پنجشیرنینگ تورلی تومنلریده، قریب ۱۵ جریب ییر نمایشی قطعهلر شکلده قطارلب بوغدای ایکیشگه اجرهتیلگن. مذکور اقدام اوشبو ولایت ایکینچیلیک، سووغاریش و چاروهچیلیک ریاستی آرقهلی ستندرد ایکیش اصوللری رواجلنیشی و حاصل کوپهیشی مقصد عملگه آشیریلگن.
قطارلب ایکیش، اوروغلرنینگ ترتیبلی شکلده و بیللی چیزیقلرده ایکیلیش اصولی دیر. بیلرمانلرنینگ ایشانچیگه کوره، بو اصول منبعلردن یخشی فایدهلنیشنی تامینلب، اوسیملیکنینگ یخشیراق اوسیشی اوچون شرایط یرهتیشی ممکن.
مذکور دستور گه اشتراکی بولگن پنجشیر ولایتی عنابه تومنیدهگی دهقانلردن احمد سیرنینگ ایتیشیچه: «فایدهلریدن بیری شو که، سنتی اصوللرگه قرهگنده چیدهملی دیر، آز سوو گه نیازی بار و کوپ حاصل بیرهدی. بو اصولده آفت و کسللیکلرنی کنترول قیلیش جودهیم آسان دیر. دهقانلرنینگ یخشیراق فایده قولگه کیلتیریشی اوچون بو اصولدن فایدهلنه آلهدیلر.»
قریب بیر جریب ییریگه بوغداینی قطارلب ایککن پنجشیردهگی دهقانلردن باشقه بیری کرمالدیننینگ ایتیشیچه، اوشبو اصول نهفقط بوغداینینگ یخشیراق اوسیشیگه سبب بولگن، بلکیم سوو مصرفینی هم کمهیتیرگن. اونگه کوره، سنتی ایکیشگه نسبت، هر جریب ییرده حاصل میزانی کوپهیب و محصول صفتی هم یخشی بولگن.
مذکور دهقاننینگ کوپهیتیریشیچه: «قریب بیر جریب ییرگه بوغداینی قطارلب ایکدیم. محصولنی ییغیش، یاوای اوتنی کنترول قیلیش، سوو و کیمیایی کودلرنینگ مصرف بولیشی نقطهی نظریدن جودهیم فایدهلی دیر. پنجشیر ایکینچیلیک ریاستیدن دهقانلرنینگ سنتی اصولدن چیقیشی مقصد، مذکور ایکیلیشنینگ رواجلنتیریشینی ایستهیمیز.»
بو فایدهلر بولگنی بیلن، دهقانلردن قطاری بو اصولنینگ دستلبکی خرهجتلرینی بیان قیلیب و ایتیشلریچه، کیرهکلی وسیلهلرنی تیارلش همده ایش اورگهتیلیشیگه نیاز بارلیگی، باشده اولر اوچون قیین کوریلگن.
ایکینچیلیک ایشلری بوییچه ایش بیلرمانلر، قطارلب ایکیشنی علمی و فایدهلی بیر اصول بیلهدیلر که مملکتده زراعت وضعیتی یخشیلنیشیده مهم رول اوینه آلهدی. باغدارلیک ایش بیلرمانلردن احمدزبیر قاضیزادهنینگ ایتیشیچه: «توپلم شکلده قطاری ایکیشده اوسیملیک بوتهلری آرهسیده رقابت آز دیر؛ چونکه نور برابر شکلده بوتهلر آرهسیده تقسیم بولهدی. اوروغ و کود یخشی بیر شکلده فایدهلنهدی. سووغاریش کوپراق اهمیت گه ایگه بولهدی. یاوای اوتلرنی کنترول قیلیش یخشی بیر شکلده عملگه آشیریلهدی.»
مذکور ایش بیلرمانگه کوره، بو اصول نهفقط تولید میزانینی کوپهیتیرهدی، بلکیم بوغدای صفتی هم یخشی بولهدی؛ بو ایش ایسه آزیق-آوقت خوفسیزلیگی تامینلنیشیده مهم اورینگه ایگه بولیشی ممکن.
شونینگدیک پنجشیر ایکینچیلیک، سووغاریش و چاروهچیلیک باشلیغی فضلالله دیوبندنینگ ایتیشیچه: «بو دستور زمانهوی ایکیش اصوللری رواجلنیشی، کوپراق حاصل قولگه کیلیشی، سوو و کوددن یخشیراق فایدهلنیش و زراعت ساحهسیده دهقانلر امکانیتی آشیریلیشی مقصد، عملگه آشیریلگن. عملگه آشیریلگن قطعهلرده اوسیملیکلرنینگ یخشیراق اوسگنی، اوروغنینگ آزراق ضایع بولگنی و حاصلده بیراز کوپهیش کوزگه کوریلهدی. پنجشیر ایکینچیلیک، سووغاریش و چاروهچیلیک ریاستی، حمایتلر دوام قیلگنی و کیرهکلی امکانیتلر بار بولگنی صورتده، بو اصولنی مذکور ولایتنینگ باشقه تومنلریگه هم رواجلنتیریشگه پلانی بار که توپلم شکلده اقلیم اوزگریشلری تاثیری کمهیشیده مهم رول اوینهیدی.»
توپلم شکلده، بوغداینینگ سنتی ایکیلیشی دایم قیینچیلیکلر جملهدن کوپ سوودن فایدهلنیش، اوروغنینگ ضایع بولیشی، اوسیملیکنینگ نابرابر اوسیشی، یاوای اوتلر کنترول بولیشیده قیینچیلیک و حاصل کمهیشی بیلن روپهره ایدی. شوندهی بیرحالده، بوغداینی قطارلب ایکیشگه دهقانلردن کوپ قطارینینگ یوز کیلتیرگنی، تولید یخشیلنیشی، منبعلردن یخشیراق فایدهلنیشی و مملکتده اقلیم اوزگریشلری بیلن یخشی ماسلشوو امکانیتی یرهتیلیشی توغریسیده امیدوارلیک کوپهیگن.
