تخار ولایتی ماورای کوکچه منطقهسیده خواجهغار-دشتقلعه سرکی لایحهسی ایشی باشلنگنیدن قریب بیر ییل اوتگن، بیراق بو منطقه یشاوچیلرینینگ ایتیشلریچه، ماشینلر کملیگی و ایشنینگ سُستلیگی سبب، لایحه بوییچه ترقیات کم بولگن. اولر، مسئوللردن مذکور منطقه یشاوچیلرینینگ باریب-کیلیش توغریسیدهگی قیینچیلیکلری کمهیشی اوچون اوشبو سرکنینگ قوریلیش جریانی تیزلشتیریلیشینی سورهگنلر.
مذکور منطقه یشاوچیلریدن عزیزاللهنینگ ایتیشیچه: «قیغو بیلن اوشبو سرکنینگ جغل توشهش ایشی آلتی آیدن بیری یکونلمهگن؛ اهالی اوچون آسایشتهلیک اورنیده قیینچیلیکلر کوپهیگن.»
یشاوچیلردن باشقه بیری فهیمالله گه کوره: «مذکور سرکلرنینگ قیته قوریلیش جریانی دوام قیلماقده؛ ییریک بیر لایحهده ماشینری ییترلی ایمس، یالغیز بیر-ایکی اسکواتوردن فایدهلنیلهدی.»
شونینگدیک خواجهغار-دشتقلعه یولیدهگی هیداوچیلرنینگ ایتیشلریچه، اوشبو سرک قوریلیش ایشی سُستلیگی، نقلیه واسطهلرنینگ باریب-کیلیشینی قیینچیلیک بیلن روپهره قیلگن. اولرگه کوره، بیر قطار حدودلرده اهالی و موترلر فرعی یوللر و زراعتی ییرلردن اوتیشگه مجبور بولهدی که بو ایش، چنگ-توپهلنگنی یرهتیش یانیده خرهجتلر کوپهیشی و نقلیه واسطهلر بوزیلیشیگه هم سبب بولهدی.
مذکور یولدهگی هیداوچیلردن بیری شیرآغانینگ ایتیشیچه: «کوپ قیینچیلیک بیلن اوتیب-قیتهمیز؛ آزگینه یول اوزاق بولیب قالگن. کوپ قیینچیلیک بیلن روپهرهمیز و هر کونی هر یولدن باریشگه مجبور بولهمیز. بیر ییل اوتگنی بیلن ینه هم بو سرک توزهلمهگن.»
شوندهی بیرحالده، تخار فواید عامه ریاستی مسئوللری، خواجهغار-تخار سرکی قوریلیش جریانینینگ دایمی شکلده نظارت بولیشینی ایتگنلر.
تخار فواید عامه ریاستی تخنیکی و سرک قوریلیشی بوییچه آمری محمدولینینگ ایتیشیچه، لایحه ایشی دستور اساسیده دوام قیلیب و ۱۴۰۶-ییل حمل آییده فایدهلنیشگه تاپشیریلیشی ممکن. «قریب بیریریم آیدن کیین انشاءالله اوشبو سرکنینگ اسفالتلنیش ایشی باشلنهدی. ایش سُستلیگی گه سبب بولگن تخنیکی یا-ده اداری بیر قیینچیلیک کبی بیران موضوع ایمس.»
خواجهغار-دشتقلعه سرکی، تخار ده ماورای کوکچهنینگ اینگ مهم علاقه یوللریدن دیر. اوشبو منطقه قریب بیر میلیون جمعیت بیلن، شونینگدیک آیخانم بندریگه باغلنگن ترانزیتی مهم یوللردن بیری هم حسابلنهدی. ماورای کوکچه یشاوچیلری ییللردن بیری ستندرد سرک یوقلیگیدن شکایت قیلیب و باریب-کیلیش، تجارت رواجلنیشی و کیرهکلی خذمتلردن آسانراق فایدهلنیش اوچون اوشبو لایحه ایشی یکونلنیشینی مهم بیلهدیلر.
