۲۵ کیلومتر اوزونلیگی و ۱۲ متر کینگلیگی بولگن غزنی ولایتی خوگیانی و جغتو تومنلری یولینی اسفالتلش ایشی بوگون (۹-ثور، چهارشنبه)، اسلام امیرلیگی فواید عامه وزیرلیگی آرقهلی باشلنگن. غزنی شهریدن بو ولایت جغتو تومنیگچه دوامی بولگن اوشبو یول، ۷۵۷ میلیوندن آرتیق افغانی عوضیگه قوریلهدی.
غزنی حاکمی اورینباسری سرداراحمد مدنینینگ ایتیشچه، خوگیانی و جغتو تومنی یولینی اسفالتلش ایشی کیلهسی ایکی ییلگچه یکونلنهدی. اونینگ کوپهیتیریشیچه: «سیزلرنینگ همکارلیگیز بیلن بو لایحه یخشی بیر شکلده عملگه آشیریلهدی؛ بو سرک ایکی ییلده یکونلهنیب و مذکور سرک شهر مرکزیدن جغتو تومنیگچه دوام قیلهدی.»
غزنی ولایتی جغتو و خوگیانی تومنلری یشاوچیلریدن قطارینینگ ایتیشلریچه، بو سرک توزهلیشی بیلن باریب-کیلیش توغریسیدهگی قیینچیلیکلرینینگ حل بولیشی ممکن.
جغتو نومنی یشاوچیسی سیدرضانینگ ایتیشیچه: «سرک توزهتیلگنیده، اهالی گه آسایشتهلیک یرهتیلهدی. بوندن آلدین یوللر بند بولهردی و اهالی وقتیده ایشلریگه ییتیشه آلمس ایدیلر.»
مذکور یولدن اوتیب-قیتهدیگن جغتو و خوگیانی تومنلری یانیده مالستان و ناهور تومنی یشاوچیلرینینگ ایتیشلریچه، سرک بوزیقلیگی اینیقسه قیشده اوتیب-قیتیشنی اولر اوچون قیینلشتیرگن.
جغتو تومنی یولیدهگی هیداووچیلردن عبدالطیفنینگ ایتیشیچه: «بیر کسلنی انتقال بیرهدیگنیمده، کسلخانهگچه هم ییتیشتیره آلمهدیک. حاضر الحمدالله یخشی بیر فرصت دیر. اینگ یخشی نعمت دیر که سرک توزهلسه.»
غزنی ولایتی خوگیانی تومنینینگ قلعهی سرخ حدودی یشاوچیسی فیضمحمدگه کوره: «یول جودهیم اوزون دیر. سرک اسفالتلنگنیده، جودهیم خورسند بولهمیز؛ کسلیمیز اذیت بولمهیدی.»
قراردادی کمپنیه مسئولی امامجان ستانکزینینگ ایتیشیچه، بو سرک توزهتیلیشیده ۳۰۰ دن آرتیق کیشیگه ایش زمینهسی یرهتیلگن. «بو لایحه ایشی بولیمیده، کونده قریب ۳۰۰ دن ۴۰۰ کیشی تورلی بولیملرده ایش بیلن شغللنگن.»
خوگیانی و جغتو تومنلری یشاوچیلریگه علاوه، مالستان و ناهور تومنلری یولاوچیلری هم بو یولدن اوتیب-قیتهدیلر و اوشبو سرک توزهلیشی بیلن تورت تومندهگی مینگلرچه عایله گه آسایشتهلیک یرهتیلهدی.
