هر تانگ، قویاش نوری غور ولایتیده اکبرنینگ ایسیقخانهسی پلاستیک تامیگه توشیشدن آلدین، او ایسقخانه دریزهلرینی آچیب، ترتیبلی قطارلرده ایکیلگن بادرنگ نهاللری آرهسیدن تازه هوا اوتیشینی ایستهیدی.
ایسیقخانهده هوا کیرگچ اکبر بادرنگ نهاللرینی بیرمه-بیر تیکشیرهدی؛ برگلرده آفت بار-یوقلیگینی کورهدی، توپراق نملیگینی اولچهیدی و سونگ تامچیلتیب سوغاریش نللرینی هم نظارت قیلهدی. او شوندهی دییدی: «سیز کوریب تورگن بو اصول تامچیلتیب سوغاریش اصولی دیر و بیز تامچیلتیب سوغاریش تیزیمیدن فایدهلنهمیز. چونکی سیرومدیک تامچی-تامچی بادرنگ نهالینینگ ایلدیزیگه توشهدی. شو سببلی حاصلیمیز یخشی اوسهدی.»
اکبرنینگ ایتیشیچه، اوتگن ییلی سلاموطندار رادیوسیده ایفرگه اوزهتیلهدیگن «قیشلاق یولی» تعلیمی دستورینی تینگلهیاتگنده، او ایلک بار تامچیلتیب سوغاریش اصولی بیلن تنیشگن. اونگه کوره، بو اصول اونینگ دهقانچیلیککه بولگن قرهشینی اوزگرتیریب، ایسیقخانهده ایکین ییتیشتیریشگه قیزیقیشینی آشیرگن. او شوندهی دییدی: «قیشلاق یولی دستورینی ایشیتهیاتگنیمده، اوزیمگه بیر مرته تامچیلتیب سوغاریش اصولینی سینب کورهمن دییدیم. تامچیلتیب سوغاریش تیزیمینی ایشگه توشیرگنیمده، سوو هر بیر بادرنگ نهالینینگ ایلدیزیگه تامچی-تامچی توشهیاتگنینی کوردیم. بو مین اوچون جوده یخشی قرار بولدی.»
اونینگ ایتیشیچه، بو اصولدن فایدهلنیشدن آلدین عنعنوی سوغاریش پیتیده سوونینگ کتته قسمی اصراف بولردی، توپراق نملیگی هم بیر خیل بولمسدی. حاضر ایسه هر بیر نهال اوز احتیاجیگه یرهشه سوو آلهدی. بو ایسه اوسیملیکلرنینگ یخشیراق اوسیشی و حاصل صفتینینگ آشیشیگه آلیب کیلگن. اونینگ فکریچه: «تامچیلتیب سوغاریش تیزیمینینگ یخشی تامانی شونده کی، سوو کمراق صرفلنهدی، نهاللر هم ساغلامراق بولهدی. بیز ایشلتهدیگن دارولر هم هر بیر بادرنگ نهالیگه ییتیب بارهدی، چونکی تیزیم تامچیلتیب سوغاریش اساسیده ایشلهیدی. مجازلریمیز هم جوده ممنون. بادرنگلریمیز ینگی و هیچ قندهی چیقیندیمیز یوق.»
بیرلشگن ملتلر تشکیلاتی آزیق-آوقت و ایکینچیلیک دستوری تیکشیرولریگه کوره، تامچیلتیب سوغاریشدن فایدهلنیش عنعنوی اصوللر گه نسبتن سوو صرفینی ۳۰-۶۰ فایزگچه کمهیتریشی، سوو و آزیق مادهلرنی توغریدن-توغری اوسیملیک ایلدیزیگه ییتکزیش آرقهلی ایسه حاصلدارلیک و محصولات صفتینی آشیریشی ممکن.
اکبرنینگ ایسیقخانهسی عادی بولیب، یاغاچدن قوریلگنیگه قرهمی، چیکلنگن امکانیتلر شرایطیده هم حاصلدارلیگی قانیقرلی. او حاضر محلی بازار گه کونیگه ۱۰۰-۱۲۰ کیلوگرام بادرنگ ییتکزیب بیرماقده. او شوندهی دییدی: «اول بیر رادیو دستوری ایش و حیاتیمده بوندهی اوزگریش قیله آلهدی دیب اویلمهگندیم. حاضر قرهسم جوده کوپ اوزگرگن من. ایسیقخانهمده تامچیلتیب سوغاریش تیزیمیدن فایدهلنیش و اونینگ قنچهلیک فایدهلی ایکنینی بیلمسدیم. ایندی سوو هم کم صرفلنهدی، دارو-درمان هم ثمرهلی ایشلتیلهدی.»
اکبر اقلیم اوزگریشی، اوسیملیک کسللیکلرنینگ ترقهلیشی، کیمیاوی کود نرخلرینینگ آشیشی و ایکینچیلیک دارولری قیمت بولگنینی اوزی همده باشقه دهقانلر دوچ کیلهیاتگن اساسی معمالر صفتیده قید ایتهدی. او مسئوللر، ایکینچیلیک متخصصلری و ییتکرمهلردن بیلیم و خبردارلیگینی آشیرهدیگن کوپراق تعلیمی دستورلر یولگه قوییلیشینی سورهیدی.
اونینگ فکریچه، اگر باشقه دهقانلر هم زمانهوی سوغاریش اصوللری و ایسیقخانهلرنی باشقریش یوللریدن فایدهلنسهلر، سوونی کمراق صرفلهگن حالده کوپراق محصولات ییتیشتیریشلری ممکن. اقلیم اوزگریشی و سوو منبعلری تنقیصلیگی کوچهیب بارهیاتگن حاضرگی شرایطده بو مسئله ینهده مهم اهمیت کسب ایتهدی.
اکبرنینگ حکایهسی شونی کورستهدی کی، بعضاً تعلیمی رادیو دستوری شونچه کی بیر دستور بولیب قالمهیدی. او عادی بیر قراردن باشلهگن اوزگریشنینگ اوچقونیگه ایلنیب، سیر حاصل ایسیقخانه گه آلیب کیلیشی و دهقان قلبیده امیدنی قیته اویغاتیشی ممکن.
