عیال سوداگرلریدن بیرقطاری نینگ ایتیشلریچه، اسلام امیرلیگی حاکمیتیدن کیین، ایش بازارلری سیزیلرلی درجه ده کمه‌یگن. سلام‌وطندار بیلن صحبت اوتکزگن سوداگر عیاللردن قطاری گه کوره، اسلام امیرلیگی حاکمیتیدن کیین خارج گه صادرات‌لری توخته‌گن.
زعفران سوداگرلریدن بولمیش نفیسه دانش گه کوره، اوتمیش ده ۱۲ مملکت گه زعفران صادر قیلیب و اونینگ کمپنیه‌سیده قریب ۲۱ کیشی ایشلر ایدی؛ لیکن اسلام امیرلیگی حاکمیتیدن کیین زعفران صادراتی توخته‌ب و یالغیز تورت ایشلاوچیسی قالگن.
زعفران سوداگری نفیسه نینگ ایتیشیچه: «تأسف بیلن حاضرگی حکومت ده صادراتیمیز یوق و ایچکی تجارلر گه ساته‌میز، بیراق تورت_بیش آی دن بویان سودامیز یوق، آلدین هندوستان، امارات، کویت، امریکا، جرمنی، کانادا، تورکیه و دوبی گه صادرات قیلر ایدیک. حاضر اصلا صادراتیمیز یوق دیر. حاضرگی وضعیت دوام ایتگن تقدیرده، سوداگر عیاللر فعالیت‌لرینی ترک ایتیش‌لری ممکن.»
بیزلرنینگ فیسبوک صحیفه‌میزگه باش اورینگ!
بوندن آلدین، کابل و بدخشان ولایت‌لریده ییگولیک ماده‌لر تجاری بولگن آمنه حق‌دوست نینگ ایتیشیچه، حاضر سوداسی ۹۰ فایز کمه‌یگن.
آمنه حق‌دوست گه کوره: «بدخشی هوسانه‌لری و ییگولیک ماده‌لرنی تجارت قیلر ایدیک. بدخشان ده بولگن نماینده‌لیک حاضر یاپیلگن؛ حاضر یالغیز کابل نینگ نیچه تومنی گه یوباره‌میز، هر کونی ۴ و ۵ بوجی اون و شونینگدیک یاغ تجارت قیلردیک؛ لیکن حاضر حتا ۱ بوجی اون تجارتی‌میز یوق دیر. حاضرگی کونده ۱۰ فایز و ۲۰ فایزدن آرتیق درآمدیمیز یوق. بو ییرده ایشله‌یدیگنلر حاضر ایش‌سیز بولیشگن.»
افغان عیاللری سوداگرلیک و سرمایه یاتقیزیش اتاق مسئوللری گه کوره، اوشبو اتاق ده ثبت نام قیلگن تورت مینگ ۵۰۰ متشبث عیال دن، یالغیز ایکی مینگ ۲۰۰ سوداگر عیال فعالیت قیلماقده.
افغان عیاللری سوداگرلیک و سرمایه یاتقیزیش اتاق سرپرستی ممتاز یوسف‌زی نینگ سلام‌وطندار گه ایتیشیچه، اقتصادی پروژه‌لر یوق‌لیگی و تجارتی ویزه بیریلمسلیگی، اوتگن بیر یریم ییل ده عیال سوداگرلری نینگ اساسی قیینچیلیکلریدن سنله‌دی.
بیزلرنینگ توییترده هم تعقیب قیلینگ!
افغان عیاللری سوداگرلیک و سرمایه یاتقیزیش اتاق سرپرستی ممتاز یوسف‌زی نینگ سلام‌وطندار گه ایتیشیچه: «۱۷ آی دن بویان اقتصادی بحران و عیاللر گه کوپ چیکلاو یره‌تیلگن. عیاللر نینگ ایش بازاری تنزل گه یوز توتگن، عیاللر ایشله‌یدیگن کمپنیه‌لر ایشی توخته‌گن و کوپ سانده عیاللر نینگ ایش جوازی بیریلمسلیگی طفیلی ایشلری توخته‌گن. حاضر جواز قیمت بولگن و ۱۷ آی دن بویان خارج ده هیچ کورگزمه یولگه قوییلمه‌گن.»
اوتگن بیر یریم ییل ده قشاق‌لر سانی کوپه‌یشی و عیاللر گه یره‌تیلگن چیکلاولر باعث، متشبث عیاللر کوپ قیینچیلیکلر بیلن روپه‌ره بولیب و حتا اولردن بیرقطاری، سوداگرلیک فعالیت‌لرینی ترک ایتگنلر.
