پایتختده بنالر قوریلیشی و آبادانلشتیریش لایحهلری عملگه آشیریلیشی بیلن، کابل شهری بلدیهسی، سونگی بیش ییل دوامیده یشاوچیلر گه تورت مینگ ۲۰۰ دن آرتیق قوریلیش رخصتنامهسی بیریلگنینی معلوم قیلدی.
کابل بلدیهسینینگ وکیلی و مدنی ایشلر بوییچه مصلحتچیسی نعمتالله بارکزینینگ ایتیشیچه، اوشبو رخصتنامهلر ریجه اساسیدهگی قوریلیش ایشلری اوچون بیریلگن. شونینگدیک، کابل شهرینینگ تورلی حدودلریده قوریلیش قاعده بوزرلیکلرینی تیکشیریش ایشلری همان دوام ایتماقده. او شوندهی دییدی: «قوریلیش قاعده بوزرلیکلرنینگ اکثریتی بیش ییل اول یا کی اوندن آلدین قوریلگن بنالر گه تیگیشلی. کابل شهری بلدیهسی اوشبو بنالردهگی قاعده بوزرلیکلرنی تیکشیرماقده. بو جریان شهرنینگ تورلی حدودلریده دوام ایتهیپتی. قوریلیش قاعده بوزرلیکلرینی کوریب چیقیش کمیسیونی هم هر هفته ییغیلیش اوتکزیب، کون ترتیبی گه مسئلهلرنی کوریب چیقهدی و تیگیشلی چارهلرنی کورهدی.»
بونی یانیده، یشل حدودلرنینگ آزلیگی کابل اهالیسی اوچون اساسی معمالردن حسابلنهدی. ایریم یشاوچیلرنینگ ایتیشیچه، قوریلیشلرنینگ کینگهیب باریشی عایلهلر و بالهلرنینگ مناسب دم آلیش مسکنلریدن فایدهلنیش امکانیتلرینی چیکلب قویگن.
کابل شهرینینگ ۱۳ –ناحیه یشاوچیسی آزیتا، کوپلب حدودلرده یشیل میدانلر گه ییترلیچه اعتبار قرهتیلمهگنینی ایتهدی. او شوندهی دییدی: «قییر گه بارمنگ، هر بیر کوچهده بیرار بنا یا کی کوپ قووتلی اوی قوریلماقده. بیراق اطراف گه قرهسنگیز، یشیل حدود اوچون دییرلی هیچ قندهی جای قالمهگن. بو حالت حقیقتن هم آدمنی قینهیدی. کابلده بالهلر وقتلرینی مضمونلی اوتکزیش ممکن بولگن جای دییرلی یوق، اولر اوچون مناسب یشیل حدودلر موجود ایمس. عیاللر اوچون هم مناسب دم آلیش جایلری یوق. حکومتدن التماسیم کابلدهگی یشیل حدودلر گه کوپراق اعتبار قرهتسین.»
نعمتالله بارکزی، بو خواطرلر گه مناسبت بیلدیریب، یشیل حدودلرنی کینگهیتیریش و ینگی باغلر برپا ایتیش اوچون جاری ییلده ۷۵۰ میلیون افغانی مبلغ اجرهتیلگنینی ایتهدی. اونگه کوره: «کابل بلدیهسی یشیل حدودلرنی یخشیلش اوچون جاری ییلده ۷۵۰ میلیون افغانی مبلغ اجرهتگن. شونینگدیک کابل شهریده ینگی باغلر هم قوریلهدی. مثلاً تایمنینینگ بیشینچی کوچهسیده اول توپراق اویومی بولگن جایده باغ قوریش ریجهلشتیریلگن ایدی. خیریت کی بو ییل اوشبو باغنی قوریش ایشلرینی باشلهدیک. اونینگ دیوارلری قوریب بیتکزیلدی، باغنینگ ایچکی قسمیدهگی ایشلر هم دوام ایتماقده.»
یول قوریلیشی جریانینینگ سیکینلیگی هم کابل اهالیسی شکایت قیلهیاتگن معمالردن بیری دیر. اولرنینگ ایتیشیچه، شهرنینگ تورلی حدودلریده یوللر بیر وقتنینگ اوزیده بوزیلیشی و قوریلیشی باریب-کیلیشنی قیینلشتیریب، گوجوملیکلرنی ینهده کوچهیتیرگن.
کابل شهرینینگ ۱۸ ناحیهسی یشاوچیسی مصور، یول قوریلیشی لایحهلرینی عملگه آشیریش جریانی، تیزلشتیریشنی سورهیدی. او شوندهی دییدی: «کابلده یول قوریلیشی جوده کوپهیگن، بیراق اونینگ جریانی جوده ناقولهی. چونکی حلی بیر قسم قوریب بیتکزیلمسدن، باشقه قسمنی بوزیشنی باشلشهدی. یول قوریلیشی جوده سیکین کیچماقده و لایحهلر تیزراق عملگه آشیریلیشی کیرهک.»
نعمتالله بارکزی، کابل شهری بلدیهسینینگ وکیلی و مدنی ایشلر بوییچه مصلحتچیسی، شهر بلدیهسینینگ رواجلنتیریش لایحهلرینینگ اساسی قسمی یول قوریلیشیگه قرهتیلگنینی بیلدیرهدی. اونینگ سوزلریگه کوره، اوشبو ادارهنینگ جمعی ۲۳۳ ته لایحهسیدن ۱۶۶ تهسی یول قوریلیشی گه، ییتی تهسی کوپریک قوریلیشی گه و ۱۰ دن آرتیغی کاناللر قوریلیشی گه تیگیشلی.
کابل بلدیهسینینگ وکیلی و مدنی ایشلر بوییچه مصلحتچیسی، قویاش ۱۴۰۵ ییل اوچون اوشبو اداره تامانیدن ۹.۱ میلیارد افغانی مقداریده رواجلنتیریش بودجه بیلگیلنگنینی معلوم قیلهدی. اونینگ ایتیشیچه، ادارهنینگ ایش ریجهسیگه ۲۳۳ ته لایحه کیریتیلگن بولیب، حاضرده اولرنینگ ۲۱۲ دن آرتیغی کابل شهرینینگ تورلی حدودلریده عملگه آشیریلماقده.
