عایله اعضالریدن بیری‌نینگ بی‌درک یوقالیشی عایله‌وی حیات و مسئولیت‌لرنی بجریشده تورلی قیینچیلیک‌لرنی کیلتیریب چیقریشی ممکن. بونده‌ی وضعیت‌لرده حقوقی و شرعی قره‌شلردن خبردار بولیش، شونینگدیک، عایله‌نینگ حالتینی انیقلش یوللرینی بیلیش مسئولیت‌لرنی آیدینلشتیریش و عایله‌وی حیات کیله‌جگی حقیده قرار قبول قیلیشده مهم رول اوینه‌یدی. عایله اعضالریدن بیری حقیده اوزاق وقت دوامیده خبر آلالمه‌یاتگن عایله‌لر اوچون کونده‌لیک حیات‌نی دوام ایتتیریش عایله‌وی خره‌جت‌لرنی قاپلش، فرزندلر گه غمخورلیک قیلیش و عایله‌وی مقام‌نی انیقلش بیلن باغلیق سواللرنی یوزه گه کیلتیریشی ممکن. موجود ییچیملردن خبردار بولیش و تیگیشلی اداره‌لر گه مراجعت قیلیش بونده‌ی وضعیت‌نی حل ایتیشگه یاردم بیره‌دیگن عامللردن حسابلنه‌دی.
دایکندی‌دن بولگن سیدمحمد موسوی‌نینگ ایتیشیچه، عایله اعضالریدن بیری بی‌درک یوقالگن عایله‌لرنینگ حالتینی اورگه‌نیشده هر بیر ایش‌نینگ شرایط‌لرینی علیحده کوریب چیقیش ضرور. اونینگ سوزلریگه کوره، نکاح‌نینگ حالتی، مالیه‌وی مجبوریت‌لر و مال-ملک بیلن باغلیق حقلر تیگیشلی شرط‌لر همده معیارلرنی حساب گه آلگن حالده تیکشیریلیشی کیره‌ک. اونینگ کوپه‌یتیریشیچه، بونده‌ی حالتلرنی اورگه‌نیش جریانیده عایله‌وی مال-ملک، یشش خره‌جتلری و هر ایکی تامان‌نینگ مالیه‌وی حقوقلری هم اعتبار گه آلینیشی ممکن. او شونده‌ی دییدی: «اگر عیال قیته تورموش قورمه‌گن بولسه، اولگی نکاحی حلی هم اعتبارلی بوله‌دی. اولر ینه بیرلشیب، بیرگه‌لیکده‌گی حیات‌لرینی دوام ایتتیریش‌لری ممکن. اگر عیال قیته تورموش قورگن بولسه و عده مدتی – تورت آی و اون کون اوتگچ باشقه کیشیگه تورموش گه چیققن بولسه، اونینگ اولگی نکاحی توگه‌تیلگن حسابلنه‌دی و ینگی تورموشی رسمی بوله‌دی.»
دایکندی ولایتیده ینه بیر حقوق‌شناس محمدرضا محمدی‌نینگ ایتیشیچه، عایله اعضالریدن بیری‌نینگ اوزاق مدت بی‌درک یوقالیشی حالتیده عایله‌وی مقام‌نی انیقلش اوچون وضعیت‌نی اورگه‌نیش و تیگیشلی ترتیب-تمایللردن اوتیش مهم دیر. او شونده‌ی دییدی: «عیال ایری‌ینگ بی‌درک یوقالگنیگه ایشانچ حاصل قیلگنیدن سونگ، محکمه گه نکاح‌نی بیکار قیلیش حقیده عریضه بیریشی ممکن. محکمه نکاح‌نی بیکار قیلیش توغریسیده قرار چیقریشدن آلدین قوییده‌گی چاره‌لرنی کوره‌دی؛ بیرینچی نوبتده، عیال‌نینگ عریضه‌سینی رویخط گه آله‌دی. ایرنینگ یوقلیگی حقیده یازمه روشده خبر بیره‌دی و ایرنینگ یشش جاییگه قیتیشی یا کی عیال‌نی اوز حضوریگه چقیریشی اوچون معیین مدت بیلگیله‌یدی.»
اونینگ ایتیشیچه، بو جریانده تیگیشلی اداره‌لردن ضرور معلومات‌لر توپلنیشی و بی‌درک یوقالگن شخص‌نینگ حالتی موجود امکانیت‌لر آرقه‌لی تیکشیریلیشی ممکن. یکونی قرار ایسه ایش‌نینگ شرایط‌لری و تیگیشلی اداره‌لرده قوللنیله‌دیگن ترتیب-تمایللر گه باغلیق.
