کمیده ایکی هفته‌دن بویان طالبان گروهی بغلان-قندوز، بغلان-کابل و بغلان-سمنگان قتناو یول‌لریده چیک‌پاینت ایجاد قیلیب یولاوچی‌لرنی تیکشیره‌دی. بغلان مرکزی پلخمری شهری یشاوچی‌لری نینگ بو وضعیتدن خواطر بیلدیریب ایتیشیچه، اوشبو قتناو یول‌لر کوپ زمان‌لر اوروش بولگنی سبب، یاپیق دیر و طالبان گروهی چیک‌پاینت ایجاد قیلیب دولت و حربی ایشلاوچی‌لرنی تیکشیره‌دی.
پلخمری یشاوچی‌لریدن بیری خان‌علی نینگ ایتیشیچه، بغلان قتناو یول‌لریده طالبان نینگ چیک‌پاینتی سبب، مسافرلر راحت شکلده سفر قیله آلمه‌یدیلر.
بغلانده یوک تاشیووچی موتر هیداووچی‌سی قربان‌محمد نینگ ایتیشیچه، اوشبو ولایت قتناو یول‌لریده آتیشمه بولگنی سبب، موترینی پلخمری شهریده توخته‌تیب قویگن. او، دولت‌دن قتناو یول‌لر خوفسیزلیگی نی تامین قیلیشی‌نی ایسته‌یدی.
عین‌حالده، ۲۱۷ پامیر قول اردو قومندانی عباس توکلی اوروش‌نی مدیریت قیلیش اوچون بغلان ولایتیگه کیلگن. اونینگ سلام‌وطندارگه ایتیشیچه، اوشبو ولایت‌ده کوپ‌قطار دولتی کوچلر جایلشگن و تیزلیککه قتناو یول‌لرنی طالبان وجودیدن تازه‌لش اوچون حربی عملیات یولگه قوییله‌دی.
شونینگدیک، محلی منبع‌لرنینگ سلام‌وطندارگه ایتیش‌لریچه، طالبان گروهی دوشی تومنیده چیک‌پاینت ایجاد قیلیش بیلن اندراب و خنجان تومنی یشاوچی‌لرینی آخته‌ره‌دی و اندراب‌لیک بیر هیداووچی‌نی اولدیریب و باشقه ایکی کیشی‌نی اوزلری بیلن آلیب کیتگن.
طالبان گروهی حاضرگه‌قدر بوتوغریده فکر بیلدیرمه‌گن.
