افغانستان سودا و سرمایه کیریتیش همده صناعت و کانلر اتاقلری اورتهسیده قوشمه سهامی شرکت تشکیل ایتیلیش شرطنامهسی، اسلام امیرلیگی ییریک عملدارلرینینگ اشتراکی بیلن، بوگون (۲۷ اسد/۱۸ آگست، سهشنبه) کابلده امضالندی.
اسلام امیرلیگی باش وزیرینینگ اقتصادی اورین باسری ملا عبدالغنی برادر، اوشبو شرطنامه خصوصی سکتورنی قوللب-قوتلش، اقتصادی و آست قوریلمه ییریک لایحهلر اوستیده سرمایه کیریتیشنی آسانلشتیریش همده سوداگرلر و سرمایه کیریتووچیلر اورتهسیده همکارلیککه زمینه یرهتیش مقصدیده امضالنگنینی ایتگن.
او شوندهی دییدی: «اوشبو دستور عملگه آشیریلیشی بیلن تدبیرکارلر، سرمایه کیریتووچیلر و صناعتچیلرنینگ مبلغلری یگانه، ترتیبلی و شفاف حقوقی دایرهده جمعلنیب، اولرنینگ عمومی صلاحیتیدن ییریک لایحهلرنی مالیهوی قوللب-قوتلش اوچون فایدهلنیلهدی.»
شو بیلن بیرگه، اسلام امیرلیگی صناعت و سودا وزیرلیگی مسئوللری، اوشبو شرطنامه امضالنیشینی افغانستاننینگ اوزینی اوزی تأمینلش و خصوصی سکتورنی کوچهیتیریش یولیدهگی مهم قدم دیب اتهیدیلر.
صناعت و سودا وزیری نورالدین عزیزی شوندهی دییدی: «اینگ مهمی، خصوصی سکتور اسلام امیرلیگیدن حمایهسینی بیلدیرسه و اسلام امیرلیگینینگ اقتصادیات گه یونهلتیریلگن دستوری هم خصوصی سکتورنی قوللب-قوتلش گه قرهتیلگن.»
شونینگدیک، افغانستان سودا و سرمایه کیریتیش اتاقی عمومی باشلیغی سیدکریم هاشمی، بوتون سوداگرلردن اوشبو شرکتده سرمایه کیریتیشنی سورهیدی. اونینگ ایتیشیچه: «سهامی کمپیهنینگ کوچی شونده کی، او تورلی سرمایه کیریتووچیلر، تجربهلر و امکانیتلرنی یگانه دایرهده بیرلشتیریب، ییریک ایشلرنی عملگه آشیریش امکانینی بیرهدی. ایشانچ، شفافلیک و توغری باشقرو اساسیده بیر جایگه جمعلنسه، افغانستان اوچون کتته اقتصادی کوچ گه ایلنیشی ممکن.»
افغانستان صناعت و کانلر اتاقی باشلیغی احمد نبیزادهنینگ ایتیشیچه، بو شرکت صناعت، کانلر و اقتصادی لایحهلر ساحهلریده سرمایه کیریتیش زمینهسینی یرهتیشی ممکن. او شوندهی دییدی: «اوشبو سهامی کمپنیه صناعت، کانچیلیک، آست قوریلمه و قوریلیش، ترانسپورت همده باشقه مهم ساحهلرده ییریک ملی لایحهلر گه سرمایه کیریتیشلرنی جلب قیلیشگه حرکت قیلهدی. حکومت و خصوصی سکتور اورتهسیده همکارلیک ینهده کوچهیشیگه امید قیلهمیز.»
سهامی شرکتنی تشکیل ایتیش توغریسیدهگی شرطنامه، افغانستان بانک چیکلاولری و تحریملر گه دوچ کیلهیاتگن بیر پیتده امضالنگن. اقتصاد شناسلرنینگ ایتیشیچه، بو معمالر مملکت گه تشقی سرمایه کیریتووچیلرنی جلب قیلیش جریانینی قیینلشتیرگن.
