بیرلشگن ملتلر تشکیلاتی‌نینگ انسان پرورلیک یاردملرینی موافقلشتیریش اداره (اوچا)، تورخم چیگره‌سی یقینیده یوز بیرگن ینگی توقنشوولر افغانستان‌ده‌گی تینچ اهالی و یاردم خادملری‌نینگ حیاتینی خوف آستیگه قویه‌یاتگنی حقیده آگاه‌لنتیردی.
اوچا بیر بیانیه ترقه‌تیب، پاکستان و اسلام امیرلیگینی تینچ اهالی همده آست قوریلمه‌لرنی جمله‌دن انسان پرورلیک یاردم خادملری و موسسه‌لرنی نشانگه آلمسلیککه چقیردی.
اوشبو اداره‌نینگ کوپه‌یتیریشیچه، کیسکین‌لیکلر گه قره‌می، بیرلشگن ملتلر تشکیلاتی و اونینگ انسان پرورلیک ساحه‌سیده‌گی همکارلری اوز فعالیتینی دوام ایتتیرماقده. اولر چیگره همده اونینگ یقینیده‌گی قبول قیلیش و ترانزیت مرکزلریده یاردمگه محتاج عایله‌لر گه کمک بیرماقده.
اوچا معلومات‌لریگه کوره، تورخم افغانستان فقرالری‌نینگ پاکستان‌دن اوز وطنی گه قیتیشی اوچون اساسی چیگره یونه‌لیشلردن بیری حسابلنه‌دی. جنوری آیی‌دن اکتوبر آیی‌نینگ باشیگچه اوشبو یونه‌لیش آرقه‌لی ۶۰۰ مینگدن آرتیق کیشی افغانستان گه قیتگن.
اوچا گه کوره، اوتگن هفته‌نینگ چهارشنبه کونی تورخم چیگره‌سی یقینیده یوز بیرگن توقنشوولر عاقبتیده محلی اهالیدن بیر نفر باله هلاک بولگن، پاکستان‌دن قیته‌یاتگن عایله‌لر گه یاردم کورسته‌یاتگن بیر نفر انسان پرورلیک یاردم خادمی ایسه یره‌لنگن.
سونگی بیر ییل دوامیده، اسلام امیرلیگی و پاکستان اورته‌سیده مناسبت‌لرده کیسکین‌لیک تاباره کوچه‌یب بارماقده. ایکی تامان دیورند چیزیغی و چیگره حدودلریده بیر نیچه بار اوزارا اوق اوزگن. بونینگ عاقبتیده تینچ اهالی وکیللریدن بیر قنچه‌سی هلاک بولگن و یره‌لنگن.
