کابل یشاوچیلریدن قطاری، یاز موسومینینگ ایسیق کونلریده برق پرچاویلری کوپهیگنیدن شکایت قیلیب و ایتیشلریچه، بو وضعیت اولرنی کوپینچه قیینچیلیکلر بیلن روپهره قیلگن.
کابل شهری ۱۳-ناحیه یشاوچیلریدن بیری سیدهاروننینگ ایتیشیچه، بیر کیچهوکوندوزده یالغیز ۱۲ ساعت برقدن فایدهلنه آلهدیلر. «سونگی کونلرده برق پرچاویلری کوپهیگن. بیر کیچهوکوندوز ده یالغیز ۱۲ ساعت برقیمیز بار. بو توغریدهگی قیینچیلیکلرنینگ حل بولیشینی ایستهیمیز.»
شونینگدیک خیرخانه یشاوچیسی شیرمحمد، هوا ایسیقلیگی و برق پرچاویلری سبب بالهلرینینگ اوخله آلمسلیگینی بیان قیلیب و ایتیشیچه: «بالهلر تورلی کسللیکلرگه چلینهدیلر و کیچهدن ایرتنگگچه اوخله آلمهیدیلر. برق بولگنیده پکه یاقیلهدی و اوخله آلهدیلر، لیکن برق پرچاویسی کوپهیگن. برقنینگ ۲۴ ساعتلیک بولیشی کیرهک.»
شوندهی بیرحالده، ایشلاوچیلردن قطاری هم کابل ده برق پرچاویلری کوپهیگنیدن شکایت قیلیب و ایتیشلریچه، سونگی کونلر برق پرچاویلری اولرنینگ اقتصادی فعالیتلرینی قیینچیلیکلر بیلن روپهره قیلگن.
کابل شهری قصابی کوچهسیدهگی دکاندارلردن بیری فقیرالدین ساداتنینگ ایتیشیچه، برق پرچاویلری سبب لبنیات و باشقه بیر قطار آزیق-آوقت محصوللری بوزیلگن. «برق مسئلهسی دنیا ده عادی بیر نرسه دیر، لیکن افغانستان ده برق پرچاویسی بار و ۲۴ ساعتده ۱۰ ساعت برققه ایگه بولیش جودهیم آز دیر. برق یوقلیگی دکان فضاسینینگ ایسیق بولیشی، حشرهلر ییغیلیشی و محصوللرنینگ بوزیلیشیگه سبب بولهدی.»
قصابی کوچهسیدهگی قصابلردن بیری زریالی مایلی، برق پرچاویسی کوپهیگنیدن نالیب و افغانستان برق ییتکزیش شرکتی (برشنا) دن، برق پرچاویسی میزانی کمهیشینی سورهگن. «۲۴ ساعتدن یریمیده برقیمیز بار و یریمیده یوق. برشنا شرکتیدن برقنینگ توزهتیلیشینی ایستهیمیز، قچانگچه کوتیب تورهیلیک. قیش بولسه هم برق پرچاوی بولهدی و یاز بولسه هم. قچان نیازیمیز بولگن برق تامینلنهدی. برقیمیزنینگ توزهتیلیشی کیرهک و برقیمیز تجارتی بولیب و کیلوواتی ۱۳ افغانی دیر.»
شوندهی بیرحالده، افغانستان برق ییتکزیش شرکتی (برشنا) مسئوللرینینگ ایتیشلریچه، اهالی آرقهلی کوپ مصرفلی ساووتگیچ وسیلهلری فایدهلنیشی سبب، برق پرچاویسی کوپهیگن.
برشنا شرکتی سوزلاوچیسی محمدصادق حقپرستنینگ بو توغریده ایتیشیچه: «قیش و یاز موسوملریده، کوپ مصرفلی ایسیتگیچ و ساووتگیچ وسیلهلریدن فایدهلنیش سبب برق پرچاویسی کوپهیهدی. مذکور برق پرچاویسینینگ بوتونلی شکلده یکونلنیشی اوچون برشنا شرکتی ایشلماقده و ۱۸ دن ۲۰ مگاوات ظرفیت بیلن نیچه لایحه ایش آستیده دیر.»
برشنا شرکتینینگ معلوماتی اساسیده، حاضر ایسه کابل یشاوچیلری بیر کیچهوکوندوز ده ۴۱۷ میگاواتدن کوپراق برققه نیازلری بار، بیراق بو شرکت یالغیز پایتخت یشاوچیلری اوچون قریب ۲۹۷ میگاوات برقنی تامین قیله آلهدی.
