یقین شرق ینه بیر بار اینگ نازک سیاسی و خوفسیزلیک قرمه-قرشیلیکلریدن بیرینینگ مرکزیگه ایلنگن. تهران و واشنگتن اورتهسیدهگی مناسبتلر شوندهی باسقیچ گه کیرگن کی، اونده حربی تهدیدلر، ینگی تحریملر و دیپلماتیک سعی-حرکتلر بیر وقتنینگ اوزیده دوام ایتماقده همده بو انقراض هر کونی ینگی توس آلماقده.
امریکا جمهور باشلیغی دونالد ترامپ، ایراننی آگاهلنتیریب اگر اونگه قرشی سوءقصد قیلیش اوچون هر قندهی حرکت یا کی فتنه عملگه آشیریلسه، امریکا قوشمه ایالتلری قتیق جواب قیتریشینی ایتگن.
او تروث اجتماعی ترماغیده شوندهی یازگن: «مینگته راکته تیار حالتده و ایران اسلامی جمهوریتی تامان یونهلتیریلگن و اگر ایران حکومتی تامانیدن امریکا جمهور باشلیغینی اولدیریش بوییچه تهدید عملگه آشیریلسه، اوندن کیین درحال ینه مینگلب راکته اوچیریلهدی.»
ترامپ شونینگدیک، ایران امریکا بیلن مذاکرهلرنی دوام ایتتیریشنی ایستهگنینی و واشنگتن هم بو طلب گه راضی بولگنینی ادعا قیلگن.
بو ادعا، تهراننینگ مناسبتی گه سبب بولدی. ایران تشقی ایشلر وزیرلیگی سوزلاوچیسی اسماعیل بقایی گه کوره، تهران امریکا بیلن توغریدن-توغری مذاکره اوتکزیش تکلیفینی بیرمهگن، بلکی فقط منطقهدهگی واسطهچیلردن بیرینینگ سونگی واقعهلر حقیده صحبتلشیش تکلیفینی قبول قیلگن.
بقایی شونینگدیک، ایران امریکا و اسرائیل هجوملریده ضرر کورگن یدراو انشاآتلرنی تیکشیریش گه رخصت بیریلمسلیگینی بیلدیرگن.
او شوندهی دییدی: «بیز امریکا قوشمه ایالتلری بیلن مذاکره اوتکزیش اوچون هیچ قندهی تکلیف بیرمهگن میز، بیراق واسطهچی نینگ ایران گه سفرینی قبول قیلدیک.»
شو بیلن بیرگه، امریکا مالیه وزیرلیگی ایران گه قرشی ینگی تحریملر جاری قیلدی. بونگه جواباً ایران تشقی ایشلر وزیری سیدعباس عراقچی امریکانی ایکی دولت اورتهسیدهگی کیلیشوو دایرهسیدهگی مجبوریتلرینی بوزیشده عیبلب و کیلیشوولر گه رعایه قیلیش فقط هر ایکی تامان اوز مجبوریتلرینی بجرگن تقدیرده معنا بیریشینی ایتگن.
او ایکس اجتماعی ترماغیده شوندهی دیب یازگن: «بو بوزیلیش امریکا قوشمه ایالتلری تامانیدن قیلینگن بیر قطار باشقه مجبوریت بوزیلیشلری و ناتوغری حرکتلردن کیین صادر بولدی. حقیقت شو کی: مجبوریتلر گه رعایه قیلیش فقط اوزارا بولیشی ممکن.»
شو بیلن بیرگه، امریکانینگ «آکسیوس» نشری ایران و امریکا اورتهسیده کیلهسی هفته سویسده ینگی مذاکرهلر روندی اوتکزیلیشی احتمالی حقیده خبر بیردی. بو ایسه دیپلماتیکنی قیته تیکلش امیدلرینی ینه آشیرگن.
سیاسی بیلرمان معین گل سمنکی شوندهی دییدی: «بو توقنشوولر ینهده کوچهیشی ممکن، هر ایکی تامان هم تیارگرلیکلرینی نمایش ایتدی. امریکا شوندهی بیر حرکتنی عملگه آشیردی کی، گویا کی ایران بیلن آتیش کیسین کیلیشووی گه ایریشیلگندیک بولدی، اما اصلیده بو فقط سنا سیلاولری سببلی بولگن و اوز حزبی مغلوب بولمسلیگی اوچون وقت یوتیش اصولی ایدی.
بو کیسکینلیکلر یانیده، هرمز بوغوزی انقراضی هم اساسی کیلیشماوچیلیکلردن بیریگه ایلنگن. امریکا ایراندن اوشبو استراتیژیک سوو یولی آچیق قالیشی و سودا کیمهلریگه هجوم قیلینمسلیگی حقیده رسمی کفالت بیریشنی طلب قیلگن. شو بیلن بیرگه، عباس عراقچی بو انقراض بوییچه مصلحتلشوولر اوتکزیش اوچون عمان گه سفر قیلدی و قطر واسطهچیلریدن عبارت هیئت هم تهرانده ایران رسمیلری بیلن اوچرهشگن.
