فاریاب محلی منبع‌لری نینگ ایتیش‌لریچه، طالبان جنگریلری اوتگن کیچه اوشبو ولایت نینگ قیصار تومنیده هجوم قیلگن.
فاریاب ولایتی کینگش عضوی نادر سعیدی نینگ سلام‌وطندارگه ایتیشیچه، قیصار پولیس قومندانلیگی و بلدیه بناسی طالبان نظارتی‌گه اوتگن و آتیشمه نتیجه‌سیده اوشبو تومن پولیس قومندانی سیف‌الرحمان دهزاد شامل ۱۴ حربی هلاک و باشقه ۳۷ حربی طالبان قولیگه اسیر بولگن.
فاریاب ولایتی کینگش اوشبو عضوی نینگ ایتیشیچه، شونینگدیک، امنیتی کوچلردن ۳۰ ته‌سی قیصار تومن بناسی و باشقه ۶۰ ته‌سی اوشبو تومن نینگ «کوهی» قیشلاغیده طالبان قمراویگه قرار تاپگن و کمکی کوچلر یوباریلمه‌گن صورتده، اوشبو ایکی منطقه‌نی طالبان قولیگه سقوط قیلیشی ممکن.
فاریاب امنیتی مسوول‌لری و طالبان گروهی حاضرگه‌قدر بوتوغریده فکر بیلدیرمه‌گن.
شونینگدیک، غور ولایتیده پارتلش ماده یوکلنگن بیر موتر نینگ طالبان تامانیدن پارتله‌تیلگنی نتیجه‌سیده امنیتی کوچلردن ۸ ته‌سی هلاک ایتیلگن.
غور ولایتیدن امنیتی بیر منبع نینگ کیم‌لیگی سیرقالیش‌نی ایسته‌ب سلام‌وطندارگه ایتیشیچه، طالبان جنگری اوتگن کیچه پارتلش ماده یوکلنگن هاموی بیر تانک آرقه‌لی اوشبو ولایت نینگ شهرک تومنیده امنیتی بیر پوسته اوستیگه هجوم قیلگنلر.
منبع گه کوره، اوشبو واقعه‌ده امنیتی کوچلردن ۸ ته‌سی هلاک و باشقه ۷ ته‌سی طالبان قولیگه اسیر بولگن. منبع نینگ کوپه‌یتیریشیچه، مذکور تومن حاضرده امنیتی کوچلر نظارتی‌گه دیر و طالبان جنگریلری اوشبو تومن اطرافیده توپلنگن.
منبع نینگ ایتیشیچه، اوتگن کیچه دن بویان غور مرکزی فیروزکوه شهریده یالغیز سلام مخابراتی ترماغی فعال دیر و باشقه شبکه‌لر فعالیتی توخته‌تیلگن.
عین‌حالده، غور حاکمی عبدالظاهر فیض‌زاده نینگ طالبان هجومینی تصدیق‌لب ایتیشیچه، مذکور واقعه‌ده امنیتی کوچلردن ۹ ته‌سی هلاک و باشقه ۶ ته‌سی درک‌سیز یوقالگن.
غور حاکمی گه کوره، طالبان گروهی اوشبو هجومده غور پولیس قومندانلیگی نینگ ایکینچی سمت آمری حیات‌الله عادل نینگ هاموی تانگی دن فایده‌لنگن. غور حاکمی نینگ ایتیشیچه، مذکور هجومده طالبان جنگریلریدن ۱۳ ته‌سی هلاک ایتیلگن.
طالبان گروهی حاضرگه‌قدر بوتوغریده فکر بیلدیرمه‌گن.
