اروپا اتفاقی نینگ افغانستان اوچون مخصوص نماینده‌سی توماس نیکلسون، افغانستان اوچون مذکور اتفاق گه اعضا مملکت‌لر نینگ نماینده‌لری ییغینیدن خبر بیرگن.
نیکلسون بوگون (شنبه، ۲۱ جوزا) اوز توییتری ده، اوشبو ییغین بروکسل ده اوتکزیلگنینی یازگن. بشر حقوقی و اقتصاد بوییچه تشقی ایش بیلرمان‌لر مذکور ییغینده اشتراک ایتگنلر.
توماس نیکلسون نینگ ایتیشیچه، اوشبو ییغینده بشر حقوقی اینیقسه خاتین قیزلر و قومی گروه‌لر وضعیتی کوچه‌یشی، سیاسی مشارکت یوق‌لیگی، اسلامی امارت نینگ افغانستان خلقی گه بیرگن وعده‌لرینی عملگه آشیریش ده سیاسی بیر قرار گه کیله آلمسلیگیدن خواطر بیلدیریلگن.
بیزلرنینگ فیسبوک صحیفه‌میزگه باش اورینگ!
اروپا اتفاقی نینگ افغانستان اوچون مخصوص نماینده‌سی گه کوره، مذکور اتفاق افغانستان خلقی نی قوللب_قوتلش گه داوم بیره‌دی. بیراق اسلامی امارت سوزلاوچیسی نینگ اورین باسرلریدن بلال کریمی، سلام‌وطندار بیلن اوتکزگن صحبتیده، افغانستان ده بشر حقوقی ایاغ آستی بولیشینی رد قیلیب ایتیشیچه، اروپا اتفاقی ناتوغری معلومات اساسیده، افغانستان ده بشر حقوقی ایاغ آستی بولیشیدن خواطر بیلدیرگن.
اونینگ کوپه‌یتیریشیچه: «بو ادعالرنی بیز رد قیله‌میز. تشقی تشکیلات‌لر ناتوغری معلومات اساسیده گزارش ترقه‌ته دیلر، اسلامی امارت اسلام قانون_قاعده‌لری اساسیده اولکه بوتون خلقی بیلن یخشی مناسبتده دیر.»
عین‌حالده، بشر حقوقی ایش بیلرمان‌لریدن قطاری نینگ ایتیشلریچه، بو گَل ییغین‌لر اوتکزیلیشی و بشر حقوقی وضعیتی باره‌سیده‌گی خواطرلر، افغانستان ده‌گی وضعیت اوستیگه تاثیر قیلمه‌یدی.
بشر حقوقی ایش بیلرمانی و بیلیم یورت استادی عبدالبصیر نبی‌زاده نینگ سلام‌وطندار گه ایتیشیچه، دنیا اولکه‌لری اسلامی امارت اوز پالیسی‌لرینی اوزگرتیریش اوچون اولر اوستیگه باسیم کیلتیریشی کیره‌ک.
باشقه تاماندن، سیاسی مسئله‌لر بوییچه ایش بیلرمان جواد حسینی، آلتینچی صنف‌دن یوقاری قیز اوقووچیلری گه مکتب باریش اجازه‌سی بیریلمسلیگی، حکومتدارلیک ده مردم نینگ مشارکت‌سیزلیگی، عمومی کیچیریم گه دایر دقت‌سیزلیکنی افغانستان بویلب بشر حقوقی نقض ایتیلیش موردلریدن عنوان قیله‌دی.
بیزلرنینگ توییترده هم تعقیب قیلینگ!
افغانستان ده اسلامی امارت حاکمیت نی قولگه آلیشیدن کیین، خلق‌ارا نهادلر افغانستان ده بشر حقوقی نقض ایتیلیشی کوچه‌یشیدن سوز یوریتر ایکن، اوشبو مملکت ده بشر حقوقی وضعیتی یامانلنیشی گه عاید خواطرلر کوچه‌یگن. ینگی لیکده بشر حقوقی دیده بانی گه کوره، افغانستان ده بشر حقوقی تخطی‌لری جدی و انیق تیکشیریلیشی کیره‌ک.