قندوز ده دهقانلردن قطارینینگ سلاموطندار گه ایتیشلریچه، اقلیم اوزگریشلری و کیمیایی کودلردن دایمی شکلده فایدهلنیش، زراعتنینگ عنعنوی اصوللرینی قیینچیلیک بیلن روپهره قیلگن. قندوز دهگی دهقانلردن بیری سهرابنینگ ایتیشیچه، اوتمیشگه قرهگنده سونگی ییللر ییرلرینینگ حاصل بیریشی کمهیگن.
اونینگ کوپهیتیریشیچه، اوتگن ییللرده آز کود و ییترلی سوودن صرفلهنیش بیلن یخشی حاصل بیرهدیگن ییرلری، حاضر اوشه حاصل درجهسی گه ییتیشیش اوچون کوپراق کود صرفلهنیشی و سووغاریلیشیگه نیاز بار. «کوپ تغییر کیلگن؛ اوتگن ییللرده حاصللریمیز کوپ ایدی، یامغیر هم کوپ ایدی. بیر وقتلر کود هم بیرمس ایدیک، حاضر کود هم بیرهمیز، اوتگن ییللرگه قرهگنده حاصللریمیز کمهیگن. ییلمه-ییل کمهیهدی. اصلی کودللردن هم فایدهلنهمیز. اوتگن ییللرگه قرهگنده، حاضر کوددن فایدهلنیش هم کوپ بولگن؛ بیراق حاصللریم کمهیگن.»
قندوز دهگی دهقانلردن باشقه بیری سمیعاللهنینگ ایتیشیچه، اوتگن آیلرده یاغینگرچیلیک کمهیگنی سبب، ییرلری تیزلیککه قوریب و تکرار سووغاریشگه نیاز کوپهیگن. اونگه کوره، بو وضعیت یانیده، شونینگدیک کیمیایی کودلردن دایمی شکلده فایدهلنیش هم توپراق صفتی همده زراعتی محصوللر کمهیشی توغریسیده خواطرلرنی اورته گه کیلتیرهدی. «بو ییل بوغدایلر قوریماقده. بو ییل سوو جودهیم آز و اوتگن ییللرده کوددن آزراق فایدهلنهر ایدیک. حاضر توپراغیمیز هم صفتسیز بولگن. توپراق بوزیلگن؛ چونکه حاضر کوددن کوپ فایدهلنهمیز، بوغدایلر هم کوپ حاصل بیرمهیدی.»
قندوز دهگی دهقانلردن مطیعالله گه کوره، اوشبو وضعیت دوام قیلیشی بیلن جدی اقتصادی قیینچیلیکلر بیلن روپهره بولگن. اونینگ کوپهیتیریشیچه، کود، سوو و باشقه زراعتی صرف-خرهجتلر کوپهیگنی سبب، ییرلریده ایکیشگه دوام بیریش توغریسیده خواطرلهنیب و مسئول نهادلردن کوپراق حمایت و آگاهیلیک بیریلیشنی سورهگن. «دولتدن بیزلرگه صفتلی کودلر یاردم بیریلیشی و شونینگدیک ییرلر اوچون صفتلی دارولرنینگ بیریلیشینی سورهیمیز. البته باشده ییرلریمیز کوریلسین، کیین اوشه رقم کود و دارو بیریلسین. اصلاح بولگن اوروغ بیرسینلر، مقصد ییرلریمیزدن یخشیراق حاصل قولگه کیلتیرهیلیک.»
قندوز ده ایکینچیلیک ایشلری بوییچه ایش بیلرمان شفیعالله حمیدینینگ سلاموطندار گه ایتیشیچه، کیمیایی کودلردن دایمی و حددن تشقری فایدهلنیش، توپراقنینگ طبیعی توزیلیشینی تغییر بیریب و اوزاق مدتده ییرنینگ حاصل بیریشی کمهیشیگه سبب بولهدی. اونینگ کوپهیتیریشیچه، اقلیم اوزگریشلری و حددن تشقری کیمیایی کودلردن فایدهلنیش ترکیبی، کیلهجکده توپراق و حاصل بیریشنینگ کمهیشیگه سبب بولیشی ممکن.
حمیدینینگ اورغولشیچه: «دهقانلر اوچون کوپینچه توصیهلر بار، جملهدن اینگ مهمی عضوی کودلر و زمانهوی سووغاریش اصوللریدن فایدهلنسینلر. کوچلری ییتگنی صورتده، یخشی اصوللردن فایدهلنسینلر. اولکهمیزده سوو کم، سوونی حددن تشقری صرف قیلمسلیگیمیز کیرهک؛ چونکه اوسیملیکنینگ سووگه چومیلیب کیتیشی، اکسیجن کم ییتیشیشی و شونینگدیک سوودن حددن تشقری صرفلنیشیگه سبب بولهدی. باغدارلر و دهقانلر باغلریگه قیش یاغلری و لایمسلفردن فایدهلنه آلهدیلر که حاضر شهرلرده کوپ فایدهلنیلهدی.»
شوندهی بیرحالده، قندوز ایکینچیلیک ریاستینینگ زراعتی ایشلری بوییچه آمری صلاحالدینگه کوره، کیمیایی کودلردن درست شکلده فایدهلنیش و زراعتی برقرار اصوللری توغریسیده دهقانلرگه آگاهیلیک بیریش دستورلرینی قولگه آلگنلر. جناب صلاحالدیننینگ ایتیشیچه، اوشبو دستور توپراقنی مدیریت قیلیش، کودلردن مناسب شکلده فایدهلنیش و اقلیم اوزگریشلری بیلن ماسلشیش توغریسیده دهقانلرگه یول کورسهتیلیشیدن عبارت دیر. «توپراقنی تانیش ساحهسیده، نیچه مدت آلدین زراعت وزیرلیگی مقامیدن بیر تیم کیلگن ایدی؛ اولر قندوز ولایتی توپراغلریدن نمونهلر آلدیلر. انشاءالله اونینگ تجزیه قیلیشدن کیین، نتیجهسینی دهقانلر بیلن شریک قیلهدیلر که اولر اوشه کیرهکلی نرسهلر یا-ده توپراققه نیاز بولگن کودلردن فایدهلنسهلر.»
ایش بیلرمانلرنینگ ایشانچیگه کوره، دهقانلرگه یول کورسهتیش یانیده سوو و توپراق منبعلرینینگ درست مدیریت بولیشیگه جدی توجه قرهتیلمهگنی صورتده، بو جریان دوامی کیلهسی ییللرده قندوز زراعتینی کتهراق قیینچیلیکلر بیلن روپهره قیلیشی ممکن.
