ساغلیک وزیرلیگی مسئوللری کرونا گه چلینگنلر سانی کونسایین کوپه‌یگنی توغریسیده آگاه‌لنتیریب و ایتیش‌لریچه، اوتگن اوچ الی تورت هفته ده اوندن آلدینگی هفته‌لرگه نسبتن کرونا گه چلینگنلر میزانی ۸۰ الی ۹۰ فایز کوپه‌یگن. اولرگه کوره، شونینگدیک کونده مملکتده کرونا گه چلینگن‌لردن ۶ الی ۱۰ ته‌سی جان بیره‌دی.
ساغلیک وزیرلیگی سوزلاوچیسی اورین‌باسری میرویس علی‌زی نینگ سلام‌وطندارگه ایتیشیچه، اوچ هفته‌دن بویان مملکت لابراتوارلریده تیکشیریله‌دیگن بیر مینگ و ۵۰۰ الی ۲ مینگ و ۵۰۰ شبهه‌لی واقعه‌دن ۱۵۰ الی ۱۸۰ ته‌سی ایجابی چیقه‌دی؛
بیراق بوندن آلدین ۲۰ الی ۳۰ واقعه ایجابی چیقه‌دی ایکن. ساغلیک وزیرلیگی سوزلاوچیسی اورین‌باسری گه کوره، کرونا ویروس نینگ کوپینچه ایجابی واقعه‌لری چیگره‌یی ولایتلر اینیقسه ننگرهار، قندهار و هرات ده رویخط گه آلینگن.
میرویس علی‌زی نینگ کوپه‌یتیریشیچه، کرونا ویروس نینگ آلدینی آلیش اوچون ساغلیک وزیرلیگی هوایی شرکت‌لرگه برچه ایچکی و چیت‌ایللیک یولاوچی‌لرنینگ کروناسینی تیکشیرگنیدن کیین مملکت گه آلیب کیلیشی نی سوره‌گن.
ساغلیک وزیرلیگی سوزلاوچیسی اورین‌باسری نینگ اورغولشیچه، حاضر افغانستان ده کرونا ویروس نینگ وضعیتی هندوستان، پاکستان و ایران مملکت‌لریگه نسبتن یخشی دیر و چلینگنلر سانی کوپه‌یگن صورتده ییر و هوایی چیگره‌لر باغله‌نیشی ممکن.
شونده‌ی بیرحالده، ایران کرونا ویروسی نینگ آلدینی آلیش اوچون اسلام‌قلعه چیگره‌سینی یولاوچیلر یوزیگه باغله‌گن. هرات حاکمی سید عبدالوحید قتالی نینگ ایتیشیچه، اوشبو چیکلاو گه یوک تاشووچی ترانزیتی موترلر و افغانستانلیک یشاوچیلرنینگ ایران دن اولکه گه قیتیشی شامل بولمه‌یدی.
شونینگدیک هرات حاکمی بو ولایت ده کرونا ویروس نینگ اوچینچی تولقینی توغریسیده آگاه‌لنتیریب ایتیشیچه، کرونا وضعیتی یمان بولگن صورتده چیکلاو یره‌تیلیشی ممکن.
ساغلیک وزیرلیگی نینگ اعلام قیلیشیچه، اوتگن ۲۴ ساعت ده مملکتده کرونا گه چلینگن ۷ کسل جان بیرگن و ۲۰۶ ینگی ایجابی واقعه قید ایتیلگن. مذکور ایجابی واقعه‌لر مملکت نینگ ۱۵ ولایتیده قید ایتیلگن.
عین حالده، ساغلیک وزیرلیگی بوگون (پنجشنبه ۹- ثور) کونده‌لیک گزارشی نینگ ترقه‌تیش بیلن ایتیشیچه، اوتگن بیر کیچه‌وکوندوز ده کرونا گه شبهه‌لی ۱ مینگ و ۸۷۷ واقعه تیکشیریلگن. مذکور پیتده ۱۸۰ کسل ایسه دارولنگن.
ساغلیک وزیرلیگی نینگ گزارشی اساسیده، مملکتده کرونا ویروسی نینگ بیرینچی ایجابی واقعه‌سی قید ایتیلگنیدن بویان بو ویروس گه شبهه‌لی ۴۰۰ مینگ و ۴۱۲ کیشی تیکشیریلگن. بولردن ۵۹ مینگ و ۵۷۶ ته‌سی کرونا ویروس گه چلینگن و ۲ مینگ و ۶۱۸ ته‌سی بو ویروس باعث جان بیرگن.
