کابل ده ایکینچیلیک و چاروهچیلیک محصوللرنینگ ۳۴-کورگزمهسی، تازه و قوروق میوهلر، اوسیملیکلر و کیمیایی کودلر بولیمیده ۲۵۰ میلیون افغانی ارزشیگه نیچه شرطنامه امضالنیشی بیلن یکونلنگن.
اسلام امیرلیگی ایکینچیلیک، سووغاریش و چاروهچیلیک مسئوللرینینگ ایتیشلریچه، اوتکزیلگن مذکور تورت کونلیک کورگزمهده اونلب کمپنیه، صناعتچی و دهقاننینگ محصوللری تانیشتیریلیشی و ساتیلیشی اوچون امکانیت یرهتیلگن.
ایکینچیلیک و چاروهچیلیک اتاق بوییچه عامه علاقهلر مسئولی مجتبا صبارنینگ ایتیشیچه: «کیمیایی کود و میوهدن باشلب، آزیق-آوقتگچه ۹ کمپنیه اوز آرهسیده مناسب شراطنامهلرنی امضا قیلدی. مذکور کمپنیهلر کوپراق ایچکی بولیب و توپلم شکلده قریب ۲۵۰ میلیون افغانیلیک شرطنامه و کیلیشوونامه امضالندی.»
ایکینچیلیک و چاروهچیلیکنینگ ۳۴-ملی کورگزمهسی، ایکینچیلیک، چاروهچیلیک و سووغاریش وزیرلیگی همده صناعت و سوداگرلیک وزیرلیگی آرقهلی، اوتگن هفته چهارشنبه کونی آچیلگن ایدی.
غرفه آلگنلر، مذکور کورگزمه توغریسیده فرقلی فکرلرگه ایگهلر؛ بیر قطار کیشی ایجابی و یوتوقلی بیلهدیلر و بیر قطار کیشی ایسه ساتیلیش وضعیتیدن راضی ایمسلر.
ایکینچیلیک محصوللرینی نمایش گه قویگنلردن عباسیننینگ ایتیشیچه، تورت کونلیک کورگزمهده ایچکی و تشقی شرکتلر بیلن قریب ۴۰۰ مینگ دالر ارزشیگه شرطنامهلرنی امضالهگن. «قریب ۵-۶ شرطنامهنی ۳.۵ دن ۴۰۰ مینگ دالر ارزشیگه امضا قیلدیک. بو موضوع شرکتلرنینگ توغری شکلده دهقانلر بیلن گپلهشیشلری و اولر بیلن کیلیشیشلری اوچون اهمیتگه ایگه دیر. اوشبو شرطنامهلر کوپراق ایچکی کمپنیهلر همده اوزبیکستان تامانلری بیلن امضالنگن.»
شوندهی بیرحالده، غرفه آلگن عیاللردن قطاری غرفهلرینینگ اهالی کوزیدن اوزاقده بولگنیدن تنقیدلب و ایتیشلریچه، رضایتلی شکلده نرسه ساته آلمهگنلر.
غرفهدارلردن ذکیهنینگ ایتیشیچه: «بیرینچی و ایکینچی کونده ساتیشیمیز یوق ایدی؛ بازار اَیریلگن ایدی. ایرککلر بولمهگنی صورتده، عیاللر بیران نرسه ساتیب آلالمهیدی. اوتگن کون بیراز یخشی ایدی و ساتیشیمیز بار ایدی؛ حداقل اوچ مینگ افغانی نرسه ساتدیک، لیکن سرگردانلیک و قیلگنیمیز صرف-خرهجت گه قرهگنده، قناعتلی ایمس ایدی.»
غرفهدارلردن باشقه بیری وحیده هم بو کبی بیر وضعیتنی بیان قیلیب و ایتیشیچه، محصوللری آزراق ساتیلگن. «اوتگن پیتلرگه قرهگنده ساتیشلر یخشی ایمس ایدی، چونکه یالغیز عیاللرنینگ حضوری بار ایدی، اونچهلیک بازار یوق ایدی. حاضرگچه ۵ مینگ افغانیگچه هم ییتیشمهگن، یالغیز باریب-کیلیش خرهجتی تامین بولگن. چیکلاو بولمهسلیگی و فعالیتلرنینگ برچهنینگ کوریشی برابریگه قوییلیشی کیرهک.»
شوندهی بیرحالده، ایکینچیلیک، سووغاریش و چاروهچیلیک وزیرلیگی مسئوللرینینگ ایشانچ بیریشیچه، کیلهجکده مملکت ایچی و تشقیسیده افغانستان ایکینچیلیک و چاروهچیلیک محصوللریگه بازار تاپیلیشی اوچون کوپراق برنامهلرنی اوتکزیشلری ممکن.
اوشبو وزیرلیک ایکینچیلیک و چاروهچیلیک معینی صدراعظم عثمانینینگ ایتیشیچه: «اوتکزیگنیمیز کورگزمهده، دهقانلر و شرکتلر آرهسیده شرطنامهلر امضالنیشی و محصوللرینینگ بازار گه یول تاپیشی اوچون سعیوحرکت قیلدیک. انه شوو اوچ-تورت کونده، ۲۰۰ میلیوندن آرتیق افغانیگه شرطنامه امضالندی. مملکت ایچی و تشقیده بازار تاپیلیشی همده بو جریاننینگ کیلهجکده هم کوچهیشی و دهقانلر تولیدلر کوپهیشی مقصد حرکت قیلماقدهمیز.»
ایکینچیلیک، باغدارلیک و چاروهچیلیک محصوللری همده پروسس بولگن تولیدلر، قول صناعتی، زراعتی ماشینلر، زعفران، سووغاریش جهازلری، میوهلی و میوهسیز کوچتلر، سولری برق دستگاهلری، بو کورگزمهده نمایش گه قوییلگن اینگ مهم نرسهلردن دیر.
