پاکستان عالی محکمهسی، اوشبو مملکت سابق باش وزیری عمران خاننی یقین کونلرده قماقخانهدن شفاخانه گه آلیب باریش حقیده قرار قبول قیلگن.
ییتکرمهلرنینگ معلوماتیگه کوره، پاکستان عالی محکمهسی بوگون (۲۷ اسد/۱۸ آگست، سهشنبه) بو قرارنی قبول قیلگن. محکمه شونینگدیک، ملازم گه عایله اعضالری بیلن هر هفتهلیک اوچرهشوولرنی تأمینلشنی بویرگن.
قید ایتیلیشیچه قرار عمران خان میلادی ۲۰۲۳-ییلنینگ آگست آییدن بیری حبسده اوشلب توریلگن قماقخانه باشلیغی، سابق باش وزیرنینگ ساغلیغی حالتی توغریسیده گزارشنی محکمه گه تقدیم ایتگنیدن سونگ قبول قیلینگن. شفاکارلر خلاصهسیگه کوره، خاننینگ نبض و یورهک حالتی معیارده ایمس. وکیللر و عایله اعضالریگه اونینگ طبی کوریک نتیجهلرینی آشکار قیلیش تقیقلنگن.
عمران خان، میلادی ۲۰۱۸ ییلدن ۲۰۲۲ ییلگچه پاکستان باش وزیری ایدی. اونگه نسبتن بیر نیچته جنایت ایشی قوزغهتیلگن. میلادی ۲۰۲۳ ییلدن بیری سابق باش وزیر «توشخانه» دولت خزینهسیده سقلنهیاتگن قیمتبها بویوملرنی ساتگنلیک عیبلاوی بیلن ۱۴ ییللیک قماق جزاسینی اوتهماقده.
۲۰۲۴-ییلده اداری فساد اوچون ینه ۱۴ ییلگه آزادلیکدن محروم ایتیلگن ایدی. ۲۰۲۵ ییلنینگ دسمبر آییده محکمه عمران خان و اونینگ تورموش اورتاغی بشرا بیبینی فساد عیبلاوی بیلن ۱۷ ییلگه آزادلیکدن محروم قیلیش حقیده حکم چیقردی.
ایسلهتیب اوتهمیز، اولراق قماقده سقلنهیاتگن عمران خان اونگ کوزینینگ کوریش قابلیتینی دییرلی یوقاتگنی حقیده خبر بیریلگن ایدی.
