سمنگان ده یاشلردن قطارینینگ ایتیشلریچه، خصوصی کتابخانهلر و فرهنگی نهادلرنینگ توزهتیش بیلن، اهالی اینیقسه یاش نسل آرهسیده کتاب اوقیش فرهنگینی رواجلنتیریش مقصد سعیوحرکت قیلماقده. اولرنینگ کوپهیتیریشلریچه، اقتصادی قیینچیلیکلر، امکانیت کملیگی و اوقوو منبعلریدن آزراق فایدهلنیش امکانیتی بولگنی بیرحالده، کتاب اوقیش فرهنگی کوچهیشی اوچون سعیوحرکتلر دوام قیلماقده.
سمنگان ولایتی خرم و سارباغ تومنی یشاوچیسی همده اقتصاد بیلیم یورت طلبهسی بولمیش ۲۳ یاشر ضیاءالله احمدینینگ ایتیشیچه، اوچ ییلدن بویان اهالی آرقهلی توزهتیلگن فرهنگی بیر نهادده فعالیت قیلماقده. «خرم و سارباغ تومنیده خصوصی بیر کتابخانه نی توزهتگنمین و بو ایشدن مقصد کتاب اوقیش فرهنگی رواجلنیشی و یاشلرنینگ بیلیش درجهسینی کوپهیتیریش دیر. بو کتابخانهده، قریب تورت-بیش مینگ جلد کتاب بار و کونده ۵ دن ۱۵ یاش کتاب اوقیش اوچون کیلهدی. عایلهلر و یاشلر همکارلیگی بیلن سیمینارلر، فرهنگی ییغیلیشلر و تشویقی برنامهلرنی اوتکزهمیز که هم اهالی خورسند بولگن همده یاشلرنینگ کتاب اوقیشگه قیزیقیشی کوپهیگن.»
شونینگدیک بو توغریده یاشلردن بیر قطاری فرهنگی نهادلرنی آچیش بیلن بو توغریده حرکت قیلگنلر. سمنگان یشاوچیسی و «راه دانش» نهادی مدیری ۲۲ یاشر تبریزنینگ ایتیشیچه، اوشبو نهادده ایکی ییلدن بویان فعالیت قیلماقده. «مذکور نهادنینگ آچیشدن مقصد، کتاب اوقیش فرهنگینی رواجلنتیریش و سمنگان همده یقین تومنلریده کتابخانهلر کملیگی قیینچیلیگینی حل قیلیش دیر و کونده ۷-۸ کیشی مطالعه اوچون کیلهدی. یاشلرنی تشویق قیلیش اوچون سیمینارلر، کتابنی تانیشتیریش و فرهنگی ییغیلیشلر کبی برنامهلرنی اوتکزهمیز و بو فعالیتلرنینگ کیلهجکده کوپراق قیلیش اوچون سعیوحرکت قیلماقدهمیز.»
اونینگ کوپهیتیریشیچه، امکانیت و مالی منبعلر کملیگی، اولرنینگ فرهنگی فعالیتلری یولیدهگی اصلی قیینچیلیکلردن دیر؛ بیراق دوستلر و عایلهلری همکارلیگی بیلن بو نهادنی فعال سقله آلگنلر. شوندهی بیرحالده، یاشلردن قطاری اوزاق منطقهلرده هم بو کبی مرکزلرن آچیشگه سعیوحرکت قیلماقدهلر.
سمنگان ولایتی یشاوچیسی و اقتصاد بیلیم یورت طلبهسی بولمیش ۲۱ یاشر حجتالله منیبنینگ ایتیشیچه: «رویدوآب تومنیده بیر کتابخانهنی آچماقچینمین؛ چونکه اوشبو منطقهده کتابخانه یوق و یاشلر اوقوو منبعلریدن فایدهلنه آلمهیدیلر. بو توغریده یاشلر بیلن جلسه قیلگنمیز و ریجهمیزنی معلومات و مدنیت ریاستی بیلن شریک قیلگنمیز که همکارلیک سوزینی بیرگنلر. شونینگدیک باشلمسدن آلدین آگاهیلیک بیریش و سیمینارلر اوتکزیشگه پلانیمیز بار و کونده ۱۰ دن ۱۵ کیشینینگ مذکور کتابخانهدن فایدهلنیشی کوتیلهدی.»
منیبنینگ کوپهیتیریشیچه، اقتصادی قیینچیلیکلر بولگنی بیرحالده، عایلهلر و دوستلری همکارلیک توغریسیده سوز بیرگنلر و یقینده مذکور مقصدینینگ عملگه آشیریشنی امید قیلهدی.
باشقه بیرتاماندن، بیلیم یورت استادی علیجاوید صفدرینینگ ایتیشیچه: «فرهنگی نهادلرنی آچیش و کتاب اوقیش رواجلنیشی اوچون سعیوحرکت قیلیش بیلن یاشلرنینگ کته مسئولیت بویینلریگه آلیشلرینی کوریش، حقیقتاً فخر و خوشلیک دیر. بو کبی حرکتلر، یاشلرنینگ یالغیز شخصی رواجلنیشگه توشینمسلیکلری بلکیم، جمعیت نیازلرینی بیلیش بیلن فکری و فرهنگی رواجلنیش سری آدیم کوتاریشلرینی کورستهدی.»
فرهنگی بیلرمانلرنینگ اورغولشیچه، کتاب اوقیش فکری رواجلنیش، آگاهیلیک درجهسی آشیشی و اجتماعی قیینچیلیکلر کمهیشیده مهم اورینگه ایگه بولیب و بو بولیمده توجه قرهتیلیشی جمعیت رواجلنیشیگه امکانیت یرهته آلهدی. سمنگان ده عامه کتابخانهلر مسئوللرینینگ ایتیشلریچه، سونگی ییللرده یاشلرنینگ کتاب اوقیشگه قیزیقیشی کوپهیب و اولرنینگ تشویق قیلیش اوچون تورلی دستورلر یولگه قوییلگن.
سمنگان معلومات و مدنیت ریاستی عامه کتابخانهلر عمومی مدیری جانمحمد امیرینینگ ایتیشیچه: «عامه کتابخانهلر معلومات و مدنیت وزیرلیگی حمایهسیده فعالیت قیلماقده و اونینگ یانیده، خصوصی کتابخانهلر آچیلیشیدن هم حمایت قیلهمیز. مرکزی کتابخانهده ۱۲ مینگدن آرتیق کتاب بار و مقصدیمیز مرکز و تومنلرده مطالعه فرهنگینی رواجلنتیریش دیر. کتاب هفتهسی، سیمنیارلر و تشویقی برنامهلر کبی دستورلرنی اوتکزهمیز که یاشلر کتاب اوقیشگه قیزیقسین و جمعیتده بیلیم درجهسی کوپهیسین.»
بیلرمانلردن قطارینینگ ایشانچیگه کوره، فرهنگی بولیمده یاشلر تشبثلریدن حمایت بولگنی صورتده، جمعیتده فرهنگی و علمی رواجلنیش امکانیتینی یرهتیب و یاش نسلنی آگاهیلیک و رواجلنیش سری آلیب باره آلهدی.
