مملکتده کرونا ویروسی نینگ ایجابی واقعه‌لری کوپه‌یگنی، ساغلیک وزیرلیگی نینگ خواطرلنیترگن. ساغلیک وزیرلیگی مسئوللری نینگ ایتیش‌لریچه، کرونا ویروسی گه قرشی اهالی نینگ توجهسیزلیگی، بو ویروس نینگ ایجابی واقعه‌لری کوپه‌یشی گه سبب بولگن.
ساغلیک وزیرلیگی سوزلاوچیسی اورین‌باسری میرویس علی‌زی نینگ ایتیشیچه، یشاوچیلر ساغلیک وزیرلیگی نینگ توصیه‌لریگه دقت قیلمه‌یدی و اولرنینگ توجهسیزلیگی هییت کون‌لریده وضعیت نی یمان قیلیشی ممکن.
ساغلیک وزیرلیگی سوزلاوچیسی اورین‌باسری، اهالیدن کرونا ویروسی نینگ آلدینی آلیش اوچون، هییت کون‌لریده هییت‌لماقدن وازکیچیش‌لرینی سوره‌گن.
ساغلیک وزیرلیگی وضعیت یمان بولیشی توغریسیده خواطر بیلدیرگن بیرحالده، کرونا ویروسی نینگ کوپینچه ایجابی واقعه‌لری و تلفاتی مملکت نینگ کتته و کوپ جمعیت‌لی ولایت‌لریده کورینگن.
شونده‌ی بیرحالده، سلام‌وطندار خبرچی‌لری قطار ولایت‌لرده اهالی کرونا ویروسی گه قرشی قنده‌ی کوره‌شیشی نی تیکشیرگن.
ننگرهار ولایتیده سلام‌وطندار خبرچیسی امید دیدار نینگ ایتیشیچه، اهالی کرونا ویروسی نینگ جدی آلیش توغریسیده‌گی ساغلیک وزیرلیگی نینگ توصیه‌لرینی نظرگه آلمه‌ی، وظیفه‌لری بیلن شغلله‌نیب کیلماقده.
هرات مملکت نینگ کتته و کوپ جمعیت‌لی ولایت‌لریدن بیری دیر که یشاوچی‌لری کرونا نی جدی آلمه‌یدی. بو ولایت یشاوچی‌لری نینگ ایشانچ‌لریگه کوره، بو ویروس بوتونلی اورته دن کیتگن.
هرات ده سلام‌وطندار خبرچیسی شکیب شمس نینگ ایتیشیچه: «قیغو بیلن سونگی هفته‌لرده مملکت نینگ چیگره ولایت‌لری اینیقسه هرات، قندهار، ننگرهار، فراه، نیمروز و نهایتده کابل ده کرونا ویروسی نینگ ایجابی واقعه‌لری کوپه‌یماقده و بو توغریده اهالی نینگ توجهسیزلیگی خواطرلی دیر. یشاوچی‌لرنینگ ایشانچ‌لریگه کوره، کرونا بوتونلی نابود بولگن و نهایتده باسواد کیشیلر هم ساغلیک توصیه‌لرنی رعایت قیلمه‌یدی.»
شونده‌ی بیرحالده، ساغلیک وزیرلیگی نینگ اعلام قیلیشیچه، اوتگن ۲۴ ساعت ده مملکتده کرونا گه چلینگن ۶ کسل جان بیرگن و ۲۷۵ ینگی ایجابی واقعه انیق‌لنگن. بو پیتده کرونا گه چلینگن ۱۷۰ کسل ایسه دارولنگن.
ینگی واقعه‌لر قید ایتیلیشی بیلن مملکتده کرونا گه چلینگنلر سانی حاضرگچه ۶۰ مینگ و ۵۶۳ کیشی گه ییتیشگن. شونینگدیک مملکتده کرونا ویروسی باعث هلاک بولگنلر سانی ۲ مینگ و ۶۴۸ کیشی و دارولنگنلر سانی ایسه ۵۳ مینگ و ۵۶۱ کیشی گه ییتیشگن.
