اسلامی همکارلیک تشکیلاتی گه اعضا بولگن اولکه‌لر نینگ ایکی کون‌لیک ییغینی اداغیده، طالبان گروهیدن زوروانلیک نی کمه‌یتیریب و آتیش کیسین اوچون کیلیشیش‌لری سوره‌لگن.
اسلامی همکارلیک تشکیلاتی گه اعضا بولگن اولکه‌لر ییغینی، قوس آیی نینگ ۲۷ نچی و ۲۸ نچی کون‌لری نایجریا اولکه‌سی نینگ پایتختی نیامی شهریده بولیب اوتگن.
اوشبو تشکیلات، افغانستانده‌گی تروریستی هجوم‌لر اینیقسه تینچ‌اهالی گه قرشی اویوشتیریله‌دیگن هجوم‌لرنی جدی صورتده قاره‌لب و تینچلیک مذاکره‌سیدن اوز حمایت‌لرینی بیلدیریشگن.
اسلامی همکارلیک تشکیلاتی گه اعضا بولگن اولکه‌لر ۴۷- دور ییغینیده، باشقه اعلامیه‌لر یانیده افغانستان حقیده هم ۳ اعلامیه ترقه‌تگن، اوشبو اعلامیه‌لر افغانستان وضعیتی، داعش گروهی نینگ جنایتی و منطقه ابتکارلری توغریسیده بولگن.
عین‌حالده، اسلامی همکارلیک تشکیلاتی، افغانستان دولتی و مردمی‌دن اوز حمایتی نی اعلام قیلگن.
اسلامی همکارلیک تشکیلاتی، اوشبو تشکیلات گه اعضا بولگن اولکه‌لرنینگ دین عالم‌لری و مذهبی نهادلریدن، افغانستانده دوام ایته‌دیگن اوروش‌لرنی تحریم قیلیب و تینچلیک مذاکره‌سیدن حمایه قیلیش‌لرینی سوره‌گن.
اوشبو تشکیلات تینچلیک مذاکره‌سیدن جدی شکلده حمایت قیلیب و دنیا جماعه‌چیلیگی‌دن هم اوشبو پروسه‌دن حمایه قیلیشی نی سوره‌گن. عین‌حالده اوشبو تشکیلات گه اعضا بولگن اولکه‌لردن، سیاسی حل یول تاپیلیشی اوچون افغانستان نینگ تینچلیک مذاکره‌سیدن حمایه قیلیشی نی سوره‌گن.
اوشبو تشکیلات گه کوره، سیاسی حل یول نینگ اساسی، زوروانلیک‌نی توخته‌تیش، تروریستی گروه‌لر بیلن رابطه‌لرنی کیسیش، دموکراتیک بولیم‌لرده‌گی یوتوق‌لرنی سقله‌ش و اوشبو بولیمده آلغه باریش، ۱۹ ییل جریانیده قولگه کیلگن سیاسی، اجتماعی و اقتصادی یوتوق‌لرنی سقله‌ش و افغانستان اساسی قانونی نی رعایت قیلیش دیر.
شونینگدیک افغانستان دولتی، اسلامی همکارلیک تشکیلاتی نینگ اعلامیه‌سیدن خرسندلیک بیلدیرگن.
مملکت تشقی ایشلر وزیرلیگی نینگ ایتیشیچه، افغانستان اسلام جمهوریت دولتی، اسلامی همکارلیک تشکیلاتی تامانیدن ترقه‌تیلگن قطع نامه عملگه آشیریلیشی خصوصیده اوشبو تشکیلات بیلن یقییندن ایش قیلیش گه قیزیققن.