شرعی نقطه‌ی نظردن هم ایرنینگ بی‌درک یوقالیشی شرایط‌لرنی اورگه‌نیش و ایشانچلی فقهی منبعلر گه مراجعت قیلیش‌نی طلب قیله‌دیگن مسئله‌لردن بیری دیر.
دین عالمی قربان حسنی‌نینگ ایتیشیچه، بونده‌ی حالتلرده نکاح‌نینگ مقامی و اونگه تیگیشلی شرط‌لر شرعی معیارلر اساسیده کوریب چیقیلیشی کیره‌ک. شرعی حالت انیقلنمسدن و تیگیشلی جریانلر یکونلنمسدن توریب، قیته تورموش قوریش حقیده قرار قبول قیلیش توغری ایمس. اون شونده‌ی دییدی: «حنفی فقه گه کوره، اگر بی‌درک یوقالگن عیال‌نینگ ایری تیریک‌می یا کی وفات ایتگن می، دیگن مسئله نامعلوم بولسه، عیال صبر قیلیشی و ایری‌نینگ وفاتی اثباتلنمه‌گونچه یا کی قاضی موجود دلیل و بیلگیلر اساسیده اونینگ وفات ایتگنی حقیده حکم چیقرمه‌گونچه قیته تورموش قوره آلمه‌یدی.»
بو مسئله‌لر بیلن بیرقطارده، عایله اعضالریدن بیری‌نینگ یوقلیگی باشقه عایله اعضالری‌نینگ یشش خره‌جت‌لرینی تأمینلش و فرزندلر گه غمخورلیک قیلیش باره‌سیده‌گی مسئولیت‌نی آشیریشی ممکن. بو اینیقسه درآمد منبعلری چیکلنگن عایله‌لرده یققال سیزیله‌دی.
دایکندی ولایتیدن بولگن و تورموش اورتاغی حقیده بیر نیچه ییلدن بیری خبر آلالمه‌یاتگن و بیش نفر فرزندینی پرورش قیلیش مسئولیتینی زمه‌سیگه آلگن عیال، شو دور مابینیده عایله‌سی‌نینگ کونده‌لیک احتیاجلرنی تأمینلشگه حرکت قیلگنینی بیلدیره‌دی. اونینگ کوپه‌یتیریشیچه، ایری یوقلیگیده اوی خره‌جت‌لرینی قاپلش و فرزندلری‌نیگ ایشلریگه قره‌ش اونینگ زمه‌سیگه ینه‌ده کوپراق مسئولیت یوکله‌گن. بو تجربه شونی کورسته‌دی کی، عایله اعضالریدن بیری‌نینگ بی‌درک یوقالیشی نه‌فقط عایله‌وی مقامی‌نینگ نامعلوم بولیب قالیشیگه، بلکی باشقه عایله اعضالری‌نینگ اقتصادی احوالی و کونده‌لیک مسئولیت‌لریگه هم تأثیر کورسه‌تیشی ممکن. ایشانچلی ییچیملردن خبردار بولیش و عایله‌لرنینگ شرایط‌لرینی حسابگه آلیش بونده‌ی وضعیت‌لرنی مناسب حل ایتیشگه یاردم بیره‌دی.
تورموش اورتاغی اوچ ییل آلدین بی‌درک یوقالگن ۳۲ یاشلی و اوچ نفر فرزندینی تربیه‌له‌یاتگن ینه بیر عیال بوگونگی کونده کونده‌لیک حیاتیده کوپراق مسئولیت بیلن یوزمه-یز کیله‌یاتگنینی ایته‌دی. اونینگ تأکیدلشیچه، شو وقت دوامیده ایری حقیده انیق معلومات‌لرنینگ یوقلیگی اوزی و فرزندلری‌نینگ کیله‌جگی باره‌سیده خواطرلرنی کیلتیریب چیقرگن. عیال‌نینگ سوزلریگه کوره، عایله‌نینگ کونده‌لیک احتیاجلرینی تأمینلش و فرزندلریگه غمخورلیک قیلیش او دوچ کیله‌یاتگن اساسی قیینچیلیک‌لردن دیر.
حقوق‌شناس‌لرنینگ ایتیشیچه، عایله اعضالریدن بیری‌نینگ اوزاق مدت بی‌درک یوقالیشی حالتیده عایله‌وی مقام، مالیه‌وی حقلر و عایله‌وی مجبوریت‌لر هر بیر ایش‌نینگ شرایط‌لرینی حساب گه آلگن حالده اورگه‌نیلیشی کیره‌ک. اولرنینگ تأکیدلشیچه، حقوقی ییچیملردن خبردار بولیش و تیگیشلی اداره‌لر گه مراجعت قیلیش وضعیت‌نی انیقلشتیریش همده او بیلن باغلیق مسئله‌لرنی کوریب چیقیشگه یاردم بیره‌دی.
