بیرینچی جون، خلقارا آته-آنهلر کونی بیلن بیرگه کابل یشاوچیلریدن قطارینینگ ایتیشلریچه، عایله جمعیتدهگی بیرینچی اورگتووچی نهاد بولیب، آته-آنهلر بالهلرینی تربیهلش بیلن هر نرسهنی بیلگن، مسئولیتنی حس قیلگن و متعهد نسلنینگ شکللنیشیده اساسی اورینگه ایگه دیر که بو نسل، جمعیتنینگ ترقیاتی و رواجلنیشیگه حصه قوشه آلالهدی.
کابل شهری ۱۱-ناحیه یشاوچیسی بولمیش فیصلنینگ ایشانچیگه کوره، ساغلام بیر جمعیتنینگ اساسی عایلهدن باشلنهدی. اونینگ ایتیشیچه، آته-آنهلر بالهلرینینگ رهنمالیک قیلیش و قوللب-قوتلش بیلن، اولرنینگ رواجلنیشی یولینی آچیب و شونینگدیک جمعیت کیلهجگی هم عایلهده بالهلرنینگ قندهی تربیهلنیشیگه تیگیشلی دیر.
اونینگ کوپهیتیریشیچه: «رواجلنگن جمعیت عایلهدن باشلنهدی و بالهلر تربیهلنیشیده آته-آنهلر اورنی جودهیم مهم دیر. آته-آنهلر بالهلرینینگ رهنمالیک قیلیب و تشویق قیلیشلری کیرهک؛ چونکه جمعیتدهگی حاضرگی قیینچیلیکلردن قطارینینگ ریشهسی عایلهدهگی تربیه بیلن باغلیق دیر.»
کابل یشاوچیلریدن باشقه بیری آمنه، عایلهلر مستحکملیگی همده بالهلرنینگ ساغلام تربیهلنیشیده آته-آنهلر اورنینی مهم بیلیب و ایتیشیچه، بالهلر دوست و محیطدن تاثیرلنیشدن آلدین آته-آنهلرینینگ سوزلری و یاندهشوولرینی اورگنهدیلر. «بالهلر آته و آنهنینگ یاندهشووینی کوریش بیلن اوز یاندهشووینی شکل بیرهدی. قرشیلیک حرمت قایل بولینیش و صحبت قیلیش مسئلهسی بولگن عایلهده، بالهلر مسئولیتنی حس قیلهدیگن، اوزیگه ایشانچی بولگن همده جمعیت اوچون فایدهلی بیر فرزند تربیهلنهدی.»
شونینگدیک کابلنینگ شهرنو منطقه یشاوچیسی بولمیش اکبر هدایت، بالهلر شخصیتی شکللنیشیده آته-آنهلر اورنینی اونملی بیلهدی. اونگه کوره، هر بیر جمعیتنینگ رواجلنیشی عایلهلر آگاهیلیگی میزانی همده مسئولیتنی حس قیلیشیگه تیگیشلی دیر. «آته-آنهلر بیلیم، منطق و آگاهیلیککه ایگه بولگنیده، جمعیتگه ساغلام و فایدهلی بالهلرنینگ تقدیم قیلیشی ممکن.»
کابلنینگ چهارراهی شهید یشاوچیسی عبدالله، آته-آنهلرنی فرزندلرنینگ بیرینچی اوقیتووچیسی دیب و اورغولشیچه، هیچ بیر نهاد عایله کبی بالهلرنینگ اخلاقی رشد قیلیشی، شخصیتینینگ شکللنیشی و استعدادلری رواجلنیشیگه تاثیر کورسته آلمهیدی. «آته-آنهلر عایلهنینگ اساسی ستونی و بالهلرنینگ بیرینچی اوقیتووچیسی دیر. هیچ بیر نهاد عایله کبی بالهلر اخلاقی رواجلنیشی و استعدادلری آشیشیده تاثیر قویه آلمهیدی.»
شوندهی بیرحالده، جمعیتشناسلرنینگ ایتیشلریچه، اجتماعی و اقتصادی قیینچیلیکلر بولگنی بیلن، عایلهلر ینه هم بالهلر شخصیتی شکللنیشیده مهم حصه قوشهدی.
جمعیتشناسلردن شعیب احمدینینگ ایتیشیچه: «بالهلر شخصیتی اساسی بالهلیکدن شکللنهدی و اولر بیرینچی سوزلری و یاندهشوولرینی آته-آنهلردن اورگنهدیلر. آتهلر و آنهلر بالهلر تربیهسیگه کوپراق توجه قیلیشلری کیرهک؛ چونکه کیلهسی نسلگه اخلاقی، دینی و اجتماعی ارزشلر انتقال تاپیشیده مهم اورینگه ایگهلر.»
میلادی ۲۰۱۲-ییلده بیرلشگن ملتلر تشکیلاتینینگ عمومی مجمعسی، ۱-جوننی «خلقارا آته-آنهلر کونی صفتیده ناملهگن. بو کوننینگ نشانلشدن مقصد، بالهلرنینگ سقلهنیشی، قوللب-قوتلنیشی، تربیهلنیشی همده رشدیده آته-آنهلر مسئولیتی و اورنیگه تاکید قیلیش و جمعیت رواجلنیشیده عایلهلر اهمیتی توغریسیده آگاهیلیک آشیشی عنوان بولگن.
