یخشی ایکینچیلیک نتیجه‌لرینی دهقانلر اختیاریگه تقدیم ایتیش.
اونینگ کوپه‌یتیریشیچه، اگر دهقانلر اوز ییرلریده اول تدقیق قیلینیب سیناودن اوتکزیلمه‌گن کوچت یا کی اوروغ‌لرنی ایکسه‌لر، آب-هوا، توپراق شرایطی یا کی موسمی کسللیک‌لر اولر گه سلبی تأثیر کورسه‌تیشی ممکن. نتیجه‌ده ایسه، دهقانلر مالیه‌وی ضرر کوریشی احتمالی بار. او شونده‌ی دییدی: «عموماً آلگنده، اگر تدقیقات فارملری، کوچت‌خانه‌لر یا کی اوروغ وکوچت ییتیشتیروچی کمپنیه‌لر بولسه، بولرنینگ برچه‌سی دهقانلرنینگ احوالینی یخشی‌لش اوچون خذمت قیله‌دی. بو مرکزلر آدملرنینگ اینیقسه دهقانلرنینگ کونده‌لیک حیاتینی یخشی‌لش، صفتلی و کوپراق حاصل ییتیشتیریش‌ده مهم رول اوینشی ممکن.»
شونگه قره‌می، خوست ایکینیچلیک، سووغاریش و چارواچیلیک ریاستی مسئوللری، اولر دهقانچیلیک معیاری‌لشتیریش، دهقانلرنی قوللب-قوتلش و حاصل کوپه‌یش مقصدیده ایلک بار اوچته تدقیقات فارمینی تشکیل ایتگنلرینی معلوم قیله‌دی.
اولرنینگ ایتیشیچه، بو فارملرده تورلی خیل میوه‌لی کوچت‌لر، بوغدای، حبوبات ایکینلری و سبزه‌وات‌لرنینگ تورلی نوعلری سیناودن اوتکزیله‌دی. ایجابی نتیجه بیرگن نوعلر تدقیقات‌لر یکونلنگچ، کینگ ترغیب قیلیش و ایکیش اوچون دهقانلر گه تقدیم ایتیله‌دی.
خوست ولایتی ایکینچیلیک ریاستی باشلیغی شیرمحمد ذبیح گه کوره، تدقیقات فارملریده اورگنیله‌یاتگن هر بیر کوچت و اوروغ تورلی جهت‌لردن کوریب چیقیله‌دی؛ جمله‌دن اونینگ خصوصیت‌لری، اقلیم اوزگریشی سببلی یوزه گه کیله‌دیگن کسللیک‌لر و موسمی کسللیک‌لر گه چیده‌ملیک درجه‌سی همده حدودنینگ آب-هوا شرایطی گه ماسلشوچنلیگی تیکشیریله‌دی. او شونده‌ی دییدی: «دهقانلر گه تدقیق قیلینگن و اورگنیلگن، کسللیک‌لری تیکشیریلگن همده حدودنینگ اقلیم و آب-هوا شرایط‌لریگه ماس کیلیشی یا کی کیلمسلیگی انیقلنگن محصولات‌لر تقدیم ایتیله‌دی. بولرنینگ برچه‌سی تیکشیریب چیقیله‌دی و شوندن سونگ اوروغ یا کی کوچت دهقانلر گه بیریله‌دی، اولر اوندن فایده‌لنیشلری ممکن.»
اقلیم اوزگریشی ایکینچیلیک‌نی اولگیدن هم کوپراق توغری اوروغ، کوچت تنلش و محلی شرایط گه ماس اصوللردن فایده‌لنیشگه باغلب قویگن. خوست‌ده‌گی دهقانلرنینگ تجربه‌سی شونی کورسته‌دی کی، سیناودن اوتکزیلمه‌گن و حدودنینگ آب-هوا شرایطی گه ماس کیلمه‌یدیگن اوروغ همده کوچت‌لردن فایده‌لنیش حاصل کوپه‌یشی‌نینگ کمه‌یشی و اقتصادی ضرر کوریش خوفینی آشیریشی ممکن.
